استراتيجية Pump-and-dump واحدة من أسوأ استراتيجيات التلاعب بالسوق لأنها مش مجرد بتخدع الأشخاص علشان يشتروا او يستثمروا في شركة معينة، دي بتلعب على الشركة نفسها علشان ترفع قيمتها في السما وبعد كدة يتخسف بيها الأرض.
أشهر من استخدم الاستراتيجية دي هو جوردان بيلفورت الملقب بذئب وول ستريت واللي اتعمل عنه فيلم The Wolf Of Wall Street، لدرجة انه اتسمى بـ Pump-and-dump big boss.
ده بيتم عن طريق مجموعة من الأشخاص اللي عندهم خبرة وعلاقات كبيرة في سوق الأسهم، واللي بيبدأوا ينشروا شائعات ومعلومات مغلوطة وتقارير غير صحيحة عن الشركة المستهدفة، بس كل المعلومات والتقارير دي بتكون في صالح الشركة علشان يرفعوا قيمتها ويرفعوا سعر السهم لأعلى مستوياته.
بيتم اختيار الشركات دي بعناية زي الشركات الناشئة اللي بتقدم حاجة جديدة او الشركات اللي عملت صفقات استحواذ جديدة واللي بيكون في أسباب مقنعة لزيادة سعر السهم.
عملية نشر الشائعات والمعلومات المغلوطة دي كانت بتتم زمان في مرحلة ماقبل انتشار الانترنت والسوشيال ميديا بحاجة اسمها Cold Calls، ودي بتكون عبارة عن داتا ضخمة لعملاء مستهدفين اما بيستثمروا في الأسهم فعلاً، او مستثمروش قبل كدة لكن عندهم النية.
بيقوم مندوبي المبيعات بالاتصال بيهم واقناعهم بانهم لازم يتشروا في الشركة دي علشان السهم بتاعها في الطالع، وفي الحقيقة الهدف الأول من المكالمات دي مكنش اقناع الناس بالشراء مباشرة ولا حاجة، لكن الهدف الأول هو نشر اسم الشركة بين الناس، لحد الاشاعة ماتاخد دورتها وتوصل لكل المستثمرين والمضاربين ويبدأوا يشتروا وسعر السهم يرفع.
قبل العملية دي بقى الأشخاص دول بيكونوا شاريين أسهم كتير في الشركة، وبمجرد الخطة ماتنجح وسعر السهم يضرب في السما يروحوا بايعين كل الأسهم، وبعدها بوقت قصير سعر السهم يتخسف بيه الأرض لأنه كان صعود وهمي.
حالياً بقى مع وجود الانترنت والسوشيال ميديا الموضوع اتطور تماماً وعملية نشر الشائعات والمعلومات المغلوطة بقت أسهل بكتير وأكثر انتشاراً وأقل جهد وتكلفة كمان، لأن خلاص مش محتاجين مندوبي مبيعات متخصصين في الاقناع علشان يكلموا الناس، بعض استراتيجيات التسويق على السوشيال ميديا كافية تعمل ده.
ولعل أقوى مثال حالياً على تطور استراتيجية Pump-and-dump هي أفعال ايلون ماسك مؤخراً والمتهم باستخدام قوته المالية وشهرته العالمية في التحكم بصعود ونزول أسهم الشركات وقيمتها، بتويته واحدة منه قادر يخلي عملة رقمية مثلاً زي دوج كوين قيمتها تعلى 500%.
يشتري بيتكوين بملايين الدولارات ويعلن استثمار تسلا في البيتكوين ويقبل شراء عربيات تسلا عن طريق البيتكوين فسعرها يرفع في السما، ويرجع يبيع كل اللي معاه والعملة سعرها يتخسف بيه الأرض بعدها.
حتى صفقة استحواذ تويتر وبعد كدة انسحابه منها والمشاكل والقضايا الكتير اللي بينهم، ناس كتير بترجح ان دي لعبة كبيرة من ايلون ماسك علشان ينزل سعر سهم تويتر ويقلل قيمتها لأدنى درجة علشان يستحوذ عليها.
استراتيجية Pump-and-dump مصنفة انها غير قانونية في بعض البلاد، ولو حد اتثبت عليه انه بيشتغل بيها بيدفع غرامات مالية ضخمة وبتوصل للسجن.
وانت لو بتفكر تستثمر في شركة او حتى بتستثمر مبلغ مالي صغير في أي مشروع، خلي بالك كويس علشان ميتلعبش عليك اللعبة دي، لأنها منتشرة كتير جداً حوالينا وأقرب مما تتخيل.
#كرياتوفا