القائمة الرئيسية

الصفحات

مقال مهم : خطورة صور الشغل من البيت

بعد الكوفيد بقينا بنشتغل من البيت وبنقضي وقت كتير في الشغل وفي منا نزل وعمل مكتب او مكان مخصص للشغل وزي اي مواطن مواكب للعصر حب يوري لصحابه اللي علي مواقع السوشيال ميديا المكتب الجامد اللي عمله.

صاحبنا حط صورته او صورة المكتب اللي عمله وحط الهاشتاج المشهور WorkFromHome او WorkingFromHome او HomeOffice. 
مقال مهم : خطورة صور الشغل من البيت


المقال من اعداد المهندس /Mohamed Nabil
 
صاحبنا جاله إيميل من الشركة اللي اشتري منها المكتب بتقوله انه كسب جايزة وطلبت منه يفتح الملف المرفق يختار الجايزة.
هوب اول ماصاحبنا فتح الملف لبس فيروس ولبس في حيط.
ليه حصل لصاحبنا ده؟
بص ياصديقي في تريند دلوقتي او بقاله فترة انك تحط صور وانت شغال من البيت او مكالمات زوم بتاعت الشغل وليها هشتجات زي اللي فوق دي
 
وبعدين برده؟
اتقل. هنا احنا هنقع في كمين قديم اوي بينصبه لينا الأشرار وهو فخ افورة الشير.
انت تقعد تنزل صور كتير ليك وانت بتشتغل او في فيديوكول او فاتح ايميل الشركة في اللابتوب او حتي حاطط جواب يبين عنوان بيتكوا.
 
هنا ياصديقي يجي الهاكر من دول يبص علي الصورة ويطلع منها بياناتك الشخصية ويعملك تصيد الكتروني موجه ليك انت.
وياسلام بقي لوحاطط حاجة ليها علاقة بالشغل سرية المفروض محدش يعرفها وهنا الهاكر يستلغها في الهجوم علي شركتك.
الموضوع ده هيساعده كمان في تخمين كلمات السر بتاعتك. 
 
يعني انت حاطط صورة عيد ميلادك مثلا وكاتب مصنوع سنة 1980 ومنزلها يوم 20 شهر 9. يروح الهاكر بعاتلك كارت الهدايا الالكتروني منتحل شخصية واحد صاحبك بيقولك كل سنة وانت طيب. تيجي تفتح الكارت يحصلك زي اخينا اللي فوق وكل سنة وانت طيب.
 
ايه ياعم الافورة دي.
 
هحكيلك قصة حصلت معايا انا شخصيا. واحد صاحبي كان حاطط صورة ليه وهو شغال متأخر وهاشتاج حسبي الله ونعم والوكيل.
طبعا عيني اول حاجة شافتها في الصورة نوع الVPN اللي بيخش بيها علي الشركة والIP اللي بيخده كمان يعني احلي تصيد الكترني واحلي اختراق لشركتهة.
 
مش مقتنع. خد دي. 

في مغنية يابانية ليها معجبين بالالاف نزلت صورة ليها جوا بيتها, واخد بالك من جوا بيتها دي؟
بعديها بكام يوم معجب من بتوعها عرف هيا ساكنة فين وحاول يتحرش بيها.
 
اخينا لما اتمسك قال ايه بقي؟
انه فضل يعمل زوم علي صورة سيلفي هي نزلتها ولقي في عينيها انعكاس لمحطة قطر اللي هي ساكنة قدامها. راح فتح جوجل ستريت فيو وحدد هي انهي محطة وراح استناها هناك.
 
مش بس كده البرنس كان عمال يفحص في صورها ويشوف اتجاه ضوء الشمس اللي داخل من الشباك ومكان الستاير علشان يحدد هي ساكنة في انهي دور!!!!!
 
اقتنعت؟!

دلوقتي بقي نعمل ايه علشان نحمي نفسنا؟!

  1. - متحطش اي صورة فيها معلومات شخصية عنك زي انت ساكن فين او علامة مشهورة تبين انت ساكن فين. طبعا عنوان بيتكوا.
  2. - الصورة ميكنش فيها صور لصحابك او اهلك مثلا وراك في الخلفية. صور فريقك المفضل او حتي منتج مشهور.
  3. -صور لشغلك او معلومات حساسة.
  4. - لو في مكالمة فيديو ممكن تقعد ووراك حيطة فاضية
  5. -كل البرامج فيها صور خلفيات ممكن تستخدمها او تخلي الخلفية مش باينة.
  6. -بطل تنزل صور كتير لأن كده بتديله مادة دسمة يقدر يطلع منها معلومات عنك.
  7. من الاخر اتحكم دايما ايه اللي طالع في الصورة وركز لتتهاك.

مصادر:


تعليقات