القائمة الرئيسية

الصفحات

المعالج مش اهم حاجه & لولا إختلاف الأذواق لبارت السلع

مؤخرا فيه نقاش بين الناس على جملة "المعالج مش اهم حاجه" ، فيه منهم إللي أيِّد النقطه دي ، وفيه منهم إللي قال انها غلط
هي الحقيقه صح وغلط في نفس الوقت ، لأن بكل اختصار الموبايل ده زيه زي الكيكه اللي أنت بتعملها ، هتزود حاجه على حساب غيرها هتبوظ طعم الكيكه ، إنما لو ظبْط كل حاجه بتساوي هيتطعلك ف الآخر طعم مثالي.

 

المعالج مش اهم حاجه & لولا إختلاف الأذواق لبارت السلع

لما واحد يكون عاوز يعمل كيكه مثاليه لازم يحط مقاديرها بعنايه وتركيز عشان يطلع طعمها في الآخر حلو... فيه اللي بيحب يزينها ف الآخر وفيه اللي بيحب يسيبها زي ما هي.

وعلى نفس المثال : الموبايل لازم يكون متوازن في المواصفات..... متروحش مثلا تحطلي معالج ضعيف نسبيا على ٨ ولا ٦ رام زي ما انفينكس عملت في اجهزه اقتصاديه ، صح انها كانت مفيده في عدم غلق التطبيقات اللي ف الخلفيه ، ولكن كان ممكن الفلوس دي تُستغَل في حاجه تانيه احسن


هاخد ف الموضوع ده مثالين سامسونج وشاومي وهما من اكتر الشركات اللي عليها نقاشات كتيره مؤخراً....


محدش يقدر ينكر ان شاومي كان ليها دور كبير جدا في تغيير او "شقلبة" السوق.... من اول النوت ٥ وشاومي بتقدم خلطة مواصفات وخامات ممتازه جدا تخلي الشركات التانيه تلف حوالين نفسها ، صح ان كان أحيانا  بيبقا فيه عيوب صناعه هنا وهناك ولكن قلِّت مع الوقت...


واجهة شاومي واجهه ممتازه ومن افضل واجهات الاندرويد ، ولكن يلزمها معالج قوي يستحملها لانها تقيله حبتين ، فا لما تجرب جهاز شاومي بمعالج رائد بتاخد أداء حرفيا يقتل كل اللي موجود في فئته ..... ولكن...


هل فعلا المعالج هو كل حاجه؟ هل فعلا لو معالج قوي هيأدي لجهاز كامل؟

خليني الاول اتكلم عن سامسونج وبعدين اجاوب على النقطه دي ف الآخر...
سامسونج من اكثر الشركات مبيعا في مصر ، وهي رقم واحد في المبيعات في العالم ، وطبعا كلنا عارفين ان ده بسبب اسم البراند العريق وثقة المستخدم في الشركه ، ولكن انا هتكلم عن سلسلة الA تحديدا.....


سامسونج دايما مش هتلاقيها الشركه اللي بتقدم مواصفات الأفضل في فئتها ، ولكن هتلاقي سامسونج مُتمكنه جدا في تقديم جهاز اقرب للكمال في فئته ومتوازن من ناحية كل المواصفات.... باكيدج متكامله مريحه المستخدم *العادي*... فاكر مثال الكيكه؟ D':
دلوقتي بقا ...... 

هل فعلا المعالج هو اقوى واهم قطعه في الجهاز؟

الصراحه انا شايف ان ميقدرش يجاوب على السؤال ده إلا أنت ؛ لأن كل واحد ليه اهتماماته ، فينا اللي بيلعب بال٥ ساعات طول اليوم ، فينا اللي بيحب ينزل رومات ويعدل على جهازه ، فينا اللي بيفضل مساحه كبيره على حساب المعالج لأن طبيعة عمله بتفرض عليه كدا ، فينا اللي نفسيته بترتاح لشركه تانيه عن غيرها


فا ف الآخر هتلاقي سامسونج وشاومي كل شركه فيهم بتزق التانيه معاها ، سامسونج مثلا النهارده نزلت جهاز بتثبيت بصري إلكتروني شاومي بكره تنزل جهاز زيه وهكذا


متفكرش ان عشان انت شخص مبتحبش يكون فيه اي تسقيط فريم ف الإستخدام ان الناس كلها زيك ، لا فيه ناس عادي بالنسبالها ان أداء المعالج ميكونش افضل حاجه مقابل انه ياخد جهاز يرتاحله نفسيا او واجهه مستقره مريحه
الشركات كل اللي يهمها انها تكسب العميل وتخليك تشتري جهازهم فقط ، ولا هيفرق مع الشركه إذا كنت بتطبلها ولا لا (واللي هو مصطلح بكرهه جدا من كتر ما بقيت اشوفه عند اليوتيوبرز).... فا خليك اذكى من انك تفضل تبرر لشركه افعالها لان الشركه مش هتديك فلوس على كدا


دايما تَيقَّن ان اللي قدامك ده ليه اهتماماته واسأله عليها قبل ما تقترحله جهاز ، ولازم تعمل حساب العامل النفسي فا لو واحد بيقولك انا بحب اجهزة شركة A وبرتاحلها ، اقترحله جهاز من الشركه دي ومتحاولش تغير رأيه لأن اصعب حاجه تغيرها هو الإرتياح النفسي لشركه محدده ((ولكن ليست مستحيلة التغيير)) ، ونفس الكلام مع شاومي ولا ابل ولا اوبو


مفيش شخص عاقل هيروح يجيب جهاز لمجرد انه بيقدم حاجه هو مش مهتم بيها ، فا ف الآخر كل الشركات بتحاول تَتفنن في الزينه اللي بتحطها على الكيكه عشان تجذبك ليها وكل واحد بقا وذوقه ، فيه اللي بيحب الشكولاتة وفيه اللي بيحب الفانيليا
دايما احترم رأي اللي قدامك ومتقللش منه لمجرد انه شايف اجهزة شاومي اوفرريتيد او اجهزة سامسونج زباله......


دايما خليك مقتنع بجملة "ولولا إختلاف الأذواق لبارت السلع"

- هل البروسيسور هو اهم قطعة فى الجهاز ؟
- هل الناس اللى بتشترى موبايلات مش باقوى معالج دول مضحوك عليهم ؟
- هل اشترى الجهاز لمجرد ان فيه اقوى بروسيسور ؟
.. دى اسئلة بس حابب اناقشها بوعى شوية وموضوعية
البروسيسور قطعة مهمة جدا لكن هل هى اهم قطعة ؟ الاجابة لا وكمان مفيش حاجة اسمها اهم قطعة فى الموبايل هى كذا .. وده يودينا للسؤال الاخير واللى اجابته لا برضه وبالتبعية فالناس اللى بتشترى موبايل بمعالج اقل مش مضحوك عليهم ولا حاجة الحقيقة ان انت اللى مضحوك عليك عشان فاكر ان المعالج اهم حاجة :))
لما بتيجى تجمع كمبيوتر بتشترى بكل فلوسك كارت شاشة ؟ بتشترى بكل فلوسك معالج ؟ او 90% ؟ طيب 80% ؟ اكيد لا بتحاول توزع الميزانية على الجهاز وتخلى اكبر جزء من الفلوس بتاعتك للاولوية سواء كارت الشاشة او المعالج والباقى بتجيب بيه حاجات تقدر تشغل القطعتين دول كويس وتخليك تستفيد 100% منهم عشان مفيش فايدة انى اجيب RTX 2080 واشغله مع i7 4770K مثلا !
ده اللى بيحصل فى الموبايل .. انت ممكن تاخد اقوى معالج بس هتستفيد منه فى عمليات محددة زى الالعاب ونوعا ما الاداء اليومى ( صدقنى لو جبت حاجة زى 765 او 855 على سوفت وير كويس فى الاداء اليومى العادى مش هتحس بفرق .. عايز مثال ؟ امسك ايفون 11 برو وامسك ايفون اكس اس وايفون 12 برو هتلاقى الفروق عادية فى الاداء وكلهم كويسين جداا رغم ان فيه فرق محترم بين الاضعف والاقوى فى المثال ده )  ... لكن مش هتاخد معالجة البروسيسور القوية فى الصور ولا الفيديو وممكن تخسر قصادها شاشة او صوت او تصميم او حاجات تانى .. اول عن اخر انت مش بتشترى بروسيسور انت بتشترى موبايل وده كومبو على بعض فوق ده كله فيه حاجة اسمها سوفت وير ! فيه تفضيلات وفيه مميزات لكل سوفت وير وحقيقى راحتك مع حاجة معينة تستاهل انك تدفع فيها فلوس .. فيه توافر اكسسوارات وضمان واعادة بيع ! كل ده مش هيدهولك المعالج اللى انت فرحان بيه !
هجاوب على السؤال الكوميدى الشهير دلوقتى .. هههه انت عايزنى اسيب 865 عشان اجيب 720G ؟ ههه .. معنى انك تسال السؤال ده انت حاجة من اتنين يا انت مش عارف السوق فيه ايه يا انت عايز تكتب كومنت وخلاص .. مين قالك جيب 720 ؟ انا قولت ؟ عارف فيه ايه فى سعر من 6500 - 8500 معالجات ؟
SD 720G
SD 765
SD 855
SD 865
Exynos 9825
Exynos 9820 لو حظك حلو ولقيت اس 10صغير
Exynos 9810 with S-Pen
Exynos 990
ليه اخترت اضعف معالج فيهم ؟ ما هو قدامك اختيارات كتير وكل واحد ليه ميزة !! .. فيه اللى بقلم .. فيه معالج قوى اموليد 60 هيرتز .. فيه سناب 855 بشاشة 90 هرتز .. فيه 765 مع شاشات 90 وضمان محلى لو حابب وتوافر .. فيه موبايل بريميم حجمه صغير نوعا ما .. فيه وحش اداء ب865 .. فيه موبايل مثالى فى كل تفصيلة لو هتستحمل سخونة 990 .. عندك بحر اختيارات ! ليه لازم ابقى مجبر اجيب موبايل "س" عشان فيه اقوى اداء وخلاص ؟ لو بعد ده كله شايف ان الناس دى كلها مضحوك عليها فالعكس هو اللى حصلان صراحة
"المثال للتوضيح انا مش بهاجم المى 10 تى عشان انا من اكتر الناس اللى دافعت عنه اول ما نزل ولدلوقتى لكن هو مثال واضح وبارز ان البروسيسور مش كل حاجة وطبق كلامى على كل الفئات ماعدا الاقتصادية لان انت محتاج الحد الادنى من الاداء اللى يشغل موبايلك مرتاح"


 المقال من طرف / Mostafa AbuAyash & Kero Sheanoda

تعليقات