هل موقع Star Like نصاب ام صادق؟

حقيقة موقع STarlike.tv

في الأيام الأخيرة صارت ضجة كبيرة على موقع يدعى اسم (Star Like) الحق جربت الموقع منذ صدوره وعرفته غير صحيح نفسه نفس المواقع التانية الي بعد ما تجمع عدد كبير من الأشخاص في يوم وليلة تلقاء الموقع اختفاء والفلوس متاعك يفتحلك ربي فيهم وياخدوا سوك قررت ندير منشور بسيط لأنه موضوع الحق واخد رواج كبير في كل دول العربية وخاصتاً ليبيا. 

 موقع Star Like


هتلقاء الفيديوات على يوتيوب وتويتر وتيك توك وحتى فيسبوك كل الفيديوات هذي تشجعك على الدخول في هذي المعمعا بذات تشوف في الرباطي الخضر وهوا يعد فيهم وتلقاء أشخاص ليبين يقولك هما أرباح من موقع Star Like وفي نهاية الفيديوا يقولك هي خش لي الرابط الي في التعليقات وسجل في موقع وابداء رحالتك في الثراء !


للأسف كل هذا نصب في نصب وكل ما في موضوع كل الفيديوات هذي يتم نشرها لغرض التسجيل من الرابط الي تم إعطاءه لي هذا الشخص من قبل الموقع يعني لمل تسجل في الموقع تقدر ادير نسخ لي رابط الموقع من داخل حسابك في الموقع وفي نهاية الرابط هتلقاء رقم يتكون من 6 او 8 أرقام هما الأرقام مرتبطات بحسابك على الموقع يعني كأنه الـ ID متاعك في الموقع بحيث اي شخص يسجل من خلال هذا الرابط الخاص بيك تاخد عمولة لانه حضرتك خليت حد يسجل والموقع ضمن ضحية جديدة والعجلة ادور، هذا الغرض من مقاطع الفيديوا تزيد ثقة وحماس المشاهدة ويخش يسجل ونفس الشيء يصير والدائرة تتسع والنصب يتكاثر. 


خلي نتفاهموا على بعض الخطوات الي لزم تحطها في اعتبارك هذا لو بتبداء فعلياً في الربح من إحدى المواقع الي تعطيك مهام او غيره الي بنسبة لي شخصياً غير مقتنع بيهم، أفضل ليك ادخل لي مواقع تقدر تربح منهم ربح حقيقي مقابل إنك تقدم خدمة ما نفس موقع (خمسات) ابحث بنفسك على المواقع وهتفهم موضوعه لأنه يحتاج منشور طويل خاص بيه.


نرجعوا لي بعض الخطوات الي لزم تتوفر في الموقع على خاطر ميتمش النصب عليك اول شيء لزم تعرف الشركة او المؤسسة المسؤولة عن هذا الموقع من هي ومن اي دولة و وين مكانهم على أرض الواقع وعلى اي أساس تقدم في الخدمة هذي كل هذي علامات استفهام متواجدة في موقع Star Like


حتى جودة الموقع ليها دور في خلق الثقة الي تخليك تجازف بأموالك يعني لو بتدخل موقع Star Like هتلقاء الموقع غير متناسق بألوان غير متناسقة وكأنه تم انشاء الموقع بواسطة قالب جاهز تم تحميله من الإنترنت يعني موقع بيخلك نفس إيلون ماسك مش قادر يصمم قالب وموقع بشكل احترافي وتقدر تقول عليه موقع مش تحس روحك خاش لي منتدى كوكب زمردة اللوان عديدة وغير متناسقة مما يُعطى إيحاء انه موقع مزيف ومخادع طبعاً كل شي في نقطة جمال الموقع هيعرفوا مصممين المواقع المحترفين على شن نتكلم.

 


تانياً او ثالثاً في شي اسمه تحليل الموقع ومعرفة مكانه وتقييمه وايضاً المدة التي تم حجز الأستضافة الخاصة بالموقع كل هذه المؤشرات ان كانت غير واضحة فأعلم انه موقع وهمي كل هذه المعلومات موجودة في موقع Star Like بشكل غير دقيقي وغير واضح تقييم الموقع لا يتجاوز 25% ومكان الموقع غير معروف و الأستضافة تم شراؤها وحجزها لمدة سنة فقط كل هذا يذل على انه اساسيات الموقع التي يجب على الزبون معرفتها غير متواجدة فما بالك ان كان الموقع يحتوى على دفع أموال يجب توفير معلومات تضمن حقي هذا لو صح منبداء في الموقع وندفع ليه.


حتى ولو الموقع يوفر ليك باقة او مهام مجانية متقدرش تسحب اي شي من الأموال الا بعد اشتراك في باقة يسموها هما بـ VIP 1 سعرها 100 دولار يعني هيا هيا مفيش اي اختلاف. 


الموقع هذا نفس مواقع ظهرت لينا في السنوات الي فاتوا وبعد ما تم تجميع رقم كبير من الناس الي دفعت تم اغلاق المواقع وتم النصب على الناس الي اشتركت ومفيش حد ضربك على ايدك وقالك ادفعلي وربي يعوضك يعني زي موقع White Sands الي انتشر في مصر اكثر شي وموقع Eg vision2030 كل هذه المواقع مهمتها النصب على الناس بحجة انه يضمن ليك الثراء و موقع Star Like ماشي على نفس النهج و الطريقة.


وفرلي شيء يضمن حقي واسم شركة و مكانك باش لو قررت تلعب نقدر نقاضيك وناخد مستحقاتي لكن تفتحلي موقع مليشي حتى شهرين وتقولي نبي 100 دولار كيف جت هذي ..


الزبدة مع كل هذي التجارب الي نمروا بيها من نصب على الواقع مش الى المواقع بونتو لو نصب عليك موقع كيف هذا .. 


- محمود حسين
- ‏مدون تقني

تعليقات
ليست هناك تعليقات
إرسال تعليق