من سنة ونص بس هواوي لمدة قصيرة اخدت المركز الاول عالميا من Samsung في عدد شحنات او عدد مبيعات الموبايلات " Global Smartphone shipment"
لكن حاليا هواوي مش في المرتبة التانية , ولا التالتة , هواوي حتى موصلتش للمركز الخامس اصلا !
تعرف مين المركز الخامس ؟ فيفو ! فيفو عدت هواوي في المبيعات !
و كمان في اوروبا حصة مبيعات هواوي بقت 2% بس من السوق بينما من سنة ونص كانت بتنافس على المركز الاول , وعشان تعرف قد ايه ده قليل الحصة دي نفس حصة Realme و شاومي حصتها 18% !
حتى في الصين حصة مبيعات اجهزة هواوي بقت 15% فقط , بينما قبل الحظر كانت وصلت ل40% !
الحظر بتاع امريكا على هواوي بدأ يجني ثماره , لأن زي ما بفكركم المشكلة مش ان هواوي اتحجبت من خدمات جوجل وبس , لو دي كانت بس المشكلة مكناش شفنا تراجع ليها في السوق الصيني الي معندوش اصلا خدمات جوجل
المشكلة الحقيقية ان هواوي محجوبة حتى من صناعة البروسيسور بتاعها في مصانع tsmc الي العالم كله يعتبر معتمد عليها و مفيش اي مصنع تاني في الصين يقدر يتقارن بيها
كنتيجة لده , هواوي في اخر سنة كانت بتعتمد على الاوردرات بتاعتها السابقة من tsmc بمعنى اصح مخزون البروسيسور الي عند هواوي
و واضح انه فعليا بدأ يخلص
هواوي بتنهار بكل معنى الكلمة و حتنتهي لو ملقتش بديل لTsmc
و طبعا هواوي متقدرش تشتري بروسيسور من سناب دراجون لانها شركة امريكية و متقدرش تشتري حتى من ميديا تك لان ميديا تك بتصنع عند Tsmc !
المخرج الوحيد لهواوي حاليا هي ان الحظر عليها يتشال
او انها تقسم الشركة بتاعتها و تخلي قطاع الهواتف قطاع منفصل عشان لما يقع ميخدش الشركة كلها معاه ,و بكده حتى ممكن تنقذه نوعا ما و تبيع القطاع و البراند لشركة تانية
و على فكرة , في كلام ان براند Honor بيحصل فيه كده حاليا و احنا بنكلم و في كلام عن مشتريين للبراند ده
فاحنا فعليا ممكن خلال السنة الجاية نشوف موبايلات تحت اسم Honor ملهاش اي علاقة بهواوي !
الموضوع مؤسف جدا , لان حتى لو انت مبتحبش اجهزة هواوي
مفيش اي مجال للشك ان هواوي كانت من الشركات الي بتزود المنافسة و بتخلي المنافسين يقدموا افضل ما عندهم و كل ما المنافسة بتزيد ده في الاخر لصالح المستهلك
شاركوني في رأيكم بالكومنتات
هل شايفين ان تحت ادارة Biden الجديدة , ممكن هواوي يتشال من عليها الحظر ؟ ولا دي النهاية ؟!
Credits : Mohamed Salah & Tech Comics