إزاي تحلل المنافسين لموقعك وتتغلب عليهم بسهولة

 

في هذا الموضوع يقدم لنا /Ahmed Abdul hadi استراتيجية تحليل منافسي موقعك ومدونتك علي الكلمات المفتاحيه وطريقة استخراج الكلمات المستهدفة وكيفية التعامل معها بشكل مبسط

أولاً لازم نعرف 9 حاجات مهمة قبل مانفحص أي موقع وهما :

1. عمر الدومين له إحترامه بالنسبة لجوجل خصوصاً لو موقع مش مهمل ومستمر العمل عليه ومفيهوش اخطاء أه تقدر تتغلب عليه ولكن بصعوبة شوية .
2. عشان تتغلب علي منافس لازم يبقى عندك صبر وطولة بال .
3. وصولك للصفحة الأولى ده مش نجاح نهائي لأن بمجرد ماتبقى صفحة أولى كل خطوة لأعلى هي أصعب من اللي فات كله .
4. طول مانت بتقدم محتوى محترم ومفيد بإستمرار وبتتعب ربنا هيديك ع قد تعبك .
5. إختيار الهوست أهم خطوة في بناء الموقع الخاص بيك .
6. اخرج من دايرة كلمات المنافسين والعب علي كل الكلمات الممكنة وركز علي الأضعف ثم الأقوى بمعدل شهري ثابت .
7. الديزاين وتهيئته لمحركات البحث ده تاني أهم شئ بعد الهوست .
8. محركات البحث التانية زي BING و Yandix بيجيبوا زوار كتير ع فكرة .
9. لازم تصرف علي موقعك وع التولز بتاعتك عشان تقوى نفسك وتبقى مميز .

رقم واحد إزاي تعرف كلمات المنافسين ليك

معلش انت مش محتاج تعرف أية هي كلمات المنافسين إنت محتاج تعرف الناس بتبحث عن أية وده تقدر تعرفه من trends.google.com وهشرح الموقع ده بشكل كامل الدرس الجاي .

وكمان محتاج تعرف أية هي الكلمات اللي بتجيب ترافيك للمنافسين ودي تقدر تستخدم فيها اي بلاجين وطبعاً الاكثر إنتشاراً هي ahrefs رغم إنها ضعيفة في الحتة دي ولكن الكل بيستخدمها فانا هشرح الجزئية دي فيها ببساطة

ahrefs هي مش مجانية ولازم تشتريها وفي ناس بتعمل جروبات مع بعض
ويشتركوا فيها بحيث يتوزع سعرها علي اكبر عدد ممكن وده شئ كويس .

ومبدئياً مفيش بلاجين كويسة مجانية .

طبعا هتخش هنا https://ahrefs.com

وتسجل دخول وبعدين هتحط الموقع اللي عايز تفحصه في المكان اللي ظاهرفي الصورة رقم 1 .

 

هيتفتحلك شاشة تانية زي اللي في الصورة رقم 2 وهتختار منها Organic keywords

  

ثم بعد كده لازم السهم يبقى نازل علي كلمة ترافيك زي ماهو ظاهر في الصورة رقم 3

 

واضرب الترافيك اللي ظاهرلك ده في 5 أقل حاجة لان دايما الترافيك اعلى من اللي بيظهره ahrefs في المحتوى العربي .

وبكده انت عرفت اعلى كلمات ترافيك بالنسبة لكل موقع منافس ليك .

نيجي للنقطة التانية ازاي اشوف الباك لينك بتاعه .

في الصورة رقم 2 أختار كلمة backlinks وكده جبت كل الباك لينك بتاعه .

هتقعد بقى تلفتره وتشوف هو واخد باك لينك منين وأوعى تقلده إلا في حالة الباك لينك الجيست بوست .

ده كده شغل التولز اللي انا اصلاً مبحبوش  

نيجي بقى للشغل بتاع الناس اللي عايزة تعمل حاجة

ولنفرض إنك بتستهدف كلمة ( س ) .

هتبحث عنها وتشوف كل المواقع صفحة اولى وصفحة تانية بيقدموا أية افادة في مقالاتهم وتعمل كوكتيل جميل من افادتهم وتضيف عليه حاجات جديدة ومعلومات جديدة أو حتى تضيف بساطة في المحتوى اكتر بحيث يبقى محتواك مقبول اكتر من اي حد وتنشر مقالك .

متركزش في عدد صور ولا عدد فيديوهات ولا الكلام ده كله الصور بتستخدم عشان تجيب منها زيارات من google img وعشان تفصل عين الزائر عن القراية شوية والفيديو بيستخدم لو كان في شرح إنت مش هتكتبه فابتعوضه بفيديو غير كده ملوش لازمة .

ركز أوي في تنسيق المقال وعدم وجود اخطاء إملائية في محتوى الفقرات وكذلك خلى شكل المقال يتحب يتقرى مش مجرد كلام وخلاص .

دايما حاول تشوق الزائر يقرا الفقرة اللي جاية عشان تضمن إنه هيقرا مقالك للأخر .

وطبعا مش هشرح حتة الكلمات الفرعية لأني شرحتها قبل كده ولكن لازم تستهدف بمقالك الواحد اكتر من 20 كلمة جزء منهم h2 وجزء h3 وجزء فقرة عادية حسب طريقتك بتتعمل ازاي دي مفيش فيها خلاف رغم إن اقواهم الـ h2 .

العنوان بتاعك إما يبقى جذاب او بيجاوب ع تساؤل ما .

خلصت المحتوى بتاعك وظبطته أوعى تعمله باك لينك نهائي  

انت كده فحصت المحتوى بتاع كل المنافسين وعملت محتوى اقوى منهم وافضل منهم ومبسط عنهم لا مش كده بس بقى لازم تستهدف اكبر عدد كلمات بيبحث عنها الناس في إطار موضوع مقالك وتجاوب عن اي استفسار ليهم عشان تبقى بتقدم افادة كاملة للزائر مش مجرد عشان تتميز عن غيرك .

بعد مباتعمل محتوى كويس لمقال ما بتطبق نظرية الإنترنال لينك اللي شرحتها هنا https://www.facebook.com/groups/SeoLessons/permalink/545324102821145/

خطوتين مهمين اوي

• متسيبش موضوع بتتكلم عنه غير لما تخلص كل المقالات اللي ممكن تتكتب فيه وتربطهم ببعض وكلهم يكونوا بيقدموا افادة كاملة وبيستهدفوا كلمات مختلفة عن بعض .
• ومتعملش باك لينك ليهم نهائي دلوقتي .

بعد ماعرفت تعمل مقال محترم ومحترف وجبت كل كلمات البحث المتعلقة من جوجل مش من تولز وركز علي اللي بقوله كويس من جوجل ومش من تولز .

كده انت بقيت افضل من المنافس بتاعك كمحتوى .

هتفضل مكمل شغل ع كده في كل مقالاتك لحد ماكل مقال يبدء يخشله علي الاقل 20 زائر يومياً مش 20 زيارة .

في اللحظة دي لازم تفكر في طرق باك لينك تخليك افضل من المنافس .

طيب اية هو افضل طرق الباك لينك

مع إحترامي للجميع الجيست بوست هو افضل طرق الباك لينك وده لكذا سبب وهما :

• محدش هيقدر يديك باك لينك في موقع مبيسمحش ليك تضيف رابط في الكومنتات او تعمل مقال غير اللي معاه صلاحيات يخش علي لوحة تحكم الموقع اللي في الغالب تحت إدارة صاحب الموقع اذا لما يتعملك باك لينك فيه جوجل هيقتنع مليون في الميه إن موقعك مفيد وده خلى الموقع ده يشير ليك في مقال عنده .
• إنك هتتغلب علي ناس كتير شغالة بس باك لينك منتديات وادلة والشغل الفاضي ده فاهتبقى أنت اقوى منهم وهتتقدم .

نرجع هنا للباك لينك اللي فحصته من المنافسين طلع مواقع الجيست بوست اللي عملوا فيها وحطها اول تارجت ليك بمعدل شهري ميزدش عن 6 مواقع .

بعد ماتخلصهم ابدء دور علي مواقع تانية .

اهم حاجة تصبر ومتستعجلش علي الربح أي حاجة ناجحة لازم يتصرف عليها الاول .

ركز بقى معايا في نقطة مهمة وهي الهوست والديزاين .

1. وانت بتشتري تمبلت او ديزاين او اياً كان ركز إنه يبقى سريع جداً ومفيهوش ملفات كتير بتحظر عرض المحتوى وانه يبقى متظبط بنسبة 100% كـ SEO وكـ سرعة .
2. وانت بتاخد هوست بلاش الهوست الرخيص نصيحة ودور ع مكان يكون متجرب وسمعته كويسة مدام بتبني حاجة مهمة والافضل تشتري vps .
3. وانا هنزل اماكن موثوق فيها للهوست والفي بي اس قريب .
4. اوعى تسمع كلام اللي بيقولك لازم تكتب عدد مقالات اكتر منه ولازم تنزل صور وفيديوهات اكتر منه صدقني ده كلام ملوش اي اساس من الصحة .
5. لازم تبقى متطور وتستخدم سكيما في موقعك بشكل مميز وفي اضافات كتيرة للإسكيما في الووردبريس زي schema pro
6. لازم تظبط الكاش وملفات البرمجة عشان ده بيأثر ع سرعة موقعك وفي الووردبريس في عندك wp-rocket وهي افضلهم .
7. خليك دايما متطور ومتابع سياسات جوجل الجديدة وتحديثاته عشان متتاثرش بيها .
8. شوف حد كويس يظبطلك اون بيدج الموقع ويبقى موثوق فيه لو مش هتقدر تظبطه لوحدك لإن ده مش شئ سهل .

انا كده خلصت

بالتوفيق للجميع  

تعديل المقال