10 يناير 2019

ليه تستخدم بلوجر Why Blogger

ليه تستخدم بلوجر Why Blogger
 عن منصة بلوجر عشان الإشاعات الكتير اللي اتنشرت عنها واللي خوفت ناس كتير من استخدامها للمنصة، البوست مش مقارنة بين بلوجر أو ووردبريس أو مين الأفضل، البوست لتوضيح حقائق عن منصة بلوجر ومقارنة أهم مميزاتها بنظيرها في المنصة الأشهر ووردبريس.

بلوجر دي منصة محتوى CMS زيها زي ووردبريس، ويكس، ويبلي، جوميلا وغيرها، المنصة أسسها واحد اسمه Evan Williams في التسعينات وبعد كدة باعها لجوجل سنة 2003م وراح يساهم في تأسيس تويتر "ولعانة 😂" المهم حاليا هي تاني أكتر منصة محتوى مستخدمة بعد منصة ووردبريس، يمكن في اعتقاد سائد إن أي حاجة مجانية فهي سيئة وطبعًا الاعتقاد ده خاطئ تمامًا لأن منصة ووردبريس برضه مجانية،

 بس إيه الفرق بين بلوجر ووردبريس؟


1- استضافة بلوجر

- في الوقت اللي فيه مستخدم ووردبريس لو بيدخله 10 ألف زائر في اليوم بيحتاج يشتري استضافة بمبلغ وقدره $$$ شهريًا، انت ببساطة تقدر تدخل أضعاف العدد ده لموقعك بدون ما يكون عندك أي مشكلة ومش هتخاف إن الموقع ممكن يوقف زي ما بيحصل مع بعض مستخدمي ووردبريس، وده ببساطة لأن موقعك مستضاف على أقوى سيرفرات في العالم وهي سيرفرات جوجل، مش بس كدة ,بلوجر بتوفر لك شهادة حماية SSL مجانية بتركبها على المدونة في خطوتين وبتتفعل معاك في 5 دقايق وكل ده ببلاش.، غيرك بيدفع تمن الشهادة دي وبيبقى عنده مشاكل في تركيبها أو تغييرها لو غير الاستضافة.

2- سرعة بلوجر

- لو فرضنا إن عندنا موقعين بنفس المحتوى ونفس القالب على ووردبريس وبلوجر فموقع بلوجر هيبقى أسرع، أول حاجة الاستضافة زي ما قولنا، مهما كانت شركة الاستضافة اللي ووردبريس شغال عليها مستحيل سيرفراتها تبقى أقوى من سيرفرات جوجل، لما بترفع صور للموقع بتترفع على دومين فرعي ودي بيوفر لك تحميل أسرع، نقطة فنية بقى إن منصة بلوجر بنسميها منصة Client Side يعني إيه؟ يعني القالب بتاعها متبرمج بلغات يقدر المتصفح يفهمها ويترجمها ويعرضها للمستخدم زي HTML وCSS وغيرها، العكس ووردبريس بنسميه منصة Server Side، لأن لغات البرمجة اللي بتستخدم في برمجة قوالب ووردبريس زي PHP المتصفح مش بيقدر يترجمها فبيحولها للسيرفر اللي بيترجمها وبعد كدة يحولها لصفحة HTML ويبعتها للمتصفح عشان ويعرضها طبعا كل ده واخد من سرعة الموقع.

3- قوالب بلوجر

- بلوجر بتوفر مجموعة قوالب مجانية على المنصة، لكن الغالب إنك هتستخدم قالب مجاني خارجي من المتوفر على الإنترنت وفي قوالب كتير مجانية وتقدر تحملها بشكل رسمي، تقدر تحمل قوالب مدفوعة مجانا بطريقة رسمية من مواقع زي Sora Templates ودي بتقدم قوالب مدفوعة احترافية مجانا وبيبقى فيها رابط الموقع كنوع من الترويج. طبعًا تقدر تعرب القالب بسهولة من خلال أي برنامج لتعريب القوالب وتغير الخط ومبروك عليك.

- في برضه قوالب عربية ممتازة زي قالب GM وسيو بلس النسخ المجانية، ولو بتدور على قالب مدفوع سعره هيكون 10$ أو يزيد حاجة بسيطة.
- في الووردبريس القوالب بيكون سعرها أغلى عدة أضعاف وبيكون في صعوبة في تركيب القالب على المستخدمين المبتدئين، عكس بلوجر اللي كل اللي هتعمله إنك هترفع القالب وتعدل عليه من التخطيط أو من داخل القالب على حاجات بسيطة جدًا.

4- حماية بلوجر

- أفضل ميزة من وجهة نظري في بلوجر هي ميزة الحماية، الموقع ببساطة مش بيسمح لك توصل لجذر "Root" الموقع، يعني باختصار إنت لا تملك صلاحية الوصول لكافة الملفات على الموقع، صلاحيتك محدودة بعمل المشاركات وتغيير تصميم الموقع وتغيير الدومين وهكذا، لكن مثلًا انت مش هتقدر ترفع ملفات على موقعك.
- وبالرغم من إن في ناس شايفة إن ده من عيوب بلوجر لكن أنا شايفها ميزة مهمة جدًا، ببساطة إنت مجرد ما تحمي حساب جوجل اللي عليه المدونة انت كدة أمنت موقعك، على العكس مستخدم ووردبريس بيبقى عنده قلق من شركة الاستضافة ومن الإضافات اللي بيستخدمها ومن القالب المستخدم، ببساطة أي حاجة من دي ممكن تكون سبب في اختراق موقعك أو إنه يصاب ببرمجيات خبيثة أو غيره، يعني ممكن موقعك يتنسخ بالكامل ويتسرق محتواه من خلال إضافة عادية انت شغال بيها أو قالب مجاني استخدمته.
- مش بس كدة سكريبت الووردبريس ذات نفسه فيه خطر لإنه سكريبت مفتوح المصدر وكل فترة بيتم اكتشاف ثغرات فيه، وبالرغم إن الثغرات دي بيتم إصلاحها بسرعة لكن بيكون حصل أضرار لمستخدمين كتير، كمان كون ووردبريس هي المنصة الأكثر شعبية ده بيخليها عرضه أكتر للبحث عن الثغرات واستغلالها سواءً في الاسكربيت أو في الإضافات والقوالب الخاصة بيها.

5- فهرسة بلوجر

- طبعا في ناس بتقعد تفتي وتقول منصة كذا أرشفتها أسرع وأي هري، مفيش حاجة اسمها المنصة أسرع في الأرشفة، لكن في موقع فهرسته أسرع لأسباب كتير زي شهرة الموقع ومعدل النشر وحالة محرك البحث شغال طبيعي ولا المهندسين 🤓 عمالين يبوظوا فيه وغيرها ، لكن نقطة مهمة إن عناكب البحث بتحب المواقع الخفيفة اللي سهل تتحرك جواها، الميزة دي في كل مواقع بلوجر، ده لأنه لغات المنصة من لغات البرمجة الخفيفة سريعة التنفيذ، سيرفر الموقع مش بيوقع ولا بيحصله بطء، سكريبت بلوجر ذات نفسه أخف من سكريبت ووردبريس.

6- بلوجر ستحذف موقعك في أي وقت

- دي أكتر كذبة منتشرة للأسف عن بلوجر، مش معنى إن موقعك مستضاف بشكل مجاني من جوجل إنها ببساطة تقدر تحذفه بسهولة وبالمزاج في أي وقت، انت لما بتعمل مدونة على المنصة بتلتزم ببنود وشروط الخدمة الخاصة بمنصة بلوجر، التزمت بيها موقعك هيفضل شغال ليوم القيامة، خالفت الشروط موقعك هيتحذف زي ما الفيديو بتاعك على اليوتيوب هيتحذف لو مخالف والبوست على الفيسبوك هيتحذف لو مخالف وأي خدمة مجانية أو غير مجانية ما بتعمل لو المستخدم لم يلتزم بشروط الخدمة.
- من فترة مدونة كن مدون كانت اتحذفت وهي مدونة كانت بدومين مجاني، طبعًا نفس الكذبة قعدت تلف على الجروبات لأن المدونة كانت من المدونات المعروفة لكتير من مستخدمي بلوجر كمان مؤسس المدونة معروف إن أي حاجة في المدونة من شغله يعني مش بيسرق حاجة، طبعًا المدونة رجعت بعد المراجعة وشغالة عادي دلوقتي، نفس الحكاية حصلت قبل كدة مع مدونة عالم العرب ورجعت بعد الحذف، فالحكاية بكل بساطة اشتغل صح وبدون ما تخالف، ومتخافش على موقعك.
- نختم النقطة دي بإن أكبر المدونات العربية خصوصًا في مجال التقنية شغالة على بلوجر طبعًا زي المحترف وحوحو وعالم الكمبيوتر وغيرها كتير، حتى معظم المواقع في مجال تحميل البرامج هتلاقيها بلوجر، كمان أكبر موقع إخباري في مجال أمن المعلومات وأحد أكبر المواقع الإخبارية في العالم وهو موقع The Hacker News شغال على بلوجر.

* دي كانت أبرز المميزات الخاصة بالمنصة، لو حد عنده اعتراض على أي حاجة يوضح وجهة نظره في تعليق، وبأكد تاني البوست مش مقارنة ولا إني بعيب في ووردبريس، لكن البوست لهدم بعض المعتقدات الخاطئة عن بلوجر.

وده كان الرد من احد مختصى السيو عن مناقشة ومقارنة بين بلوجر ووردبريس والرد على كل ما سبق


1. أول نقطة وهي استضافة بلوجر 

 انا طبعًا معاك فيها قلبًا وقالبًا مش هقدر اختلف معاك، مع تحفظي على نقطة SSL وهي انها على اي منصة تانية تركيب سهل عادي جدا بدون أخطاء. وحتى لو نقلت سيرفر مختلف تقدر تركبها بتكتين تلاته برضه.

2. سرعة بلوجر 

 إنت صح وهي إنها اكتر 70% معتمدة على سيرفر الموقع وال 30% الباقيين من الثيم المستخدم أو إضافات الكاش الكلام ده على المنصات المختلفة.

بس تعالى هنا، انت بتقول مميزات لازم تقول قدامها عيوب. لازم تقول برضه إن ثيمات بلوجر بجميع أشكالها وأنواعها مفيهاش 25% حتى من مميزات ثيمات ووردبريس "المجانية" ما بالك لو انت راجل فييس وهتجيب مدفوع! في النهاية شكل الموقع النهائي من الأسباب الأساسية لشهرتك وبناء براند محترم.

مين قالك ان لغات البرمجة الخفيفة مقتصرة على بلوجر؟! يا صديقي إنت حر حرية البطريق سواء عايز يعوم ع المية او تحت المية 😂😂 - إنت حر تستخدم جميع لغات البرمجة اللي خلقها ربنا واللي لسة هيخترعوها على بلوجر - كون ان بتاع الووردبريس معتمد على الشائع دي مش مشكلة المنصة خالص، دي مشكلة واحد مش عارف يستغل السكربت اللي تحت ايده صح.

مين قالك إن السرعة ورفع الصور على سيرفرات مختلفة دي مقتصرة على بلوجر؟! مهو في اختراع إسمه CDN ومجاني عادي جدا من غير ولا مليم من كلاودفلير (أو لو انت فييس برضه عندك أقوى سيرفرات CDN في العالم) وموجودة مجاني كمان بدون كلاوفلير من خلال اضافة Jetpack.

وده رد اخر

طبعًا انا ماعارضتكش في موضوع سرعة بلوجر لانها طبيعي على سيرفرات جوجل.

طب إيه رايك لو استضافنا موقع ووردبريس على سيرفرات جوجل برضه؟ يا ترى في النقطة دي الموضوع متشابه ولا برضه بلوجر أسرع؟

3. نقطة ثيمات بلوجر

 سواء المجانية او المدفوعة انا اتكلمت عنها بالفعل فوق :D.

4. فعلا بلوجر محمية 99% وده طبيعي لان معاكش روت - بس برضه اتكلم عن العيوب


يعني ايه تحكمك في موقعك صفر! من ناحية الحماية انت تقدر تحمي نفسك وكويس جدا بأقل الخطوات، مش شرط حتى يدوي في اضافات كاملة وعالمية بتحميلك موقعك زي الكتاب مابيقول ومنها تقنيات من جوجل نفسها يا صديقي! في هنا نقطة الحماية انا مختلف معاك فيها لأن دي حاجة بإيد الويب ماستر بجانب إن مفيش تكنولوجيا خلقها ربنا آمنه 100%.

كون إن ووردبريس مفتوح المصدر دي ميزة مش عيب لأنها دايما قابلة للتطوير من ناس كتير جدا ومش مقصرة على مهندسين جوجل بس. وافتكر ان اندرويد برضه مفتوح المصدر، و iOS عاملك سجن ومع ذلك بيخترق ويطلع عين امه عادي جدا :D

5. بالنسبة للفهرسة

  كلامك صح جدا وانا معاك ودايما بقوله. شهرة الموقع بجانب نشاطك إنت نفسه اللي بيحدد الموضوع ده بخلاف نوع الصفحة دي ايه ومهما كان اختلاف المنصة.

6. النقطة دي بقى اللي هدبحك فيها 😂😂

إنت جيبت مش عارف كم موقع مشهورين حاليا بلوجر - تحب اجيبلك قايمة مواقع ووردبريس العالمية من الدولاب عندي 😂 - بجانب إن مش اي حد ابتدى وكبر بلوجر سهل ينقل ووردبريس حتى لو هو عايز كده، الريسك ضخم جدا يا صديقي ومش اي حد يقدر يجازف خصوصا لو معروف.

أيوة هقول تاني بلوجر مش بتاعتي! يا سيدي انا عايز اعمل موقع جنسي، موقع سلاح، أي مجال ييجي في دماغي واعمله حالا في اللحظة دي بدون النظر لأدسنس انا هعمل الموقع لمزاجي مثلا. تقدر تعمل كده في بلوجر؟! شوفت الرد بسيط ازاي! في حين إنك في ووردبريس ممكن تتشقلب عادي جدا ومحدش هيكلمك وجوجل غصب عنه ادارته رأسًا لازم يأرشف كل شغلك ويجيبلك زوار لو متميز في مجالك حتى لو افلام ابيحة، وبخلاف كده ترفع عليه قضية وتطلع عين اهله عادي. ولكن اتفاقية استخدام اي منتج من منتجات جوجل هتمنعك من كده اصلا!

الموضوع أعمق من مجرد حذف، الموضوع حرية واني اشتغل في موقعي مش عند غيري وايدي على قلبي طول الوقت لو حبيت اجازف في مجالٍ ما جوجل مايقتنعش لأن انا بلوجر!

وفي النهاية، بلوجر مهما كانت موجهه اساسا للمدونين الشخصيين "الغير ربحيين" - هي مدونة بالمعنى الحرفي - ولا تقدر تعمل منها موقع بيع - موقع بيتعامل مع كروت الإئتمان - موقع بيأدي أي خدمات من أي نوع لأن للأسف إنت هنا كبيرك الكتابة، ولو عايز حاجة تانية لا بلوجر مش بتاعتك :D

ويبقى اخيرآ الرد لد انت اخى واختى الكريمة!!. الموضوع منقول للأمانة والافادة

شارك المقال

هناك تعليق واحد

تعريب كن مدون جميع الحقوق محفوظة لــ مدونة عرباوى 2013-2019 ©