القائمة الرئيسية

الصفحات

تقرير: لو انت مش متابع القضية بتاعت Apple وEpic Games

أنا مش متابع القضية بتاعت Apple وEpic Games، يدوب بقرا عنواين الأخبار عنها، بس إذا إنت ماكنتش متابع خليني أقول لك إختصار: Apple حالياً في المحكمة بعد ما Epic Games رفعت عليها قضية من مدة بتتهمها بالإحتكار وإستغلال سلطتها على نظام الـ iOS في إنها تكسب من ورا المطورين. Epic Games عملت سيناريو عشان توقع Apple ويبدأوا القضية والموضوع بقاله من شهر أغسطس 2020 تقريباً. المشكلة دي كبيرة جداً لدرجة إنها وصلت للمحكمة، واليومين دول بيروح أكبر المسؤولين في Apple (سواء الحاليين أو السابقين) اللي ليهم أو كان ليهم علاقة بالـ App Store والـ iOS للإستجواب في المحكمة، عشان على آخر الشهر يطلع الحكم واللي يا إما هيخسر Apple مليارات أو هيوقع Epic Games بالكامل في سوق الموبايلات.

  

تقرير هام لو انت  مش متابع القضية بتاعت Apple وEpic Games


من آخر الحاجات اللي عرفتها هي إن Phil Schiller - رئيس التسويق السابق بتاع Apple واللي كان ماسك الـ App Store قبل ما يسيب المنصب - طلع من غير أي تُهم بعد الإستجواب في المحكمة، بس اللي خلاني عاوز أكتب البوست ده هو اللي طلع إستجوب بعده، Craig Federighi - رئيس هندسة البرمجيات، المُشرف والمسؤول عن كل الأنظمة والبرامج اللي بتعملها Apple. إتسأل Craig Federighi سؤال من القاضية Yvonne Gonzalez Rogers واللي هو: "فيه أكتر من متجر تطبيقات على الـ Mac، فإذا كان كده على الـ Mac، ليه ما نسمحش لنفس المتاجر دي إنها تبقى على الـ iOS؟"؛ فإجابة Craig Federighi تعتبر قلبت على الـ Mac شوية لكن هو كلام كويس، قال: "أيوه، ده فعلاً اللي إحنا عملناه على الـ Mac وبيتم إستغلاله.

 

 الـ iOS عمل مستوى أعلى جداً لحماية المستهلكين، والـ Mac مش واصل للمستوى ده. بعيداً عن حقيقة إن مستخدمين الـ Mac بيحملوا برامج أقل أصلاً وأقل إحتمالية للتعرض [لهجمات] بدوافع إقتصادية (Malware)، إذا خدت أساليب حماية الـ Mac وطبقتها على الـ iOS مع كل الأجهزة دي وكل القيمة؛ هيوصل لمرحلة أسوء بشكل كبير من اللي بيحصل على الـ Mac. زي ما بقول، إحنا عندنا مستوى من الـ Malware في الـ Mac مش قابلينه وأسوء بكتير من الـ iOS. طبق نفس الوضع [اللي في الـ Mac] على الـ iOS وهتلاقي الوضع بقى أوحش بكتير للعُملاء بتوعنا." 



الـ Mac أحسن بكتير من الـ Windows في الحماية، والكويس إن له App Store خاص بيه ومدعوم من المطورين يخليك مش محتاج إنك تجيب تطبيقات من برا Apple غير في حالات قليلة، لكن Craig Federighi وضح إن الـ iOS يعتبر نسخة من الـ macOS آمنة جداً حتى للإطفال، هو قال زيادة: "في الـ iOS إحنا كان عندنا القدرة إننا نعمل حاجة الأطفال فيها يقدروا يشغلوا جهاز iOS ويكونوا في أمان، ده منتج مختلف خالص [عن الـ Mac]."


هل كده Craig Federighi بيعترف إن أنظمة الحماية بتاعتهم مش أحسن حاجة في الـ Mac؟ أيوه، لكن هما مش في إيدهم حاجة يعملوها لإن النظام ده قديم ومفتوح لكل البرمجيات من زمان من قبل ما تظهر مشاكل الخصوصية والإعتمادية العالية على الكمبيوترات، هما بيعملوا اللي يقدروا عليه عشان يحموا النظام نفسه وبيحاولوا يعملوا حدود للمستخدمين عشان يفضلوا جوه الـ Ecosystem وما يحتاجوش إنهم يطلعوا ينزلوا برامج من برا ممكن تضرهم، لكن الـ iOS وضعه مختلف لإنه حديث وإتبنى من الأساس على إنه يكون محمي، إذا إتفتح ممكن يحصل مشاكل كتير فعلاً زي Craig Federighi ما قال، وأقرب مثال نشبه بيه الوضع لو الـ iOS إتفتح هو الـ Android اللي مع "الدعبسة" ممكن يحصل فيه مشاكل وعدم إستقرار وتلاقي حد سحب بياناتك، يمكن دلوقتي إتحسن شوية في إنه بدأ يعمل حدود لكل حاجة بتحصل على الجهاز عشان ما يحصلش تلاعب من غير معرفتك، بس لسه مش أمان في مستوى الـ iOS.

دايماً Apple بتتكلم على إنها بتقلق أكتر حاجة على الـ iOS لإن الكل بيستخدمه حتى الأطفال. المكونات اللي في الـ iPad أو الـ iPhone تخليهم خطر جداً إذا تم إختراقهم، الـ iPhone فيه كاميرات ومايكروفونات وGPS وشغال 24 ساعة، الموضوع مش أمان نهائياً إذا حد غريب إخترق موبايل إبنك وعرف تحركاته. موبايلك عليه صورك وملاحظاتك وتاريخك بالكامل، والحاجات دي مهمة جداً وممكن تدمر حياتك لو حد تاني قدر يوصل لها. Apple بتحاول إنها توعي على النقطة دي على قد ما تقدر، Tim Cook دايماً بيتكلم عنها في اللقاءات.



يمكن إنت عشان مقفول عليك في دايرة صحابك الـ Geeks اللي بيفهموا في الكمبيوترات ومشترك في جروب فيه كام ألف لمحبين التكنولوجيا؛ هتحس إن نص العالم بيفهم في الموبايلات، لكن الحقيقة هي إن معظم الناس مش Geeks ومعظمهم بيتعاملوا مع الموبايلات بحذر أوي، والـ iPhone معمول عشان يكون إستخدامه بسيط جداً من غير أي تعقيد وسهل إنه يتفهم من الكل، والـ iOS نظام مستقر جداً، حتة بقى إنه يتفتح لكل البرمجيات بتعرض المستخدمين لأخطار كتير منها: سرقة البيانات، المراقبة، وطبعاً عدم إستقرار النظام. ليه أصلاً يتفتح؟ الـ App Store عليه حوالي 2 مليون تطبيق متراجعين من Apple ومفيش ولا واحد منهم بيخالف قوانين المجتمع العامة وكلهم أمان ومايقدروش يعملوا أي نشاطات في الخلفية تضرك، موجود تطبيقات للـ Pros وألعاب وتطبيقات مفيدة. 



الكوكب بتاعنا سجن، هو له حدود صعب تخرج منها، مغ ذلك إنت مبسوط وعايش عليه مرتاح لإن مشوار المريخ ده مش فارق معاك. إذا كان الـ iOS سجن، فهو سجن واسع زي الكوكب اللي إحنا عليه كده، هو أحسن سجن لإنك تقدر تعمل كل اللي إنت عاوزه فيه، ومش محتاج تتعب نفسك إنك تغير فيه حاجة لإنه هو already متعوب فيه.

المصدر

تعليقات