1 أكتوبر 2019

تقرير عن اطباق الدش المتحركة من العالمي سات

فى هذا الموضوع يشاركنا احمد عز ادمن جروب العالمى سات تقرير مميز عن الطبق المتحرك لأستقبال الاقمار الصناعية والتقاط القنوات المشفرة والفيدات وكل ما يتعلق بتركيب صحن الدش المتحرك "الغير ثابت" . 
تقرير عن اطباق الدش المتحركة من العالمي سات
                       

موضوع جديد ( الاطباق المتحركه )

الطبق المتحرك 👈 تقرير مش هتلقيه الا في العالمي
في ناس كتير متعرفش ايه هو الطبق المتحرك او متعرفش ايه وظيفته غير انه كان بيركب زمان وحاليا كله بيركب الاطباق الصغيره معظم الناس تعرف عنه كد.

تعالي نتعرف شويه عن الاطباق المتحركه 💪💪

الاطباق المتحركه كنز في المنزل. اه والله زي مابقولك كده بس طبعا الكلام ده للناس اللي بتحب الكوره اوي
طب ليه ياعم احمد بقا ؟
تعالي ياباشا انا اقؤلك ليه ؟
  • اولا _الطبق بيستقبل اشاره اعلي من الاطباق الثابته بمراحل
  • ثانيا _الطبق في حاله الهواء الشديد لايؤثر علي الاشاره عكس الاطباق الصغيره
  • ثالثا _الطبق بيكون محكوم كويس. او مربوط يعني بماتور وده اضمن طبعا
  • رابعا _ تقدر تستقبل كل الاقمار بعدسه واحده عكس الاطباق الثابته لكل قمر عدسه
  • خامسا_. تقدر تضيف اي قمر جديد من غير الرجوع لفني وشراء عدسات وافلام
  • سادسا _ تقدر تستقبل الترددات السوبر ودي قنوات بتكون اشارتها قليله وبتكون موجوده في اقمار معينه اهمها قمر استرا 19
  • سابعا_ تقدر تتفرج علي كل البطولات حتي دوري ابطال افريقيا مجانا عن طريق الفيدات
  • ثامنا _ تقدر تتابع مباريات فريقك المفضل يعني لو بتابع الدوري الانجليزي وعندك طبق ثابت هتتفرج علي مباره واحده وحسب ما القناه هتنقل عكس المتحرك هتلاقي بدل القمر كتير بينقل مباريات مختلفه
  • تاسعا _ لو ملكش في الرياضه خالص هيكون عندك اقمار ممتازه جدا للأفلام والمسلسلات والبرامج وغيرها
.
وغيره وغيره وغيره 👉
نيجي للطبق وشغله وليه هو مريح وافضل من الثابت

انا هتكلم بالبلدي علشان اللي مش فاهم يفهم 😂

الطبق المتحرك تقدر من خلاله تستقبل كل الاقمار في مصر حسب التغطيه وتقدر ان تشوف بدل القمر 30 واكثر وبدل المباره علي قناه تقدر تشوفها علي اكثر من قمر.

الطبق المتحرك في اول مره الا حد ما بيكون مكلف. بس انت خد بالك انك بتعمله مره وممكن متعملش ليه صيانه الا كل كام سنه ودي بترجع للفني طبعا

ميزه الطبق المتحرك انه مش بيحكمك باقمار معينه لا خالص انت الدنيا بتكون مفتوحه معاك وتقدر تتفرج علي مباره مجاني او شيرنج.

الطبق المتحرك

مثال بسيط 🔥

لو انت بتتفرج علي القمر الاوربي وفيه مباره معينه في الدوري الانجليزي عايز تشوفها وقناه canal sport الخاصه بالدوري الانجليزي مجبتش المباره هتعمل ايه.

 طبعا لو عندك طبق ثابت مش هتتفرج علي المباره لكن لو فيه طبق متحرك ساعتها بشوف الاقمار والقنوات صاحبه الحقوق واقدر اتابعها. يعني مثال الدوري الانجليزي بينقل علي الاقمار الاتيه
الاوربي. اموس. استرا 23. استرا 19. هلاس سات.. هسباسات. يوتل سات 16. قبرص. ثور. وغيره دي اقمار الشيرنج
الازاري. الياه سات. والايراني. دي اقمار مجانيه

يعني تخيل ان يبقي معاك لدوري واحد اكتر من 9 اقمار وشوف فيهم كام قناه وكام جوده بث وكام مباره منقوله هتشوف الصوره اللي تعجبك او القناه وتعيش مع نفسك

الكلام ده لكل الدوريات والبطولات المختلفه
وبكده هيبقي عندك بدل القناه 20 وتشوف اللي انت عايزه بمزاجك
في حاله نزول اي قمر جديد بتقدر تضيفه عادي وبكل سهوله
كفايه انك هترتاح من كل يوم الطبق اتهز الطبق اتحرك روح هات فني ويعمل فيلم وتدفع قد كده
ده غير الناس اللي عايشه في اماكن مفتوحه ومش بتعرف تتفرج علي حاجه بسبب الرياح والهواء الشديد
من مميزات الطبق المتحرك ايضا.

في البطولات الافريقيه تقدر تتفرج علي كل المباريات الافريقيه مجانا عن طريق الفيدات. والفيدات بيكون عباره عن تردد. او مزود خدمه وبيظهر قبل المباريات بساعات وطبعا لازم الفيد يظهر لان الفيد لو مظهرش القنوات اللي مشتريه الحقوق مش هتنقل

الفيد طبعا بيكون مضمون بنسبه كبيره بس ليه متطلبات اهما فني محترف وعدسه محترمه. نفس الحال بيكون موجود لأكثر من حدث مثل بطولات المصارعه والتنس وغيره من الاحداث الهامه

الخلاصه 👉

لو انت بتعاني من كل يوم مصاريف ومش عارف تتفرج علي حاجه يبقي تكلف نفسك مره في العمر وتريح نفسك وتجيب طبق متحرك

طبعا حاليا الاطباق المتحركه مش موجود منها جديد فا الافضل انك تشوف طبق متحرك يكون حالته كويسه وتجيب عدسه محترمه وفني محترم وهتشوف الدنيا كلها

الطبق المتحرك مش بس حلو للرياضه لالا وكمان تقدر تشوف قنوات افلام كثيره جدا جدا علي اقمار كتير
اهم مايميز الطبق المتحرك انك تقدر تشوف العالم كله ومفيش اي مباره هتفوتك حتي لو في الدوري الصيني😂
 
🔥 في ناس كتير هتطلع تقؤلك ان فيه ناس كتير هتقؤلك ان الطبق المتحرك مشاكله كتير ؟ 

🎙 هرود انا واقؤلك صح علي فكره بس عارف مين السبب في المشاكل دي. اقؤلك انا الفني ايوه الفني هو اللي يقدر يخليك تتفرج بالسنين وتنسي الدنيا وهو في نفس الوقت اللي ممكن يخليك تكره نفسك. لان السبب الرئيسي في مشاكل الطبق هي الماتور ومعظم الفنيين اساسا مبتعرفش تتعامل مع الماتور ولا مشاكله خصوصا السينسور ؟

🔥 طب ايه ياعم احمد السينسور ده ؟ 

🎙 اقؤلك انا ياسيدي السينسور ده المسؤل الاول عن تخزين الاقمار بمعني ايه بالبلدي كده. يعني انت مثلا علي القمر النايل سات وعايز تروح القمر الاوربي السينسور وظيفته ان يخلي الماتور ماشي لحد القمر ويقف يعني بيحفظلك اماكن الاقمار.
طب مشاكله ايه. مشاكله ان معظم الفنين بتسيب مدار الماتور مفتوح. بمعني دلوقتي انا الطبق بتاعي بيستقبل مثلا من 30 درجه غرب الي 62 شرق. الماتور يقدر انه يكمل لحد 110 درجه وساعتها بيحصل ساعات كسر في الماتور او السينسور بيضرب وساعت الطبق مش بيتحرك.

 والحل طبعا ان المفروض الفني المحترم انه يقفل مدار الطبق او السينسور يعني لحد اخر قمر انت عايزه بحيث الطبق بعدها ميتحركش وفي نفس الوقت انت بتحافظ علي الماتور

طيب الطبق المتحرك هيكلفني كام كده علشان اريح دماغي؟

هتلاقي اطباق 160 و 180 وطبعا الافضل 180 علشان بتقدر تستقبل 99 % من الفيدات. 160 بيستقبل برضه بس فيه فيدات ممكن ميستقبلهاش بس بيقضي الغرض برضه

ولو عايز كل اقمار الشيرنج والمجاني يبقي عليك وعلي الطبق 130 وممتاز ومش بياخد مساحه علي السطح وفيه منه جديد
الاطباق المتحركه بتبدء من ،750 وانت طالع لحد 1500 حسب حاله ونوع الطبق والماتور ووحده التحريك وفي ناس كتير عندنا هنا في القاهره بتبعها

في فنيين كتير هتقؤلك ان الطبق المتحرك فاشل ؟ 
 
اول مايقؤلك كده اعرف انه فني علي قد حاله جدا وعلشان مبيعرفش يركب الطبق المتحرك فاهيقؤلك كده
ملحوظه 80% من الفنيين في مصر ملهاش في المتحرك والكلام ده عن ثقه هات الفني الصح
الخلاصه الطبق المتحرك راحه بال ل سنين وسنين
يارب اكون عرفت اوصلكم المعلومه
وانتظروني قريبا في موضوع جديد
تحياتي اخوكم احمد عز
ليست هناك تعليقات

تعريب كن مدون جميع الحقوق محفوظة لــ مدونة عرباوى 2013-2019 ©