قامت شركة Paxos بعمل عملة مشفرة افتراضية جديدة تحت مسمي عملة PAXG وتم استنتاجها تحت غطاء شبكة الإيثريوم واستخدامها عوضآ عن الذهب الحقيقي في المعاملات بين المستخدمين وراغبي الشراء ولكن ما قصة هذه العملة؟
الدهب بقي عملة مشفرة؟
لازال الاعتماد علي العملات المشفرة الالكترونية احد الحلول التي يتوجه اليها اصحاب المال والاعمال بعيدآ عن الرقابة الحكومية للدول لهذه المعاملات وعلي الرغم من مشروعيتها في العديد من البلاد الا انه مازالت مرفوضة في بعض الدول خاصة الدول العربية
رايح تخطب وواخد في جيبك flash-memory محفوظ عليها شوية ارقام و حروف و قومت قايلها " خد ال flash-memory عليه شبكتك يا عروسة عيار ٢٤ " ....
كيف بدات القصة: تحويل الدهب المادي الي عملة مشفرة؟
الملياردير "وارن بافيت" كان ليه مقولة جميلة و مُعبرة جدًا عن الذهب فقال
"بيتم استخراج الذهب من اراضي افريقيا، و بيتدوب و بعدها بيتحفر حفرة تانية في الارض علشان الذهب يتشال فيها و بندفع فلوس لحراسته، الموقف ده لو حد شافه من خارج كوكبنا هيستغرب جدًا"
و يقصد بكلامه اننا بندفع فلوس علشان نستخرج الذهب و بندفع فلوس علشان نحميه، وهو شايف ده غباء.
تحويل الفكرة الي واقع
فالشركات ابتدت تفكر ازاي تحل المشكلة ده؟!!
لحد ما من كام سنة فاتت جات شركة اسمها Paxos متخصصة في الذهب و مجال الوساطة المالية من ٢٠١٢ قالت انا عندي فكرة، الناس مشكلتها في طريقة حفظ الذهب و ان ده مكلف و غير آمن!! طيب ايه الوضع لو الناس اشتريت ذهب و محتاجيتش تحتفظ بيها احنا هنحتفظ بيه بدل منهم!
- فكرة زي كدة من برة جميلة و الناس تسقفلها، لكن ازاي هشتريه من غير ما احتفظ بيه و فين ملكيتي للذهب ده؟!
سؤالك جميل زيك، خليني ااقولك ان الشركة قررت تعمل ده عن طريق العملات المشفرة، فراحت عملت عقد ذكي علي شبكة الإيثريوم و خليت العقد ده مربوط بذهب حقيقي محفوظ في خزائن في لندن مؤمنة و شديدة الحراسة، و تم انشاء عملة "رمز" بإسم PAXG اختصارا ل PAX GOLD، و اصبح كل عملة من ال PAXG = ١ اوقية يعني ٢٨،٣٤ جرام ذهب.
- ايوة برضوا ازاي بيتم التآكد ان الذهب ده بتاعي ؟
بصورة بسيطة جدًا، ده بيتم عن طريق انك بتاخد عنوان محفظة الايثريوم الخاصة بيك و بتدخل علي موقع Paxos تحط عنوان المحفظة بيظهرلك الرقم المسلسل المطبوع علي الذهب بتاعك في لندن.
- لا لا دول اكيد شوية نصابين و معندهمش ذهب ولا حاجة!
كان ممكن ااقولك كلامك صح لو مكنتش الشركة بتخضع لل DFS الخاصة بولاية نيوريك الامريكية اللي بتقوم بعمليات الرقابة المالية، و ان شهريًا بيتم من خلال مدقق خارجي عمل مراجعة علي عملات ال PAXG و مخزون الذهب اللي في الخزائن علشان يتم التأكد ان مفييش تلاعب من الشركة و انهم فعلًا عندهم كمية ذهب تساوي عدد العملات المتاحة في السوق.
- علي كدة بقي في مخزون ذهب معاهم كتير؟
تقدر تقول عندهم حوالي ٩ مليون ٢١٦ الف جرام ذهب تقريبًا، ما يعادل ٩ طن ذهب تقريبًا وده اكتر من احتياطي الذهب لدولة غانا بحوالي ٢٥٠ كيلو ذهب.
فلو انت عايش برة مصر وانت رايح تخطب بقي متنساش تجيب flash-memory و تحط عليها ال private-key بتاع محفظة الايثريوم اللي عليها ال PAXG ولازم تكون شيك و حلوة علشان تشرف الحاج و الحاجة، و ابقي اعمل الفرح في ال metaverse.
خاتمة وهام ووجب التوضيح :
بعض المتابعين عندي ممكن ميكونوش يعرفوا طبيعة المحتوي عندي، انا مليش علاقة يا شباب بسياسات الدول، انا حد تقني بشرح تقنية بصورة مبسطة، مش مهتم ولا مستعد ادخل في نقاشات نظريات مؤامرة او اذا كانت امريكا نصابة ولا هتضحك علي العالم …الخ
تقدر تتابع بلوكتشينيات علي : https://linktr.ee/blockchainniat
بواسطة: Mohammed Darwish