عروض البلاك فرايدي ما بين المنتجات السيئة والعروض الوهمية

مع اقتراب يوم الجمعة السوداء "او البيضاء" هناك العديد من المتاجر التي تقدم الخصومات لبعض المنتجات الخاصة بها ولكن للأسف في الغالب تلك العروض اما وهمية او لمنتجات ليست علي المستوي المطلوب.

عشان مايتضحكش عليك فى عروض الBlack Friday.

هتلاقى دلوقتى مواقع كتير واكترهم Noon تحديداً عليه عروض وبتشوفها فى كل مكان حرفياً ، كل لما تتحرك تلاقى حد منزلك بوست يقولك الحق العروض وخد كود خصم كمان.

الاكواد دى بتدخل للأشخاص ربح ( Affiliate marketing ) ، انت كinfluencer او حد معروف شركة نون بتجيلك وتقولك والله على كل حد بيشترى من خلالك هندفعلك "كذا"

المعلومة دى مفيهاش حاجة جديدة ، الأغلبية يعرفها وهى طريقة مشروعة تماماً ، انا شخصياً حتى جربت اعمل دا قبل كدا.

لكن المشكلة ان فى فترة زى دلوقتى وناس كتير بتشتري فحرفياً بلاقى منتجات اى كلام وتلاقى حد يقولك الحق اشتري وبص العرض الجامد دا عشان يعمل مبيعات اكتر وهو اصلاً بيبقى منتج اى كلام…

الأنيل كمان لما بتحصل من بتوع الهاردوير ، تيجى شركة تقوله هبعتلك المنتج دا واعمله "مراجعة" وهيبقى ليك نسبة من المبيعات….بذمتك مراجعة ازاى وانت هيبقى كل هدفك تعلى المبيعات عشان تكسب اكتر فتعمل ربح اعلى ؟

ناس كتير معروفة ومحبوبة بتستغل ثقة الناس فيها وتعمل دا ، وتمشى تقولك بص المراجعين الوحشين اللى بياخدوا فلوس من الشركات….يلا ماعلينا.

المهم انت دلوقتى اشتري فعلاً المنتج اللى محتاجه ، وايوا فى عروض فعلاً بتنزل حلوة وفى صفحات وناس بتراعى ضميرها وبترشح منتجات فعلاً تستاهل تلحقها !! بس خلى بالك بقى من اللى بيبيعلك اى حاجة عشان يكسب.

بواسطة: Ahmed Kamal / أحمد كمال

تعديل المقال