نصيحة لكل مبتدي في عالم البرمجة

الاساسيات هي ٩٠℅ من نجاحك في المجال ده. انك تفهم العلماء عملوا ازاي الحاسب الالي والرامات بتشتغل ازاي. الكلام الي انت بتقول عليه نظري ده هايخليك محترف.

 

 

مينفعش تفتح بطن المريض علي طول من اول سنة في طب . لازم تفهم الاول التشريح و١٠٠٠ حاجة ملهاش علاقة بتخصصك بس هي مهمة جدا لانها تفاصيل صغيرة هاتغير حياتك وهاتحافظ علي حياة المريض...

فمهما كان مجالك وهدفك ك فرونت او باك ايند او سيكيورتي او حتي خياط برامج بالقطعة.. كل ده انك تعرف الاساسيات هاتبقي محترف في اي مجال فيهم 

عقلك هايتخيل اشياء وانت بتكتب الكود الي مدرسش الاساسيات ( صنيعي الكود) ميعرفش انها موجودة اساسا..

انصح كل واحد بيقول البداية فين بانه يذاكر CS50 النسخة الاصلية بتاعت هارفارد الانجليزية 

المقدم david وهو بيشرح وبيغلط وتفاصيل وجهه وهوه بيعبر عن الاكواد والامور دي  محدش يقدر يترجمها.. 

هارفارد الي تخرج منها ناس عمالقة في مجال الحاسب
بالتاكيد المقدمة دي لعلوم الحاسب هاتخليك تعرف اين تطرق بالمطرقة 

وهاتبعد عن احجية انك تذاكر ده شوية وتشوف المصدر ده شوية وبعدين تجري تغير وتشوف ده وده 

كثرة المصادر والاغراق المعلوماتي كارثة تنتج جيل لا يفقه اي شيء في اي شيء الا لو معاه دليل 

مفيش حاجة اسمها بتعلم لوحدي دي افتكاسة بتدل علي الفشل 

مفيش حاجة اسمها انا بذاكر بقالي ١٠ سنين ومعملتش مليم من شغلك او غيرت تفكير البشر او خليت حياةالبشر اسهل 

انت كنت بتتصرمح بقالك ١٠ سنين  . غيرك في سنة بيكسب فلوس من البرمجة وده العااااادي. انت بس الي مش عادي وفاكر انها صعبة وطول عمرك بتدور عالبداية
...

دليلك القوي دلوقتي CS50  من مصدره الاصلي 

وبعدين هاتعرف تعمل ايه لان عقلك معاه كل اساسيات المعرفة
هاتعرف اي مجال وهاتعرف تذاكر ايه بعد ايه وهاتعرف ( تفهم) مش تحفظ بس  الكورسات الي بقي الواحد منها بجنيه من كثرتها 

... بطل لعب وقوم ذاكر 

كل اسبوع ساعتين ونص الي خمس ساعات . انت مش اذكي من بيل جيتس  ولا عقلك عقل اديسون. انت لسه مبتديء مينفعش تكبس عقلك وتحقنه معلومات انت اصلا مش فاهم نصها وبتعدي النص الثاني فهلوة 

بس ساعتين ونص الي ٥ ساعات  تنصت  فعلا وتدون وتكتب الي مش فاهمه والي فاهمه.. وفي خلال الاسبوع لازم تكون فاهم وحافظ كل الي اتقال ومتخيله ومغير فيه ومعدل عليه كمان...وبعد ما تخلص كل ده. ابدا بقي رحلتك في اي مجال وانت هاتكون عارف انت عايز ايه.

 

 هتلاقي ملخص الكورس هنا باللغة العربية للبشمهندسه رشا عابدين:https://drive.google.com/.../1cCBC...

 

ده باللغة العربية للبشمهندس عبد الرحمن جمال:https://www.youtube.com/watch?v=pSc6RGEBLAQ

 

المصدر: مليون مبرمج مصري 

 

تعديل المقال