بالتأكيد سمعت عن متصفح ثور، وهو متصفح منافس بقوة لمتصفحات فايرفوكس وكروم واوبرا وغيرها من المتصفحات الشهيرة لكن
بالرغم من إنه أقوى متصفح من حيث الأمان والحماية إلا إنه اكتسب سمعة سيئة خصوصا في الوطن العربي بشكل خاطئ تماما، عشان كدة سنتكلم شوية عن حكاية متصفح تور.
ما هو متصفح تور؟
بداية TOR كانت عبارة عن مشروع للبحرية الأمريكية بهدف توفير شبكة آمنة ومشفرة للتواصل، ولكن بعد كدة في عام 2002 تم طرح الكود المصدري للمشروع علنا وأصبحت تقنية تور مفتوحة المصدر يقدر أي حد يستخدمها.
حاليا شبكة تور بيتم إدارتها من قبل مؤسسة غير هادفة للربح، بالإضافة إلى آلاف المتطوعين من حول العالم اللي بيستضيفوا الأجهزة اللي بتكوّن الشبكة، بالإضافة لمطوري متصفح تور وغيرهم.
ازاي تور بيشتغل
في البداية كلمة TOR هي اختصار لمصطلح The Onion Routing أو التوجيه البصلي، وسنعرف فيما بعد ليه تم استخدام نبات البصل تحديدا كنوع من أنواع التشبيه.
في البداية لما تبدأ تتصل بالإنترنت بيتم تكوين ما يُعرف بـدائرة تور Tor Circuit، ودي عبارة عن مجموعة أجهزة كمبيوتر أو خوادم موجودة في دول مختلفة حول العالم، اتصالك بيمر عبر الأجهزة دي قبل ما يوصل للموقع اللي عايز تدخله أو العكس، ده عشان اتصالك يكون شبه مستحيل تتبعه. الأجهزة دي بيتم اختيارها عشوائيا وعددها بيكون على الأقل 3.
- من خلال تور بتبدأ عملية تشفير للبيانات الخاصة بيك زي عنوانك IP والوجهة أو الموقع اللي انت عايز تدخله وهكذا، البيانات دي بيتم تشفيرها كأجزاء أو طبقات، وفي كل مرحلة ما من مراحل الاتصال بيتم فك تشفير طبقة معينة عشان الاتصال يوصل للوجهة بتاعته.
عُقدة الدخول Entry Node
أول حاجة عندنا عقدة أو مُرحل الدخول، وفي النقطة دي بيتم فك طبقة تشفير من البيانات وهي معلومات المتصل نفسه، وبالتالي المُرحل ده بيكون عارف انت مين يعني عارف الآي بي بتاعك وعارف عنوان المُرحل التالي بس. دي المعلومات اللي بيكون عارفها، لكن مش بيكون عارف حاجة تانية زي الموقع اللي عايز تدخله مثلا.
العُقدة الوسطى Middle Node
لما الاتصال بيوصل للنقطة دي بيتم فك طبقة تشفير جديدة وبيكون فيها معلومات المُرحل السابق والمُرحل التالي بس. مش بيكون فيها أي معلومات عنك.
عقدة الخروج Exit Node
أخيرا لما الاتصال يوصل لمُرحل الخروج بيتم فك تشفير آخر طبقة من الطبقات المشفرة واللي بيكون فيها الموقع اللي المستخدم عايز يدخله بدون وجود أي معلومات عن المستخدم نفسه.
* يبقى احنا عندنا مُرحل عارف انت مين بس ميعرفش انت عايز تروح فين، ومُرحل ميعرفش أي معلومات عنك، وآخر مُرحل بيكون عارف إن فيه شخص عايز يدخل للموقع الفلاني.. لكن ميعرفش مين الشخص ده. عظمة صح !
* ومن هنا كان الشبه مع نبات البصل بحيث إنك بتشيل طبقة عشان توصل للطبقة التالية وهكذا.
هيتم اختراقك لما تستخدم متصفح تور
طبعا دي تحنيكة بشوفها في كل حتة عشان متصفح تور يعتبر بوابة الدخول للديب ويب، لكن الكلام ده غلط تماما. متصفح تور زي زيه أي متصفح تاني تقدر تستخدمه في الدخول للنت، لكنه بيوفر لك حماية وتشفير لاتصالك أقوى حتى من الـVPN، بل وبيوفر أدوات حماية أقوى من أي متصفح تاني نظرا لأنه بيستخدم للدخول لمواقع غير عادية، لكن في النهاية سلوكك ووعيك التقني هو اللي بيجعلك تكون أو لا تكون عرضة للاختراق على تور أو على غير تور.
▪ تور ليه بعض السلبيات زي إن الاتصال ممكن يكون بطيء أحيانا بسبب عمليات التشفير وفك التشفير وتمرير الاتصال بين أجهزة في أماكن مختلفة في العالم، كمان المواقع مش بتحبه لأنه بيخفي معلومات المتصل ودي بيضرها شوية، وبرضه عشان اتصالات تور بيستخدمها الهاكرز في أوقات كتير في عمليات الهاكينج عشان يحموا نفسهم من التتبع.
▪ دي كانت نبذة مختصرة عن TOR مقدمة من المهندس/ محمود الغضبان