في مبرمج بيقبض ألف جنيه في الشهر وفي مبرمج بيقبض 10 ألاف وفي 20 ألف جنيه وفي مبرمج بيشتغل بره مصر وبيقبض 10 آلاف دولار في الشهر وفي مبرمج نفسه يشتغل بره مصر بس مش عارف، كلهم خرجين نفس الكلية، كلهم عندهم تقريبا نفس المعلومات عن المجال، وأحيانا بتلاقي واحد معلوماته أقل ماسك منصب أكبر.
كنت باستغرب جدا لما بشوف عميد كلية هندسة في جامعة مرموقة ومش فاهم حاجة في الهندسة، واستغربت أكتر لما لقيت عميد كلية حاسبات في كلية من الكليات المصنفة عالميا خريج كلية تجارة ومعهوش دكتوراه
-
الموضوع مش في الكليات بس، حيقابلك كتير في حياتك ناس في مناصب كبيرة في شركات كبيرة جدا كنت إنت متخيل إن الناس دي المفروض يكونوا بكفاءة معينة لكن لما عرفتهم معرفة شخصية إكتشفت إنهم مش فاهمين حاجة خالص بمفهومك الشخصي
طيب لو هما فعلا مش فاهمين حاجة، إزاي الشركة اللي شغلتهم دي شركة كبيرة، وإزاي الجامعة اللي شغلت الدكتور ده جامعة كبيرة؟
الحقيقة إن أي شركة في الدنيا هدفها إنها تكسب، لو في شركة فيها الكفاءات الهندسية للعالم كله ومش بتكسب ومش عارفة تدفع مرتبات لا الموظفين حيفضلوا في الشركة ولا الشركة حتفضل شركة، هتفلس وتقفل أو تتباع.
-
ابسط مثال علي كدة شركة رولز رويس، أقوي شركة عربيات في العالم، مواتيرها بتستخدم في الطائرات، طبعا الموتور المستخدم في الطيارة يختلف عن المستخدم في العربية لكن هي نفس الشركة بتنتج مواتير للطائرات والسيارات ومعظم طائرات العالم مواتيرها رولز رويز وده يوضحلك كفاءة المهندسين اللي في الشركة دي، ومع ذلك الشركة فلست سنة 1998 والحكومة البريطانية قررت تبيعها واتباعت لشركة فولكس وBMW وكل واحد أخد جزء من الشركة
ايضآ شركة نوكيا الشهيرة وغيرها من الشركات اللتي لم تواكب التقدم والتطوير.
معظم الطلبة عموما بيركزوا علي الجزء الـ technical أيام الكلية ويبذلوا أكبر مجهود عشان يفهموه وبعد التخرج يكتشف إن مديره أصلا مش مهندس ولا يفهم في البرمجة، بس بيفهم في البزنس وبياخد مرتب أكتر منه بمراحل، أي شركة فعلا هدفها تكسب والمعلومات الـ Technical مش هتخليك تقدر تخلي الشركة تكسب لكن هتخليك لما مديرك يقولك نفذلي كذا تنفذه وده جزء صغير من نجاح الشركة في أي وقت يشيلك ويجيب مبرمج تاني هيعمل نفس الشغل لكن في ناس معينة في كل شركة لما يمشوا الشركة كلها بتتأثر ولازم تتعلم تكون واحد من دول وانت بتتعلم Technical ده هيفرق جدا في ترقياتك وفي مرتبك في المستقبل
-
في أمثلة كتير أنا شفتها في حياتي لكن عايز أجيب مثال سهل معظمنا شافه، مثلا تلاقي مركز صيانة محترم جدا فيه مهندسين فنيا مش جامدين، لكن ميزة المهندسين مظهرهم الشيك وطريقتهم في الكلام مع العميل ويحسسه إنه أكتر شخص مهم والعميل يسلم العربية والمهندس يستلمها ويدخلها جوه الشركة للصنايعي يشتغل فيها والمهندس مش بيعمل أي حاجة غير إنه بيقابل العملاء ويبسطهم ويخليهم يدفعوا في التوكيل أضعاف اللي بيدفعوه بره مع إن هو نفس الصنايعي اللي في التوكيل عنده ورشة في الحرفيين بيشتغل فيها بعد الظهر بربع ثمن التوكيل لكن مفيش مهندس يقابل الناس ويحسسهم بأهميتهم ويخليهم مبسوطين وهما بيدفعوا فلوس كتير
تلاقي المهندس الشاطر Technical لكن معندهوش فن التعامل مع الناس مش عارف يشتغل في التوكيل عشان مش مهتم بمظهره وطريقة كلامه لأنه كان مركز في تعليم حاجت Technical وسايب جزء تاني هو مش شايفه مهم لكن في الحقيقة هو مهم جدا
- - -
لازم تكون Technical شاطر طبعا لكن لما تتعلم Technical حاول تتعلم مهارات تانية تفرق في حياتك العملية، ولازم تتعلمها من حد لف وشاف شغل في كل حته، حد حياته واضح إنها أعلي من باقي الناس اللي خريجين نفس الكلية، وحاول تتعلم منه الحاجات اللي بره المنهج اللي خليته يوصل للي هو فيه هو اتخرج من نفس الكلية لكن وصل لمكانة أعلي من الباقي بنفس المعلومات الـ Technical، أكيد في معلومات تانية كانت السبب في إنه يوصل لمكانه أعلي من غيره، محتاج تعرفها وتتعلمها مينفعش تبقي ضعيف فيها وبعدين تشتكي أنا ليه مش عارف أشتغل بره وليه المرتبات ضعيفة وتفضل تحط لنفسك مبررات للفشل
المصدر: مليون مبرمج مصري