ايه هو البلوكتشين و ازاي ممكن يحميك؟

تقنية البلوك تشين احد اهم التقنيات المستحدثة في العالم المالي والمعاملات بشكل عام والمقال ده فيه 6 مشاكل في الحياة الطبيعية و ازاي تم حلها بالبلوك تشين و للعلم ال 6 مشاكل دول هم اللي نقدر نقول بسببهم ظهر البلوكتشين.

ماهي الاسباب التي ساهمت في انشاء البلوك تشين blockchain؟

خلينا نذكر الاسباب ولكن في شكل قصة بسيطة لإيصال المعلومة بشكل مبسط، وهنا بطل قصتنا النهاردة هو شخص اسمه عادل (مع كامل احترامي لاي حد هيقرأ اسمه عادل)

المشكلة رقم 1: تعديل البيانات

عادل شغال في مخزن و دوره ان البضاعة اللي بتيجي تدخل المخزن يسجلها و يسجل اسم الموظف اللي وصلها, بس في واحد هو مش بيطيقه و نفسه يقلشه في اي وقت من الشركة في يوم جه يورد بضاعة 100 كرتونة قيمتهم 100 الف جنيه, قام بعد ما كتب قدامه 100 كرتونة و هو الموظف مضي عليهم استني بعد ما مشي قام ماسح صفر من قدام ال 100 كرتونة و ماسح صفر من قدام ال 100 الف جنيه, كدة اصبح ان الموظف ماضي علي انه ورد 10 كراتين باجمالي 10 الاف جنيه, [سبب المشكلة هنا ان عادل قدر يعدل علي البيانات]

المشكلة رقم 2: مركزية التحكم

بالرغم من عادل شخص غير سوي من جواه لكنه اترقي و بقي مسؤل عن مخازن الشركة كلها, بجيله كل يوم ارقام كل مخزن بيتوردلها بضاعة قد ايه و اسامي الموظفين, و اتقاله ان فيه مشكلة هي ان المخازن مبقيتش تكفي كل البضاعة و كان في اقتراح متقدمله انه يتوسع في المخازن, لكنه رفض و حدد عدد موظفين معينين لما يجوا يوردوا بضاعتهم ميدخلوش المخزن و خليها في عربيتهم, قالوله بس كدة الموظفين هيبقي مضطرين يبيتوا في عربيتهم لحد لما المخزن يفضي فيه مكان و يدخلوا بضاعتهم, قالهم مفيش مشكلة, انا الكلمة كلمتي هنا و اللي ااقوله يتعمل و يتنفذ, [سبب المشكلة هنا مركزية التحكم ان شخص واحد بيتحكم في كل شئ]

المشكلة رقم 3: الأمان 

عادل اتعرف علي رياض مسؤول عن برمجة موقع الشركة و اتصاحب عليه و يفطروا كل يوم مع بعض و يوصلوا بعربيته, وهم قاعدين في مرة عادل قال لرياض انت بتاع برمجة و حركات بس متقدرش تعرف الباسورد بتاع الاكونت بتاعي في الشركة, قاله مين قالك كدة, <رياض لف الكرسي بتاعه علي الكمبيوتر و فتح قاعدة البيانات و حركتين تلاتة قام جايب الباسورد بتاع عادل> قاله مش الباسورد بتاعك 987wer8, عادل قاله يابن الايه عرفته ازاي كدة, قام رياض شرحله, بعد شوية رياض قام يعمل كوبايتين شاي قام عادل دخل علي قاعدة البيانات و جايب الباسورد بتاع استاذ نادر بتاع الحسابات, و بقي يدخل علي حسابه كل شوية يحول فلوس لنفسه بدون علم استاذ نادر. [سبب المشكلة هنا الأمان ان الارقام السرية سهل اي حد يعرفها او يغيرها بدون علم صاحبها]

المشكلة رقم 4: مركزية البيانات

عادل جه في يوم دخل المخزن خادله 10 كراتين فيهم بضاعة علشان يهادي بيهم حد صاحبه, و اثناء الجرد الموظف لقي ان في مشكلة في الجرد 10 كراتين ناقصين, دوروا في كل اوراقهم و الملفات لحد لما حد اقترح انهم يفرغوا الكاميرات, وصل الخبر لعادل قام نازل بسرعة لحجرة السيرفرات و قام داخل علي سيرفر الكاميرة و ماسح كل الريكوردات بتاعتها, الموظفين بيراجعوا الكاميرات ملقوش فيها اي بيانات, [سبب المشكلة مركزية البيانات ان بيانات الكاميرة متسجلة في مكان واحد سهل اي حد يدمره ]

المشكلة رقم 5: الرقابة

عادل اثناء مراجعته لخط الانتاج لقي ان المنتج بيدخل في فيه رقائق ذهب, وهو كل فترة بيتوردله ذهب, فقعد يفكر قال فيها ايه لو طلعت المنتج بدل ما ياخد 5 جرام ذهب اديه 2 جرام بس واخد انا ال 3 جرام علي كل منتج, و راح فعلًا غير اعدادات جهاز التصنيع انه ياخد 2 جرام ذهب فقط, ويقي ياخد 3 جرام ذهب لكل منتج خارج. [سبب المشكلة ان مفيش حد بيراجع علي المنتج النهائي فبقي المنتج بيطلع بمشاكل بدون ما حد ياخد باله]

المشكلة رقم 6: عامل الوقت

في مورد ليه عند المصنع مليون جنيه و للأسف عادل عايز يقرفع فقال للراجل يومين هظبط مع الحسابات و تيجي تاخد فلوسك, فالراجل قاله ضروري علشان محتاج مواد خام عندي ضروري, عادل قاله متقلقش هبلغ الحسابات علي طول, فضلت يماطل عادل و يتأخر و ايام الاسبوع بتجري, و الراجل بيتصل كل يوم يسأل علي فلوسه, فعادل طلعله شيك و قاله تقدر تصرفه من البنك علي طول, الراجل راح يصرف من البنك قالوله الامضاء فيها مشكلة, عادل غيرله الشيك و عدله الامضاء, الراجل راح تاني يوم البنك قالوله محتاجين تفويض ليك علشان تصرف الشيك لان الشيك ده مفروض يتصرف بأسم الشركة مش اسمك او هات سجل تجاري, الراجل علي ما راح و رجع كان اليوم خلص, راح تاني يوم البنك قاله هيتحط الرصيد في حسابك في خلال 5 ايام عمل, [سبب المشكلة هنا هي بطئ الإجراءات الإدارية و الخاصة بالتسوية للدفع للراجل]



دول اكتر 6 مشاكل اتوجد علشانهم البلوكتشين, فتعالوا بقي نشوف البلوكتشين هتحل المشاكل ده ازاي :

كيف ساهم البلوكتشين في حل المشاكل اليومية للأعمال؟

حل المشكلة رقم 1: تعديل البيانات

- المشكلة رقم 1 عن طريق ان البيانات فيها غير قابلة للتعديل لان اي تعديل لازم يتم في جميع سجلات الشبكة و يتم الموافقة عليها من كل شخص, فكدة مفيش حاجة اسمها ان شخص واحد يقدر يعدل علي البيانات, في الحالة ده بقي ولا مليون عادل يقدروا يعدلوا علي البيانات لان لو عايز يعمل ده لازم يعدي علي كل السجلات علشان يعدل عليها و ده هيتكلف وقت و مجهود و ماديات و كل ده فوق طاقة عادل و عيلته كلها.


حل المشكلة رقم 2: مركزية التحكم

- المشكلة رقم 2 تم حلها عن طريق البلوكتشين بان مبقاش فيه شخص هو اللي بيدير البلوكتشين او قاعدة البيانات اللي عليها, علشان كل قواعد تنظيم البلوكتشين اتكتبت من بداية انشاء البلوكتشين فمش هتحتاج حد يحط قوانين او يدير لان كل حركة في البلوكتشين معمول حسابها برمجيًا, يعني مع البلوكتشين عادل مش هيكون قادر انه يتحكم في الناس لان البلوكتشين موجود فيها حل المشكلة وقت انشائها ان لو حصل ضغط في المكان يتم التوسع بصورة تلقائية او زي ما هيحتاج البيزنس وقتها.


حل المشكلة رقم 3: الأمان 

- المشكلة رقم 3 تم حل المشكلة عن طريق ان كل البيانات علي البلوكتشين مشفرة, يعني محدش يقدر يعرف رقم سري لحد او يقدر يتحكم في ممتلكاته لان محدش بيكون معاه القدرة انه يعمل ده غير الشخص اللي معاه الرقم السري لبياناته <الرقم السري = المفتاح الخاص هنتكلم عنه بعدين>, ففكرة ان عادل يدخل يعرف الرقم السري لحد ده مش هتبقي متوفرة لان كل الارقام السرية تم تشفيرها و مهما عمل مش هيقدر يفك التشفير ده.


حل المشكلة رقم 4: مركزية البيانات

- المشكلة رقم 4 تم حلها عن طريق البلوكتشين لان كل البيانات بتكون موجود منها مئات و الاف النسخ في اماكن متفرقة فلو تم تدمير نسخة من البيانات ففي صور منها كتير متفرقة, يعني في حالة اتلاف بيانات الكاميرة مش مهم لان البيانات موجودة في اكتر من مكان بصورة طبيعية.


حل المشكلة رقم 5: الرقابة

-المشكلة رقم 5 مبقاش متاح فكرة ان اي حاجة تتضاف علي البلوكتشين بدون ما يحصل عليها مراجعة من شخص و اتنين و تلاتة ...الخ <مش اشخاص حقيقين لكن اجهزة بتسمي nodes هنتكلم عنها بعدين> يعني فكرة ان عادل يغير المنتج بدون ما حد ياخد باله مش متاحة علي البلوكتشين علشان هيلاقي مليون واحد بعده بيتأكد ان المنتج خارج بالصفات و الجودة المطلوبة.


حل المشكلة رقم 6: عامل الوقت

- المشكلة رقم 6 الراجل اللي داخ وفضل يلف ده علشان ياخد فلوسه و مستحقاته, البلوكتشين جات علشان تحل العقبة ده بإنها قادرة انها تعمل عمليات التحويل بصورة لحظية بدون تعقيدات الاجرائات و تخليص الاوراق ... الخ, ( حول => استلم ) الموضوع انتهي.

الخلاصة :

البلوكتشين هي عبارة عن قاعدة بيانات ولكنها بتتميز بمميزات مش متاحة في قواعد البيانات الحالية و نقدر نقول المميزات هي :

1. غير قابلة للتعديل,
2. غير مركزية,
3. امان بسبب درجة التشفير العالية, 
4. موزعة, 
5. تعمل بمبدأ الموافقة بالإجماع,
6. سريعة في تسوية المدفوعات

• الراجل اللي فاتح محل بيبيع لبن تحت البيت مش محتاج يستخدم البلوكتشين لان خدماته بالبلوكتشين او خلافه ماشية و مش هتتأثر, البلوكتشين مجال استخدامها نقدر نقول اكتر مع الشركات و الخدمات الحساسة اللي فيها فلوس و معلومات عن العملاء و بيانات مينفعش تنتشر وهكذا.

* الموضوع غير موجه للنقاشات التقنية او جدوي البلوكتشين, البوست موجه للافراد المبتدئين اللي اول مرة يسمعوا عن البلوكتشين. 

BY: Mohammed Darwish

تعديل المقال