لما حد مبتدىء يسال السؤال دة بيكون محتاج يستكشف طريقة نحو البدء فى انشاء مشروع ياكل منه عيش ويحقق دخل دائم ومستمر على الانترنت وهذا امر مشروع وواقعى
لكن اللى بيضايق اوى فى الموضوع ده ان الاجابه عنه تسترعى انتباه النصابين والنصابين الطامعين الذين يتسابقون لقنص اكبر استفادة منه
- النصاب: علشان تكون متميز اشتغل على وورد بريس
- الضحية: لكن انا معرفش حاجه عن شغل وورد بريس
- النصاب: انا هعملك كل حاجه متقلقش
- الضحيه: طب علمنى اشتغل عليه ازاى او فهمنى الدنيا هتبقى ايه
- النصاب: ولا تشيل هم خالص انت هتدفع بس ثمن الاستضافه والدومين والقالب وهتركب الصاروخ
- الضحية: خلاص ماشى هدفع هدفع هدفع
- النصاب: اتفضل يا سيدى الموقع جاهز للشغل اهو وكله تمام
بعد شهرين من الشغل
- الضحية: لو سمحت بشتغل ومفيش نتائج
- النصاب: ادفع علشان افحص لك الموقع
- الضحيه: حاضر هدفع
بعد شهر كمان
- الضحية: لو سمحت الموقع سرعته بطيئة اوى
- النصاب: ادفع علشان اساعدك فى السرعه
- الضحية: حاضر هدفع
بعد مرور سنه
- الضحيه: حان وقت تجديد الاستضافه والدومين ومفيش نتائج
- النصاب: ادفع علشان نجدد ونشتغل بجد وتبقى متميز
- الضحية: حاضر هدفع
بعد مرور 15 شهر
- الضحيه: الموقع اصبح فيه 120 مقاله بس النتائج زى الزفت
- النصاب: ادفع علشان نشوف متخصص سيو اللى هيخليك متميز
- الضحيه: حاضر هدفع
بعد مرور 18 شهر
- الضحية: لو سمحت الموقع اتهكر وكان هيتسرق
- النصاب: ادفع علشان نشوف مبرمج شاطر يظبط الحمايه وتبقى متميز
- الضحيه: حاضر هدفع
بعد مرور سنتين
- الضحيه: لو سمحت الارباح ضعيفه جدا وجالى احباط
- النصاب: ادفع علشان نشوف حل لمشكله الارباح وتبقى متميز
- الضحية: حاضر هدفع هدفع هدفع ويارب ابقى متميز بقا
بعد مرور سنتين ونصف
الضحيه: لو سمحت انا فلست وحالى بقى يصعب على حالى شوفلى بيعه للموقع
- النصاب: ادفع علشان تعمل باك لينك لرفع الاثورتى وتجيب للموقع اعلى سعر ويبقى متميز
- الضحيه حاضر هدفع
بعد فتره الضحيه طلع من هدومه وصرخ الجمله الشهيره ( ملعون ابو التميز ) ده انا بقيت شغال عبد عندك يعم فين التميز ده
الخلاصه: اوعى ترمى نفسك فى حضن النصاب بحثا عن التميز الوهمى
اتعلم وافهم واشتغل بنفسك مع نفسك والانترنت مليان شروحات كتيرة تخليك اعظم خبير فى مجالك وساعتها هتعرف بنفسك ان مفيش فرق بين المنصات وان تميزك هيكون بتحصيلك للعلم والمثابرة
ممكن تتعلم بنفسك الوورد بريس فى شهرين اذا خلصت نواياك
وممكن تتعلم بلوجر فى شهر واحد اذا خلصت نواياك
التعلم ليس حكرا على احد وانت لست ضحية لاحد وتميزك نابع من مجهودك انت فقط وليس من مجهود منصه التدوين فلا تجعل احدا يستعبدك بدعوى التميز - التميز يكمن داخلك انت
بقلم / مصطفي المصري