19 فبراير 2021

شراء الشاشات tv والنصب من خلال النت

بيظهر علي النت صفحات مموله عن شاشات سامسونج وشاشات LG بسعر خرافي وطبعا معظم الناس بتجري وتحجز وتقولك ده اقل من السوق ب 1000 جنيه واكتر للشاشه ال 32 يعني بعقلك كده التوكيل هينزلها للتاجر بأقل من 1000 غير مكسب التاجر هل الكلام ده يعقل!،

 

شراء الشاشات tv والنصب من خلال النت

 ناس كتير متعرفش ان الشاشات فيها نصب ونصب عيني عينك كمان


المهم الشاشات بتكون عليها علامه سامسونج فعلا او lg ولكن هي في الاصل صيني او بتكون شاشات فرز تالت وبيكون فيها عيوب.

احذر شراء شاشات من الانترنت بأقل من سعرها الحقيقي

في تجار بتشتري من الشركات الشاشات التالفه وبتعالج مشاكلها وتقفلها وتبيعها علي اساس انها زيرو والعيوب مش بتظهر الا بعد مده والعميل يتصدم بعدها لما يعرف فا اوعي تجيب حاجه من النت
وفي تجار تاني بتشتري شاشات صيني اقل جوده ممكن تتخيلها وبتغير الشاسيه خالص وبتقفل في شقق تحت السلم والله ده بيحصل وسوفت وير قريب من الاصلي ونزل السوق يامعلم زي كده الموبيلات الايفون الكوبي.

الخلاصه الشركات بتبيع الاجهزه الاصليه للتوكيلات المعروفه زي بي تك وكارفور والمرشدي واسواق القاهره وغيره يعني لما تحب تجيب شاشه مع النت متجبهاش الا من مكان موثوق فيه جدا علشان في الاخر هتلاقي الشاشه اللي مكتوب علي الكرتونه غير اللي موجود جواها.


انا بقول الكلام ده وواثق منه لاني شوفت الكلام ده بعيني فامتعملش انك شاطر علشان هتلبس في الاخر
الاعلان اللي في الصوره لشاشه 60  بوصه lg من مواقع علي النت  وسعرها 5500 وكمان 4k  ازاي الكلام ده مع انك لو سألت علي الشاشه في اي توكيل هتلاقيها فوق 9000 اسأل نفسك بقا ازاي
حاجه تاني مهمه لازم تعرفها قبل ماتشتري شاشه لازم تجيب رقم الموديل بتاعها علشان تعرف كل امكانيتها وتعرف هل هي حديثه ام لا وتتاكد منها من الموقع الرسمي للشاشه، بيبقي مكتوب جمبها وفي دهر الشاشه


حاجه تاني مهمه لازم تعرفها التوكيلات الكبيره زي كارفور وبي تك وغيره مش بتعمل عروض والشغل ده لالالا خالص الموضوع انه بيكون في موديل قديم في الشركه والشركه مصنعه منه كتير ومش عارفه تسوقه وبيعدي عليه فتره.


الشركات تقولك بدل ماهي مرميه بينزل في سعرها ويروح لتوكيل يقوله معايا كميه شاشات اعمل عليها عرض وكله بيستفاد واحنا فاكرين انهم بيعملوه عروض وبيحبونا والشغل الهابط ده
علشان كده لما تفكر تجيب شاشه هات حاجه للعمر واقراء عنها كويس واوعي تجيب حاجه رخيصه اوعي هتندم في الاخر وهترمي فلوسك علي الارض.


للعلم شركه توشيبا وغيرها لحد الان عندها موديلات من سنه 2016 بتبيعها علي اساس انها شاشات حديثه ولسه فيه في السوق منها كتير.

 
يارب تكون وصلت الفكرة
تحياتي اخوكم احمد عز العالمي

ليست هناك تعليقات

تعريب كن مدون جميع الحقوق محفوظة لــ مدونة عرباوي | الشروحات بشكل مبسط 2013-2021 ©