زهقت من انستاجرام؟ الصراحة وانا كمان انستاجرام من زمان متعودين عليه انه المنصة اللي بنشارك عليها صورنا الشخصية، اللحظات الصغيرة اللي بنحب نوثقها بصورة وننزلها عشان صحابنا وقرايبنا يشوفوها، دي كانت طبيعة المنصة زمان وقعدت كده فترة طويلة لحد الفترة الأخيرة بعد ما لعنة الـShort video format اصابت المنصة دي وغيرها كتير
من بعد نزول تكيتوك وشهرته الغير طبيعية، كل الشركات الكبيرة بقت عاوزه تاخد حتة من الكيكة، مش هنسيب الصين تاخد كل حاجة لنفسها اكيد
طبعاً انا لما بقول كل الشركات الكبيرة ف هنا اقصد فيسبوك وحلفائها، او المنصات اللي تحت مظلة Meta فيسبوك وانستاجرام اكتر منصتين حاولوا يعملوا ده بتقديم الـReels، نسخة ميتا الخاصة من التيكتوك.
موضوع الريلز ده شخصياً ماكنتش شايف فيه مشكلة ع فيسبوك لإنه اصلاً منصة معمولة عشان تشوف فيها محتوى جديد، مش بالضرورة محتوى شخصي للناس القريبين منك
لكن المشكلة بالنسبالي في انستاجرام انه في الأساس معمول عشان الناس تشارك عليه محتوى شخصي، مش عشان اشوف صور وفيديوهات لناس معرفهاش اصلاً
انستاجرام دلوقتي بقى بدون مبالغة 80% من المحتوى اللي بشوفه عليه لما بفتحه عبارة عن ريلز، وصور عشوائية لناس معرفهاش
وده لإنهم بيحاولوا ياخدوا اكبر قدر ممكن من وقتك في المنصة وماتروحش تضيعه ف مكان تاني.. والموضوع ده مخليني كارهه بقالي فترة لكن ماكنتش بتكلم عن الموضوع عشان معرفش اي بديل ليه
النهاردة وانا بقلب في يوتيوب قابلني فيديو لـPeter mckinnon، لو ماتعرفش مين ف ده واحد من اشهر المصورين دلوقتي، بيتر ف الفيديو كان بيتكلم عن نفس المشكلة دي.. والحقيقة اني كنت متوقع انه هيطلع يـrant ويقول نفس الكلام اللي انا قولته فوق بدون تقديم اي حلول او بدايل.. لكن حصل العكس!
بيتر ذكر منصة جديدة نسبياً اسمها Vero، تعالى اكلمك عنها شوية
منصة Vero اتأسست سنة 2013 من رجل الأعمال اللبناني ايمن الحريري ابن رئيس الوزراء اللبناني الأسبق رفيق الحريري
المنصة تم اطلاقها بشكل رسمي في 2015 على انها مكان تقدر تشارك عليه اي حاجة مش بس صور، من غير اي اعلانات او data mining او غيره من الحاجات اللي مابنحبهاش دي
المنصة بتنظم المحتوى بشكل ذكي جداً في رأيي، يعني انت مش بس تقدر تشارك صورة او فيديو، لأ انت كمان ممكن تشارك فيلم عن طريق انك تسيرش عنه ع المنصة وهي اوتوماتيك بتجيبلك البوم صور ليه ينزل مع كلامك عنه، كمان ممكن تحدد انت منزله ليه سواء شوفته او ناوي تشوفه او بترشحه للي عندك
نفس الكلام مع الكتب والأغاني والألعاب، انت حتى تقدر تشارك تطبيق مع الفولورز عندك وبيظهرلهم brief عنه مع البوست بتاعك.. طريقة انشاء المحتوى عليه شايفها عبقرية وبتدي مجال لأنواع مختلفة من المحتوى اللي ممكن يتقدم عليه
واجهة التطبيق جميلة جداً من حيث الشكل وكمان تجربة استخدامها لطيفة ومفهاش مشاكل من تجربتي القصيرة ليه.. وبشكل عام مبسوط من وجود منصة بالكواليتي دي عشان تنافس انستاجرام !
انا مش بقولك روح امسح انستاجرام بسرعة ونزل vero، لكن لو انت زهقت من اللي بيحصل ف انستاجرام وبتستخدمه لمجرد انه ملوش بديل، ف احب اقولك انه يعتبر بديل اكتر من ممتاز.. عيبه الوحيد هو انك مش هتلاقي عليه ناس كتير تعرفها.. بس ده هيتحل لو رشحته للناس اللي تعرفهم وزهقوا من وضع انستاجرام الحالي برضو
لو نزلته وسجلت عليه هتلاقيني هناك بيوزر @elkhayat والصراحة مبسوط اني لحقت اليوزر ده :"D
مستنيك ❤
___________________________________
Written and reviewed by: Abdelrahman Elkhayat