من فترة حوالي اسبوعين انتشر خبر ان فيفو نزلت ميزة في السوفت وير بتاعها في بعض الموبايلات وهي عبارة عن انك بتزود الرام 3 جيجابايت عن طريق مساحة التخزين الداخلية، دلوقتي بقي فيه اخبار وتسريبات بتقول ان في الكود بتاع Miui 12 لقوا حاجة شبه كده بس المرة دي 1 جيجا مش 3، والحقيقة انا سمعت اراء مختلفة عن الحوار سواء كانت صح او غلط
بس هو ايه الحوار ده اصلاً؟ وازاي حصل وليه؟ تعالي اقولك.
عشان اشرحلك ايه الموضوع ده اصلاً محتاجين نفهم ايه الرام دي ووظيفتها ايه، الرام بكل بساطة وظيفتها انها تحتفظ بالبيانات اللي المعالج محتاج يستخدمها في وقت قريب، بتفتح برنامج مثلاً بيقوم يتخزن في الرام عشان المعالج يقدر يوصله، بتفتح صورة في برنامج ايديت بتقوم الصورة دي تتحمل في الرام عشان البرنامج يشتغل عليها.
طب ليه محتاجين الرام ؟ ليه ماناخدش الحاجات دي من مساحة تخزين الموبايل علطول ؟
السبب الأساسي هو السرعة، متوسط سرعة الرام بمقاييس سرعة مساحات التخزين بيكون في حدود 19 الف ميجابايت في الثانية لرام بتردد 2400 ميجاهرتز ! انت متخيل؟ يعني انت في الثانية الواحدة هتقدر تقري محتوي رام موبايلك مرتين تلاتة كده - theoretically.
طبعاً الأرقام دي بعيدة كل البعد عن اسرع flash storage احنا وصلنالها حالياً، ما بالك بقي باللي موجودة في الموبايلات ؟
تعالي بقي اشرحلك فكرة انك "تحمل" رام دي جات منين
زمان في عصر الـDDR2 كانت سرعات الرام مش كبيرة الحقيقة، هي اه مكانتش قريبة للـstorage برضو بس كان الفرق اصغر من دلوقتي، عشان يستغلوا الموضوع ده عملوا حاجة اسمها Swap memory، البتاعه دي فكرتها انك لما تخزن كذا برنامج في الرام، بيبقي فيه بعضهم البروسيسور ماقرأش بياناتهم بقاله فترة طويلة حبتين، في الوضع الطبيعي لما يحصل كده وتقوم الرام تتملي.. بييجي نظام التشغيل ويقوم قايل للبرنامج ده اتفضل من هنا عشان عاوزين مكان فاضي في الرام لبرامج غيرك
في حالة الـSwap بقي هيحصل ايه؟
في الحالة دي بدل ما البرنامج يتمسح خالص من الرام، هيتاخد زي ماهو كده ويتنقل علي جزء محدد من مساحة التخزين في الجهاز ده بشكله زي ماهو ومكانه في الرام هيفضي، ولما البروسيسور يحتاجه بقي هيقوم يرجع تاني عشان يتعمل عليه عمليات مختلفة
طيب ما الدنيا حلوة اهو وزي الفل ! امال ايه المشكلة بقي؟ هقولك
المشكلة هنا ان انت دمرت خالص الهدف الأساسي للرام، وهو السرعة.. لما تستخدم الـswap في داتا حجمها كبير حبتين هتلاقي ان الدنيا باظت خالص، الجهاز محتاج يرجع بيانات كتيرة جداً للرام تاني عشان بعدها يبدأ البروسيسور يعالجها براحته، اللي هو احنا رجعنا لنقطة الصفر - تقريباً -
الموضوع كمان بيزداد سوء علي الموبايلات لإن سرعات مساحات تخزين الموبايلات محدودة حبتين اكتر من الـPCs، يعني لو خدت ك مثال اسرع نوع تخزين موجود حالياً في موبايل اندرويد وهي UFS 3.1، سرعات القراءة هنا بتوصل لـ2000 ميجا ف الثانية والكتابة لـ1200 ميجا في الثانية، وبالرغم من انها ارقام مبهرة الا انها بعيدة كل البعد عن سرعات الرامات نفسها
وخلي بالك اننا هنا اخدنا اعلي نوع موجود، لكن لو خدنا المنتشر في الفئة المتوسطة وهو UFS 2.1 هتلاقي ان السرعات بتكون في حدود 400-500 ميجا في الثانية واللي هو اسوأ كمان للسيناريو ده
طب يعني ايه كده ؟ الميزة خلاص بايظة من قبل ما تنزل ؟ الحقيقة لأ
انا مش عارف بالظبط ايه الـimplementation بتاع الميزة دي في فيفو وشاومي لكن لو كان ذكي بشكل كافي وبيعرف ايه البيانات اللي يحطها في الـswap memory وايه البيانات اللي يسيبها، وقتها " ممكن " نحس ان الميزة دي ليها فايدة
لكن مهما كانت ليها فايدة عمرها ما هتقدم نتيجة مبهرة زي ابهار جملة "حمل رام زيادة" دي :"D
ايه رأيك انت بقي في الميزة ؟ شايف انها فكرة كويسة ولا ملهاش لازمة اصلاً؟
المصادر:
- UFS 3.1 vs UFS 3.0 Comparison: What’s New and Different?:
- Memory speeds and compatability:
- What is swap memory?:
- What does the MHz of RAM really mean?: