9 يوليو 2020

سيرفرات ال iptv معظمها خدعه والضحيه المشترك

سيرفرات ال iptv معظمها خدعه والضحيه المشترك

 من اكثر المزايا اللتي تضاف الي اجهزة الاستقبال "الرسيفر" هي خاصية iptv اي بي تيفي واللتي يتنافس مستوردي الاجهزة في اضافة اقوها الي اجهزتهم، وفي هذه التدوينة يشاركنا احمد عز العالمي تقرير مختصر عن تلك السيرفرات المدمج بأجهزة الاستقبال الرسيفر.

سيرفرات ال iptv معظمها خدعه والضحيه المشترك 👌

بقالي حوالي اسبوعين او اكتر بجرب كم سيرفر موجدين علي الساحه جديد اكستريم مش كود علي جهاز او خلافه
طبعا من الكلام عليهم انها سيرفرات فشيخه وحاجه كده ولا في الاحلام وطبعا بكلامهم بيعرفوا يجيب الزبون يضحك عليك بعدد قنوات ويقولك ٥٠٠٠ قناه واللي يقولك بيشغل باقه bein sport full hd علي سرعه 5 ميجا وحاجات كده غريبه
المهم طبعا انك علشان تجرب سيرفر وتقدر تقيمه بتحاول تجيب مباره مهمه وطبعا بعد موضوع الكورونا الدنيا قلت في نسبه المشاهده بس قولت مش مشكله نشوف برضه ونجرب
طبعا اكتر مباريات مهمه وبيكون عليها ضغط هي مباريات ليفربول
وقولت نبدء نجرب السيرفرات وكان البدايه يوم ماتش ليفربول وكريستال بالاس يوم 24 الماضي وعملت هوت سبوت من الفون والسرعه كانت حوالي 30 ميجا الي 38 وللاسف في الشوط الاول اول قطع حوالي 5 مرات
في الشوط التاني جربت سيرفر غيره وللاسف في اقل من ربع ساعه كنت لاغيته بسبب التقطيع
.
مردتش برضه اظلم السيرفرات ونزلت برنامج علي الفون بيشغل الاكستريم وقولت اجرب الماتش اللي بعده ليفربول والسيتي لانه مهم وكل الناس هتابعه وقبل اي حاجه طبعا ظبط النت والشبكه ال 4g والنت صاروخ وللاسف ٤ سيرفرات او 5 تقطيع رهيب لدرجه اني زهقت والله
واخر تجربه ليا امس في مباره ليفربول وبرايتون وللاسف برضه تقطيع ممل لدرجه اني سالت نفسي امال في مباريات دوري ابطال افريقيا السيرفرات دي هتعمل ايه
هتسالني وتقولي مايمكن العيب عندك هقولك لما بحط سيرفرات iptv معينه بشتغل زي الفل . بس انا بحب اجرب علشان اقدر اقيم السيرفر ومبعرفش اخد برأي حد خصوصا المستوردين واصحاب سيرفرات ال iptv  لان مفيش حد هيفيدك وهيطلع العيب عندك
الغريبه اني كنت بتفرج علي اقل جوده علي الفون لان كل الجودات كانت بتقطع حتي اقل جوده والله كانت بتقطع تخيل والسرعه عاليه جدا
انا مينفعش اقول اسماء سيرفرات علشان محدش يقؤلك حرام تقطع عيش حد والافلام دي وفي نفس الوقت لو ذكرت اسم سيرفر محترم هيقؤلك احمد بيعمل دعايه
انا والله باعد عن السكه دي خالص والمحترم بقول عليه محترم وشغله كويس حتي لو معرفهوش
الخلاصه لما تدخل جوا مطبخ السات هتعرف ان معظم سيرفرات ال iptv اساسها مصدر واحد وكل واحد بيتعمله مصادر ليه .
الهدف من البوست انك اوعي تجري وراه وهم لما تجيب سيرفر iptv هات سيرفر قوي ومحترم ومتفرحش بعدد القنوات ولا تفرح انه رخيص لانك في الاخر مش هتستفاد منه وهترمي السيرفر وفلوسك راحت عليك

ليلتكم فل ⁦❤️⁩ احمد عز ⁦❤️⁩

ليست هناك تعليقات

تعريب كن مدون جميع الحقوق محفوظة لــ مدونة عرباوى 2013-2020 ©