القائمة الرئيسية

الصفحات

بصمات الأصابع بالموجات فوق الصوتية: كيف تعمل في الهواتف؟

كلنا بقالنا فترة كبيرة بنستخدم البصمة اللي تحت الشاشة دي، بس عمرك فكرت هي بتشتغل ازاي اصلاً وازاي وصلنا لحاجة زي كده؟

نقطة ايه البصمة اللي تحت الشاشة دي كلنا عارفينها، هي عملياً زيها زي البصمة اللي في الضهر او في زرار الباور، لكن تقنياً مختلفة تماماً.. فا تعالي اقولك شغالة ازاي.   
بصمات الأصابع بالموجات فوق الصوتية: كيف تعمل في الهواتف؟


 

كيف تعمل بصمات الأصابع في اسفل شاشة الهاتف الهواتف   

خلينا نبدأ بالنوع الأول والأكثر شهرة الا وهو الـOptical Fingerprint sensor، وده من اسمه " optical " معتمد علي انه " يشوف " بصمة صباعك.. وعشان كده مستشعر البصمة ده في الأساس عبارة عن كاميرا !
 
الكاميرا دي المفروض انها بتستخدم الإضاءة بتاعت شاشتك الـOLED عشان تنور صباعك - النور اللي بيظهر لما تحط صباعك ع البصمة - وبعدها يقوم واخد صورة ثنائية الأبعاد من صباعك ويقارنها بقائمة البصمات المتسجلة عنده.. اول ما يلاقي match هيقوم يفتح الجهاز
 
التقنية دي جميلة وكل حاجة ونوعاً ما آمنة، لكن بسبب انها بتاخد صورة ثنائية الأبعاد من صباعك فا هي اقل اماناً بكتير من النوع القديم اللي كنا بنستخدمه وهو الـCapacitive fingerprint sensors، وعشان كده سامسونج قالت لأ انا مش هستخدم البتاع ده في الفلاج شيب بتاعي، احنا نعمل واحد تاني ونسميه Ultrasonic fingerprint sensor، بيعمل ايه ده بقي؟
 
 
 

تقنية Ultrasonic fingerprint sensor "ماسحات بصمات الأصابع بالموجات فوق الصوتية"

هنا السينسور مش " بيشوف " بصمة صباعك بالظبط.. هو بيحس بيها - اهم حاجة الإحساس ❤ -
اللي بيعمله السينسور ده هو انه بيبعت موجات ultrasonic لصباعك لما تحطه ع الشاشات.. ودي موجات ترددها عالي وانت نفسك ماتقدرش تسمعه.. بعض الموجات دي بقي هتعدي من الشاشة عادي
 
لكن بعضها هيخبط في صباعك او بمعني اصح بصمتك بكل تدرجاتها ويقوم رادد وراجع تاني للسينسور
اول ما الموجات دي ترجع للسينسور الـUltrasonic بتاعنا، فيه سينسور تاني بيقوم يقيس شدة الموجات دي عند كل نقطة علي السينسور، بسبب ان صوابعنا مش مستوية او flat فا هي فيها تدرجات صغيرة جداً وبسيطة
 
التدرجات دي بتخلي فيه فرق بين شدة الموجات الصوتية اللي بترجع من صباع حضرتك للسينسور تاني، وبالتالي سينسور البصمة وقتها بيقدر يرسم صورة ثلاثية الأبعاد لبصمتك بإستخدام البيانات دي ويقوم يقارنها بالبصمات اللي اتسجلت عنده بنفس الطريقة.. ولو حصل match بيفتح
 
سامسونج بتستخدم النوع ده من المستشعرات في اجهزة الفلاج شيب بس، اما الأجهزة المتوسطة بتستخدم المستشعر الـoptical اللي قولنا عليه فوق عادي
 

طب ادينا عرفنا النوعين بيشتغلوا ازاي، ليه بقي الشركات بتعمل ده كله ؟

الحقيقة النقطة دي تقدر تفسرها براحتك ومحدش هيقدر يقولك انت غلط، تعالي اقولك بعض النظريات المطروحة في النقطة دي وانت خد اللي ع مزاجك
 
احد الأسباب اللي اتكررت كتير وهي ان الشركات عاوزه تخلي شكل الموبايل clean اكتر، من غير ما يبقي فيه دايرة ولا مربع في الموبايل من ورا مبوظه شكل الضهر
 
لكن اللي بينفي الحجة دي هو وجود بصمات capacitive في زرار الباور عادي، ودي حرفياً مش باينة
فا السبب التاني هو مجرد احساس ان البصمات اللي تحت الشاشة جايه من المستقبل، الفكرة لوحدها futuristic كده، حتي انا افتكر زمان ان كان فيه برامج ع البلاي ستور كده بتبدل اللوك سكرين بتاعتك وبتعمل كإنك عندك بصمة ع الشاشة وهي مش بصمة ولا حاجة
 
فا ده كان كونسيبت الناس كانت بتحلم بيه، والحلم اتحول لحقيقة اهو
 

خاتمة المقال

رأيي في البصمات اللي تحت الشاشة حالياً انها افضل " مكان " للبصمة لحد دلوقتي، ابهامك مكانه الطبيعي في مسكتك الطبيعية للموبايل بيبقي في مكان اغلب البصمات اللي تحت الشاشة
 
لكن الحقيقة انا لسه شايف ان التقنية لسه ماوصلتش للمستوي المطلوب، الـoptical لسه فيها limitations زي انها مش بتشتغل كويس في الشمس بسبب انها حرفياً كاميرا وبتتعمي من الإضاءة
 
والـultrasonic بالرغم من ان مشاكلها اقل بكتير الا انها مش بتشتغل علي كل انواع السكرينات ده غير ان تكلفتها مش قليلة - ولحد دلوقتي ماظنش انها نزلت ف جهاز مش سامسونج -
انت ايه رأيك في البصمات اللي تحت الشاشة دي بقي؟

 المصادر 

Low quality tech content & androidauthority

 

 

تعليقات