بتحاول تغير اعدادات الراوتر ومش عارف من اي متصفح؟، تعالى هقولك الحل، دلوقتي لو انت معاك راوتر قديم من وي وحاولت تفتح صفحة الاعدادات بتاعته من المتصفح بتاعك لكن بيجيلك صفحة خطأ، الحل ان شاء الله هنا.
لا يمكن الدخول الي صفحة اعداد الروتر
عاني العديد من المستخدمين عدم القدرة علي الدخول الي اعدادات الراوتر خاصة رواتر تي داتا "وي حاليآ" وعند محاولة الدخل الي صفحة اعدادات راوتر وي هيجيلك الصفحة اللي في الصورة دي.
لكن ايه السبب؟
ده بسبب ان الراوترات قديمة جداً فـ بتستخدم نسخة TLS قديمة زي 1.1 او 1.0
طب ايه الـTLS ده اصلاً؟
دي اختصار لـTransport layer security وده بروتوكول بيستخدم في تشفير الداتا اللي بينك وبين السيرفر اللي انت بتحاول تتواصل معاه
البروتوكول ده ليه نسخ كتير، وللأسف اغلب ان مكانش كل المتصفحات في نسخهم الأخيرة مابقوش يدعموا النسخ القديمة من البروتوكول ده، وبالتالي انت مش هتقدر تغير اي حاجة ف اعدادات الراوتر لو عندك نسخة حديثة من المتصفح
طيب ايه الحل؟
الحل الأول والبديهي هو انك تستخدم نسخة قديمة من المتصفح، بس ده مش احسن حل عشان عادةً النسخ القديمة بتكون موجودة ع مصادر خارجية وانا شخصياً ماضمنهاش، انما لو انت عندك نسخة قديمة من اي متصفح نزلها وجرب
طيب لو معندكش؟ تعالى هقولك الحل
مبدأياً عاوز تنزل فايرفوكس عشان هو الوحيد اللي عرفت الاقي حل عليه
بعد ما تنزله هتكتب في الـURL bar الكلام ده
about:config
هيجيلك تحذير زي تاني صورة هتـaccept عادي وتكمل
اول ماتدوس هتلاقي search bar من فوق كده هتكتب فيه الكلام ده
security.tls.version.min
هتدوس مرتين ع الرقم اللي غالباً هتلاقيه 3 وتغيره تخليه 2
بعدها هتدوس ع علامة الصح اللي ع اليمين دي زي الصورة التالتة
اول ماتخلص هتفتح صفحة الراوتر بتاعتك عادي جداً وهتلاقيها فتحت معاك
تحذير صغير بقى، لو انت بتستخدم فايرفوكس ك متصفح اساسي ف انا انصحك ترجع القيمة دي زي ماكانت بعد ما تخلص تعديل ع اعدادات الراوتر، انا مش عارف هي هتسبب اي ضرر لو سيبتها ولا لأ لإني مش خبير في النقطة دي بس الاحتياط واجب يعني
ولو مش بتستخدم فايرفوكس ك متصفح اساسي، رجعها برضو ايوه 😂😂
لو هتسيبها ف ماتستخدمش فايرفوكس غير في الاستخدام ده بس عشان زي ماقولت ممكن يكون ليها ضرر على امان البيانات اللي بتبعتها ع المواقع
وبس كده، المشكلة دي كانت مضايقاني بقالها كتير ومافكرتش ادور ع سببها غير دلوقتي، ولما وصلت للحل ده قولت اشارككم بيه عشان اكيد فيه كتير بتواجهه المشكلة دي
بواسطة: صفحة Low quality tech content
قد يفيدك:
شرح كيفية التحكم بالمتصلين بالراوتر عن طريق Selfishnet
افحص توافقية قطع الحاسب مع بعضها قبل الشراء
ضبط الحاسب لأفضل وضوح للشاشة: خطوات سهلة لتحسين وضوح النص
طريقة معرفة عمر جهاز الكمبيوتر الحقيقي بدون برامج
تجنب العمل على الكمبيوتر ويدك بهذه الوضعيات
قبل ترقية حجم الرام في جهاز الكمبيوتر يجب أن تعرف نوع الرام قبل الشراء
قبل ان تشتري هارد مستعمل اهم 3 نصائح
4 اخطاء قاتلة في الحاسوب المحمول تجنبها