الفترة اللي فاتت تم تداول العديد من الاخبار ان تم بيع صورة بصيغة NFT بأسعار خياليه عبر تقنيات الميتا فيرس الخاصة بشركة ميتا فيسبوك، وفي هذا المقال يستعرض معنا م/ Mohammed Darwish الخبير التقني ماهي فكرة ال Non fungible token او الرموز الغير قابلة للإستبدال بطريقة مبسطة ان شاء الله.
ماهي الرموز الغير قابلة للأستبدال؟
كلنا عارفين طبعًا ان 5 جنيه = 5 جنيه عادي جدًا، لكن ايه رأيك لو قولتلك ان ممكن ال 5 جنيه = 69 مليون دولار؟! متستغربش علشان ده بيحصل دلوقتي.
- ثانية ثانية 5 جنيه = 5 جنيه تماما لكن ايه 69 مليون دولار ده؟! ده يا صديقي الثورة التكنلوجيا اللي قالبة عالم البلوكتشين حاليًا، وهو ال NFT او ال Non fungible token او الرموز الغير قابلة للإستبدال.
ايوة برضوا يعني ايه ده؟
علشان افهمك يعني ايه الصيني اللي انا بتكتبه ده، لازم افهمك يعني ايه عقد ذكي او smart-contract و ازاي بدأ؟
- فالبداية لما ظهرت البلوكتشين وظهر عليها البيتكوين كانت الإستخدام المثالي ليها هو في عالم المال "الشراء و البيع"، يعني ظهرت علشان تتاخد كمثال و يتم انشاء عملات بإستخدام نفس الفكرة و يتم التعامل بيها في الشراء و البيع، ولكن طلع عيل صغير كدة اسمه فيتالك بوترين في 2014 بورقة بحثية بيتكلم فيها عن عملة جديدة خلاف البيتكوين اسمها "ايثريوم" و كان اول ظهور رسمي للعملة في 2015، كان هدف بوترين ان يتم استخدام الشبكة اللي قايم عليها الإيثريوم في انشاء عملات تانية كل عملة ليها المزايا بتاعتها الخاصة.
وكان المعيار مفتوح المصدر "OPEN SOURCE" وكان متوفر للمطورين علشان يستخدموه، و كان بيتحدد المبادئ الأساسية لأي عملة و سايب المطورين يعدلوا براحتهم في العملة المشفرة بتاعتهم، من بعدها ظهرت شركات كتير بدل ما يعيدوا اختراع العجلة من الأول، بقوا ياخدوا نسخة من كود عملة الإيثريوم "Smart contract" و يعدلوا عليه علشان يناسبهم و بعدها يستخدموا الشبكة بتاعت الإيثريوم في انهم ينفذوا عمليات الإستقبال و الإرسال من خلالها.
عارف انك توهت علشان كدة هوضحلك بصورة ابسط:
تخيل انك شغال في شركة في قسم الحسابات و معاك 10 زمايلك بيعملوا نفس الشغل اللي انت بتعمله ولكن بشوية اختلافات، انت ربنا كرمك و اداك عقل استخدمته و عملت فايل اكسل بفورم بتستخدمه علشان تنجز شغلك كل يوم و بقيت تنجهز بصورة سريعة، جيت انت قولت بدل ما زميلك بيتعبوا في انجاز الشغل هتديهم نسخة من الإكسل بتاعك يستخدموه بدل ما يعملوا اكسل جديد و ياخد منهم وقت و مجهود، كل زمايلك خدوا الإكسل وعدلوا فيه علشان يناسب شغلهم فيه اللي شال الخانة بتاعت التاريخ علشان مش محتاجها وفيه اللي اضاف خانة جديدة للموردين و فيه اللي زود الصفوف ل 100 صف بدل 60 وهكذا، هو ده نفس فكرة ال Smart-contract.
العقد الذكي ده كان واخد رمز ERC20 "Ethereum Request for Comments" و الدنيا كانت شغال عليه عادي و كان فيه عملة الإيثريوم كانت = عملة ايثريوم زي المثال اللي قولته في الأول 5 جنيه = 5 جنيه، لحد لما حصل تحديثات في العقود الذكية ووصل بيهم التحديث لمعيار ERC-721 وده عقد ذكي قايم علي فكرة ال NFT او الرموز الغير قابلة للإستبدال لعدم تساوي قيمتها، و المعيار ده مش معمول للعملات تحديدًا، معمول علشان يتم فيه توثيق المنتجات بمختلف اشكالها سواء الرقمية او الملموسة "حاليًا بتستخدم في الجزء الديجتال و جاري تطويرها لباقي المنتجات" ، زي انك مثلًا لو كنت فنان بتعمل تصاميم ديجيتل و عايز تبيع التصميم بتاعك تقدر بإستخدام اي عقد ذكي بيستخدم معيار ERC-721 تبيع التصميم بتاعك، وده بيتم ازاي؟
هنفترض قبل ظهور ال ERC-721 :
انت اسمك جعفر و جالك عميل اسمه ابو نواف، انت كجعفر عملت تصميم لعربية فراري شافها ابو نواف عجبته جدًا و لقيته بيقولك والله بشتريها منك ب 10 دولار انت فرحت و قولتله طيب ازاي هبعتهالك؟؟ هرفعها علي الواتس اب او هبعتهالك علي الميل، قالك لا خوي والله التصميم بيتسرق وانا ابيها لي انا، فضلت تفكر و هو يفكر و في الاخر حطيتها علي فلاشة و بعتهاله شحن، وهي في الجمارك عامل الجمارك فتح الفلاشة ولقي الصورة حطها خلفية علي الكمبيوتر بتاعته، و عامل التفتيش و عامل السفينة و عامل التوصيل و الحمد لله ابو نواف الشخص رقم 15 اللي بيمتلك الصورة و بكدة مفيش اي اثبات علي المالك الأصلي للتصميم.
بعد ظهور ال ERC-721 :
دلوقتي انت تقدر كجعفر تحول ملكية الرسمة لابو نواف، عن طريق انك بتسجل الرسمة بتاعتك علي البلوكتشين وبيكون انت المصمم بتاعها و بتنقل ملكيتها لأبو نواف، فكدة اي حد سرق التصميم لو رجعنا علي البلوكتشين هنلاقي ان المالك للتصميم هو ابو نواف مينفعش حد يشاركه فيها، لو حد حتي حاول يبيع التصميم مش هيعرف لإنه مش المالك ليه.
و ده حصل فعليًا لما اشتري المستثمر الهندي Vignesh Sundaresan اللوحة الديجيتال اللي في الصورة ده بمبلغ 69 مليون دولار و اصبح هو المالك ليها علي شبكة الNFT.
و بإفتراض ان ال 5 جنيه اللي كانت معاك كان ماضي عليها "ستيف جوبز" و حبيت تبيعها في مزاد قائم علي ال NFT ممكن كانت تجيبلك ال 69 مليون دولار بعد ما تنقل ملكية ال 5 جنيه للمشتري الجديد.
* سبب عدم امكانية استبدال الرمز القائم علي ERC-721 هو ان كل رمز مختلف عن التاني يعني مثلًا رمز جواه ملكية لوحة و رمز تاني جواه ملكية تصميم لعبة و رمز تالت جواه ملكية مقطوعة موسيقية فرمز اللوحة قيمته متساويش رمز المقطوعة الموسيقية وهكذا، بإختلاف العملات المشفرة العادية زي الأيثريوم او البيتكوين او العملات النقدية العادية قيمة كل عملة بتساوي نفس القيمة من نفس العملة.
* ملحوظة ال ERC-20 و ال ERC-721 معقدين مش بالبساطة ده بس انا حاولت بقدر الإمكان ابسط المفاهيم علشان تبقي واضحة ليك.
BY: Mohammed Darwish