كل يوم يمر يذيد الاعتماد علي الذكاء الصناعي خاصة بعد التطور في تعلم الالة المذهل في مجال دراسة السلوك الانساني، ولكن قد يكون لهذا التطور بعض العيوب التي قد تضر الانسان في كيفية تقييم البشر حسب قواعد الذكاء الاصطناعي، وفي هذا المقال بعض الخواطر حول الذكاء الإصطناعي وتقييم البشر.
لو حضرتك صاحب عمل وفيه شخص اتقدم لشغل وظيفة عندك .. أول حاجة هتعملها هي أنك هتقعد تتكلم معاه عشان تقيمه وتشوف هل هو مناسب للوظيفة المتاحة عندك أو لا.
وكذلك برضه البنات لو حد اتقدم لحضرتك أول حاجة بتعمليها هي أنك بتقعدي معاه عشان تقدري تقيميه وتشوفيه مناسب أم لا.
لكن ورغم كل دا إلا إننا أحياناً كثيرة بنفشل في تقييم البشر وبننخدع فيهم.. ودا ظهر جداً في الخلافات الأسرية المنتشرة..
هتلاقوا العامل المشترك بينهم جميعاً وأكثر جملة بيرددوها هي الخطأ في التقييم منذ البداية.. حتى في حالات العنف الأسري اللي شفناها خلال الفترة الآخيرة على السوشيال ميديا .. هتلاقوا أهل الزوجة بيردوا جملة إنه "مكنش يبان عليه".
هام:
ولأن الخطأ في التقييم بيترتب عليه خطأ في الإختيار وبالتبعية بيؤدي لنتائج كارثية مستقبلية.
حابب أطرح على حضراتكم التساؤل دا وهو ماذا لو تم الاعتماد على الذكاء الإصطناعي في تقييم البشر!؟
وهل من الممكن أن يتفوق الذكاء الإصطناعي على الذكاء البشري في تقييم البشر!؟
تعالوا أحكيلكم الحكاية بالتفصيل عشان نفهم الموضوع دا ايه بالظبط!!
قد يهمك: الفرق بين الذكاء الاصطناعي AI والذكاء العام الاصطناعي AGI
بص ياسيدي
طبعاً زي ما أنت عارف وشايف إن الذكاء الإصطناعي أصبح متوغل في كل حياتنا تقريباً وفي كل المجالات.
واحدة بقى من أشهر تقنيات الذكاء الإصطناعي وأكثرها شيوعاً في الاستخدام هي تقنية التعلم الآلي Machine Learning.
التقنية دي غير قدرتها في تحليل كم كبير جداً من البيانات والاستفادة والتعلم من نتائج هذا التحليل إلا أنها كمان متفوقة جداً في التصنيف Classification ودا بيعتبر من أهم سماتها واللى خلى العديد من الشركات تعتمد عليها اعتماد رئيسي في نشاطها.
زي شركة فيس بوك واللي بتستخدمها في تصنيف المستخدمين بتوعها عشان تقدر تستهدفهم بالإعلانات المناسبة لهم.
كمان فيه أنظمة ذكية ظهرت بتعتمد اعتماد كبير عليها، زي الكاميرات الذكية اللي بتقدر ترصد المجرمين قبل وقوع الجريمة من خلال تحليل سلوكياتهم داخل الأماكن العامة وفي حالة وجود حركة غير طبيعية بتنبه القائمين عليها بوجود شخص مشتبه به.. ونفس الأمر بيتم استخدامه في رصد حالات كورونا وتقريبا كلنا شفنا الكاميرات والروبوتات الذكية اللي بتقدر ترصد أي حالة مشتبه في إصابتها بكورونا من خلال رصد وجود بعض الأعراض عليها.
المهم نرجع لتساؤلنا وهو هل من الممكن أن يتم الاعتماد على الذكاء الإصطناعي في تقييم البشر!! .. يعني تخيل كده معايا حضرتك رايح تعمل انترفيو في شركة قدام ذكاء إصطناعي AI هيحلل ردود أفعالك ويقيم لغة جسدك ويقدر يقدم تقرير مفصل عن نمط شخصيتك !!
متخيل الموقف!!
طب خليني أفاجئك أكتر وأقولك إن اللي قولته دا موجود بالفعل تخيل!!
في أكثر من شركة بريطانية بتعتمد على الذكاء الإصطناعي في تقييم المتقدمين لشغل وظائف فيها زي شركة Unilever واللي قالت أنها بتطلب من أي حد مقدم على وظيفة عندها أنه يسجل لنفسه فيديو مصور بيحاوب فيه على بعض الأسئلة، وبيتم استخدام الذكاء الإصطناعي في تحليل الفيديوهات واللي بيقدر من خلالها يحلل اللغة ونبرة الصوت وتعبيرات الوجه أثناء إجابتهم على الأسئلة.
والشركة بتقول إن الذكاء الإصطناعي مش بس عنده قدره في فحص المئات من الفيديوهات في وقت قياسي لكن كمان ساعدهم جداً في اختيار الانسب للوظائف.
وبرضه نرجع للتساؤل بتاعنا وهو هل من الممكن أن يتفوق الذكاء الإصطناعي على الذكاء البشري في تقييم البشر!؟
يعني تخيل كده حضرتك في حد متقدم للزواج من بنتك هل شايف إن الذكاء الإصطناعي ممكن يقيمه أفضل منك!؟
هل من الممكن يكون الذكاء الإصطناعي حل لسوء تقييمنا واختياراتنا!!؟
ولكن يبقي السؤال: هل يمكن تطبيق نظرية AI Apocalypse: هل يهدد الذكاء الاصطناعي حياة البشر؟
BY: م/ Mustafa Gamal