عن ماذا تبحث؟

ايه هو الرموز الغير قابلة للاستبدال NFT بالتفصيل

 

لو انت مصمم او محامي او مطور العاب فالمقال ده مهم ليك، قبل ما تقرأ المقال ده انا بشرحه بيما يتناسب مع طبيعة معلوماتك، فشوف انت شايف نفسك ايه و انزل للجزء بتاعها علي طول او هتلاقيني كاتب عنوان "للجميع" ده هيكون سواء كنت تقني او لا، او كاتب "ال technical" ده خاص بالشخص التقني للجميع" (هوضحلك الموضوع من برة بدون الدخول في تفاصيل) ال technical (هنتعمق شويتين).

 

ما هو ال nft

 

 


[المشاكل الحالية في المعاملات القانونية، الفنون و حقوق الملكية، الالعاب، الاقتراض]
المعاملات القانونية : من كذة سنة كل المعاملات القانونية كانت بتتم عن طريق اشراك وسيط، الوسيط ده دوره هو انه يكون الشاهد علي المعاملات اللي بتتم بين الطرفين و بيكتسب ثقته من الحكومة نفسها "زي الشهر العقاري" بس مشكلة الوسيط ده انه ممكن في اي لحظة يخسر كل المستندات اللي بيملكها لاي سبب طبيعي "حريق، زلزال …الخ" او سبب بشري "تزوير او اتلاف …الخ" فكان لازم يكون في حل للمشكلة ده فجات ثورة الرقمنة او ال digitalization وهو التحول الرقمي من الاعتماد علي الورق لاستخدام قواعد بيانات الكمبيوتر العادية زي الاكسل و الاكسس او قواعد بيانات متقدمة شوية، لكن برضوا ظهرت برضوا نفس المشاكل اللي فوق الطبيعية او البشرية فالموضوع فقط اصبح منظم لكن عرضة للإتلاف.
.
.
الفنون و حقوق الملكية: معظم الفنانين بيكونوا للاسف متدهورين ماديا، في حين ان الفن الراقي من اكتر الاعمال اللي بتخلينا ننبهر بجمال الفن سواء فن مسموع او مرسوم او مرئي، وكانت المشاكل المالية ده اسبابها كتير من اهمها، سلطت الشركات الراعية علي الاعمال الفنية و امتلكها نصيب الاسد من الارباح و يروح للفنان فُتات الفلوس، او مشكلة ليها علاقة بحقوق الملكية يعني الفنان يقدم فنه بعد تعب و مجهود وفي الاخر يجي اشخاص سيئين يسرقوا مجهوده وبما انهم ذو سلطة او نفوذ فقدرة بيع الفن عندهم اسرع من الفنان نفسه، وده كان بيدي ملكية غير صحيحة للاشخاص دول، وبرضوا هنرجع ان ممكن يتم اتلاف الفن ده سواء بصورة طبيعية او بشرية، تقدر تزود مشاكل من النوع ده زي ما تحب.
.
.
الالعاب: فكرة تصنيع لعبة ده من اصعب الافكار اللي ممكن تتنفذ و كلامي هنا علي عالم صناعة الالعاب نفسه اللي بيحتاج اسطول من المطورين و المصممين و كتاب السيناريو و المخرجين و العلماء ….الخ، هنمسك مثلًا لعبة زي لعبة PUBG، في اللعبة تقدر تشتري ملابس و اسلحة و اكسسوارات …الخ لكن المشكلة كانت بتظهر في اتجاهين، الاتجاه الاول بخصوص المطورين اللي هو باعوا القطع اللي محتاجها اللاعب للشخصية بتاعته و علاقت المطور انتهت باللاعب و في الاتجاه التاني اشتري اللاعب القطعة و بعد فترة اللعبة قررت توقف خدماتها، في لعيبة بتدفع ممكن ملايين في القطع اللي بتشتريها لكن بتوقف اللعبة خلاص كدة كل فلوسهم راحت عليهم.
.
.
الاقتراض: لو جالك واحد و قالك انا محتاج ١٠٠٠ دولار ضروري و هديك شيك بالقيمة المساوية بالعملة المحلية لدولتكم، وتقدر في اي وقت تصرف الشيك لو اتاخرت عليك في الدفع اكتر من شهر، بعد شهر الراجل مدفعلكش الفلوس فروحت البنك تسحب الفلوس، التلر قالك الحساب مفيهوش غير ما قيمته ٩٠٠ دولار بس، فانت كدة خسرت تقريبا ما قيمته ١٠٠ دولار. وده مشكلة من ضمن المشاكل المالية.
.
.
اتكلمنا عن مشاكل كتير بس هل في حل بقي؟
ايه يعني افهم ايه انا ؟!
يا صديقي متقلقش كله جاي …
في سنة ٢٠١٧ ابتدت تظهر بوادر لتقنية قايمة علي تسجيل حق ملكية الاصل و توزيع سند اثبات الملكية الرقمي عند ملاييين من الاشخاص علي مستوي العالم علشان يتم ضمان عدم اتلافهم، لو تم اتلاف نسخة او اتنين او ١٠٠٠ فمفيش مشكلة في لسة ملايين النسخ المنتشرة علي اجهزة الكمبيوتر الخاصة بالناس علي مستوي العالم، ووقت ما يحب مالك الاصل نقل ملكيته لشخص تاني بيتم تحديث كل سندات الملكية الرقمية علي كل اجهزة الناس في العالم بنقل الملكية من شخص "أ" لشخص "ب" و بكدة بقي المالك الجديد هو "ب" مع عدم امكانية اي شخص من المحتفظ بالسند الرقمي بالتعديل بدون ما يكون معاه باسورد السند الأصلي. فخلينا نمر علي الامثلة اللي قولناها فوق و ازاي ال NFT بيحل المشكلة.
.
.
المعاملات القانونية: دلوقتي اي شخص عايز ينقل ملكية اي اصل معاه سواء عربية او عقار او قطعة ارض ….الخ فبيعمل سند علي شبكة ال NFT وبيوضح انه المالك الآصلي للاصل ده، و يقدر ينقل ملكية الاصل ده في اي لحظة من خلال موبايله او اللابتوب بمصاريف لا تتعدي في بعض الحالات ١ دولار.
.
.
الفنون و حقوق الملكية: حاليا اي فنان يقدر يعمل سند ملكية مربوط بفنه علي شبكة ال NFT بحيث انه ميكنش في مجال لسرقته، مش بس كدة كمان يقدر يتربح من عمليات اعادة بيع عمله الفني، يعني لو مثلًا علي سبيل المثال انا رسمت لوحة فيها بحر و مركب وواحد عجبته اللوحة ده فاشتراها مني ب ١٠٠٠ دولار رقمي و اتحول ملكية اللوحة للمشتري ولكن انا مازلت الفنان صانع اللوحة، جه المالك الجديد بيوري لحد من اصدقائه اللوحة فعجبته اللوحة فقاله انا هشتريها منك ب ٢٠٠٠ دولار رقمي، فالمالك شاف انه هيربح فباع اللوحة لصديقه ده و بقي صديقه المالك الجديد، بعد ماتمت عملية نقل الملكية و البيع، جالي انا بما اني انا الفنان اللي رسم اللوحة ١٠٠ دولار رقمي و هكذا، اي عملية بيع تتم للوحة انا بيجيلي نسبة منها اذا انا اخترت ده من البداية.
.
.
الالعاب: بعد ظهور تقنية الNFT يقدر مطوري الالعاب يحولوا القطع اللي بيتم بيعها علي شبكة ال NFT وبكدة يقدر اللاعب يشتري القطعة و يبيعها لحد تاني و المطور الاصلي بيتربح من كل عملية بيع، حتي لو اللعبة وقفت خدمتها بيفضل اللاعب بيمتلك حق ملكية القطع اللي اشتراها لانها علي شبكة مستقلة بذاتها بعيدا عن اللعبة نفسها، خلاف انه يقدر يستخدم القطع ده في العاب تانية اذا توفر الاتصال بين الالعاب و بعضها علي شبكة ال NFT.
.
.
الاقتراض: الشخص اللي استلف منك الفلوس مش هيقدر يتلاعب بالمبلغ المستحق ليك لان ببساطة باستخدام ال NFT ممكن ياخد منك المبلغ مقابل نقل ملكية اصل في حالة عدم السداد، و بالطريقة ده مش هيقدر يتلاعب بالاصل ده لان خلال امر نقل الملكية هيتحقق اذا لم يتم السداد وده اتسجل في شبكة ال NFT.
.
.
"لل technical"
في الحقيقة ظهور ال NFT كان من كذة سنة قبل ظهور الايثريوم كمان يعني تقديبا من ٢٠١٤، وكان اسمه Quantum project كان علي ايد McCoy و Anil Dash في سنة ٢٠١٤ لما كانوا في مؤتمر في نيويورك و باعوا فيديو ب ٤ دولار عملته زوجة McCoy كانوا حطوه علي شبكة Namecoin، بعدها في اكتوبر ٢٠١٥ اول مشروع NFT كان اسمه Etheria وكان بدايته في DEVCON 1 في لندن بعد ٣ شهور من اطلاق الايثريوم، الموضوع فضل يتطور سنة بعد سنة ، و ظهر مشاريع قايمة علي ال NFT زي مشروع "CryptoPunks
" و "Curio Cards" في ٢٠١٧ و فضل الموضوع ماشي بهدوء لحد ما ظهر مشروع "CryptoKitties" اللي كان اول ضجة تحصل علي ال NFT.
.
.
طيب ايه اللي بيحصل technically ؟
للوقت الحالي فكرة ال NFT مش غير مركزية ١٠٠٪ وده بسبب ان حجم البلوك اللي مفروض يتحرك فيها ال asset مش كبير للدجة ده، علي سبيل المثال انا عملت فيديو حجمه ٢ جيجا، صعب حاليا ان في بلوك تقدر تشيل الحجم ده في وقت البلوكات بتتنافس فيه تكون ااقل حجم علشان تكون اسرع، فاللي حاصل حاليًا ان الموضوع بيتم كالتالي، انت عندك asset عايز تحوله لعقد NFT العقد هيتعمل بكل تفاصيله من ال time-stamp لل block hash لل owner ….الخ ويهتحفظ فيه كا print لاسم ال asset عي السيرفر المركزي وليكن مثلًا aws وبكدة لو سيرفرات امازون وقعت حق الملكية هيكون متواجد عادي لكن اللي هيحصل فيه مشكلة ومش هيكون detectable هو ال asset نفسه، علشان كدة حاليًا في شركات بتحاول تعمل layer 2 مبني علي ال layer 1 للبلوكتشين بيشيل ال asset اللي حجمه كبير ده.
.
.
"للجميع"
طيب هيجي واحد يقولي طيب ما انا ممكن اخد سكرين شوت للصورة او العقد ده و ااقول ان المليكة ليا انا!
.
بص علشان اكون صريح معاك احنا ديما بنشوف الشخص اللي بيسال السؤال ده شخص "غير مناسب" علشان مش من النصاحة انك تعمل كدة وعلي كل حال انت ممكن تعمل ده فعلًا بس العبرة مش في اللي بتعمله ده ولكن العبرة في مين اللي معاه ملكية الاصل الحقيقي، يعني مثلًا واحد اشتري لوحة ل "كلود مونيه" او "فان كوخ" ورفع الصورة علي الانترنت وانت خادتها سكرينشوت و حطتها عندك هل ده هيديك ملكية اللوحة؟ او هل انت هتكون مرتاح نفسياً؟! اطلاقا لان ملكية الآصل نفسه هي الاساس، خلاف كدة ان بيانات صانع الفن اصلا بتكون متواجدة في السند.
 
* لو عندك وقت تقدر تقرأ المقالات السابقة
* ده بوست سابق عن اغلي لوحة ديجيتال اتباعت علي البلوكتشين وشرح ايه هو ال smart contract و ال NFT.
[https://www.facebook.com/Mohammed.Kamal.Darwish/posts/4319982114712646]
قناة اليوتيوب بتاعتي لو عايز تتابع فيديوهاتي عن ال blockchain بال animation.
[https://www.youtube.com/channel/UC1lc0Onnn5p1u_rovUkdbBA/]
قناة التيكتوك بتاعتي لو عايز تتابع فيديوهاتي عن ال blockchain بال animation.
[https://www.tiktok.com/@blockchainniat]
صفحتي علي الفيسبوك
[https://www.facebook.com/Blockchainniat/]
*البوست ده بغرض التوعية للمقيمين خارج مصر, ولو انت في مصر فقانون البنك المركزي المصري بيجرم التعامل او التداول في العملات المشفرة بسبب تأثيرها السلبي علي الاقتصاد.
كل المقالات بتاعتي هتلاقيها علي الهاشتاج ده => #الخلاصة_محمد_درويش

 

 

تعليقات



حجم الخط
+
16
-
تباعد السطور
+
2
-