شبكات الانالوج كان نقل الصوره فيها فنياته اقل وجزء الهاردوير كان هو المسيطر لان الاشاره كانت بتتنقل زى ماهيا.
وده سبب انك لو شفت متش او برنامج فى الثمانينات هتلاقي صوره وصوت احسن من معظم متشات الدورى دلوقتى وبرامج دلوقتى
الرقمى كله فن وابداع فى كل حاجه لو معملتوش هتطلع نتيجه اسوء من الانالوج.
(وانا هنا مبتكلمش على الارضى بس بتكلم فى العموم)
بدايه من ضغط الصوره وده يشمل حاجات كتير منها (نوع الكودك)
ضغط الكروما (420/422) تمثيل الالوان (8bit/10bit)
حيز الالوان(Rec709/Rec2020) - الريت المستخدم (Bitrate) .
الصوت رو ولا مضغوط - ستريو ولا مونو - نوع الكودك - الريت - المستوى.
- الموديليشن الرقمى بتخطيطه بنسبه.
- استغلال الانتينا فى الرقمى مختلف تماما عن الانالوج.
- طريقه توزيع الترددات.
وحاجات تانيه كتير.
ده يوضح ان مفيش اى اهتمام بفنيات الاشاره الديجيتال داخل ماسبيرو للاسف ... على سبيل المثال
قناه الأولى إلى كانت بشعار رقم 1 كنت تلاقى كل برنامج بكوالتى مختلف سواء تنويهات او برامج لايف او حاجات مسجله
- قناه نايل سبورت نفسها شفتها فى مره ناقله متش بخط HD واقل مايقال ان صورتها كانت كارثيه.
الوانها سيئه حتى الآن وده يبان فى ملخصات الدورى الايطالى إلى بتتذاع ودى ماتريال فى الاصل كوالتى عالى ، مدحت شلبى نفسه لما كان موجود فيها اتكلم على سوء الصوره اكتر من مره
- كل قنوات التلفزيون الوانها باهته وصوتها منخفض وحاجه بصراحه رديئة.
- ستديو نايل للأخبار دخلته بنفسى وكان شكله حلو جدا إنما على الشاشه شكله استغفر الله العظيم ينفر المشاهد.
- تقريبا فى وجهه نظر ان نسبه 16:9 مش محبوبه فتلاقى سكوب غريب فى اغلب البرامج فى منظر اقل ما يقال عليه انه مضحك.
- ارتفاع الصوت وانخفاضه كل شويه بين كل محتوى والتانى يبينلك مدى العشوائية.
- سمعت مره احد المهندسين يتكلم عن ال transcoder بشكل سطحى وكان بيتكلم عن التحويل من كودينيج للتانى بمنتهى السهوله وهو ميعرفش ان عمليه تغير الكودك والريت هى عمليه فنيه جدا ومش مجرد رزع على الاجهزه وخلاص .
- سمعت بنفسى معلومات خاطئه ممن يعملون بالمجال يخجل منها اى هاوى اجنبى مهتم بالبرودكاست.
- احد المهندسين مكنش يعرف ان القنوات شغاله ب ٢٥ فريم وهى معلومه ا ب
- معظم المهندسين مش فاهمين تاثير الكروما على الصوره او ال bit depth وهى معلومات اساسيه فى الصوره والالوان.
- مستوى اغلب المهندسين وصل لمستوى سيئ الا من رحم ربى وهم قله وفى الغالب بيسافروا بره مصر.
- مبقاش فى فرق بين المهندس والفنى فى المجال من كتر تهميش الفكر والابداع والاهتمام بالاجهزه والتركيب فقط.
- طب منا ممكن اجيب اى حد مش دارس اتصالات
يركب ويوصل ايه فايده علم الاتصالات فى كده ؟
- بغض النظر عن المحتوى فالسوء الهندسى اكبر بكتير سواء الشبكه الداخليه او شبكه الارضى .
- اقل ما يقال ان اى محتوى نضيف مش هيظهر وسط السوء ده وللامانه مفيش غير قناتين فقط إلى كويسين نسبيا (الأولى والايجبشن )
إلى حتى فيهم مشاكل صوت اتكررت قدامى كتير بدون حل
امال على كده ال MCR إلى هناك ده بيعمل ايه ؟
- اه بالمناسبه هو ال MCR وظيفته مش بس يشوف انقطاع الصوره او الصوت ده كمان لازم يشوف الالوان وجوده الصوت وعلوه لو كان ده بيحصل مكناش شفنا الاخطاء دى كلها على الشاشه.
- لو مهندس ال MCR مش فاهم صوره والوان ومش فاهم صوت فدى مصيبه منا ممكن اجيب اى حد يقعد يتفرج فين الهندسه فى كده ؟
- اخر مره كنت فيها ف ماسبيرو شفت اغلب الشاشات الموجوده crt بتاعت زمان وشاشات صغيره متعديش ١٤ بوصه طب وانت على كده هتست ال colour bar ازاى هتست البيت ريت ازاى.
اه صحيح الcolour bar ده مش عاملينه منظره ده عشان تعمل تست للالوان
والبيت ريت لازم بيتعمله تست بعينك قبل متقراه بجهاز .
- الله يسامح من نشر فكره ان البرودكاست تركيب اجهزه او مجرد عمل ديزاين للاجهزه مع الكابلات ببساطه ده %5 من الموضوع .
لو انت مش فاهم غيرهم فانت فايتك حاجات كتير وهو ده سبب ضياع كل القنوات المصريه والشبكه الارضيه وهو ده سبب الاستعانه بخبراء كل شويه ببساطه محدش مهتم بالحاجات دى
الا من رحم ربى .
مفيش حاجه اسمها انا فاهم فى حته معينه والباقى ضعيف فيه هى العمليه كلها داخله فى بعض.
مينفعش تبقا قاعد مستنى اخطاء تحصل وتصلحها لان المفترض انك فى حاله تغيير وتعديل على الشبكه باستمرار وده معروف باسم optimization وده له تيمات فى اى شبكه اتصالات.
المشاكل كتير وكتير لو قعدت اتكلم فيها مش هنخلص بس لازم تعرفوا ان الموضوع مش مجرد اجهزه بتتركب جمب بعض وخلاص.