القائمة الرئيسية

الصفحات

لماذا ChromeOS هو ملك انظمة التشغيل تقرير Tech Comics



Chrome OS، تتعدد انظمة التشغيل للحواسيب المحمولة ولكن دائما يبقي الفيصل هو مدي اشباع رغبة المستخدم من نظام التشغيل المقدم له من الشركات المالكة لحقوق انظمة التشغيل مثل ويندوز وماك وتوزيعات لينكس الشهيرة وده سبب في ان كروم هو ملك الانظمة، يمكن كتير منكم بعد ما يقرا العنوان ده حيستغرب او يفتكر انه Clickbait، لكن خليني اقولك يا عزيزي انه جد و جد جدا كمان . 

لماذا ChromeOS هو ملك انظمة التشغيل تقرير Tech Comics

 

و مبدئيا البوست طويل وعشان منتهش من بعض عشان البوست
قلت نقسمه على 4 نقط بحيث الي عارف نقطة يقدر يسيبها و يتنقل للي عاوزه
1= ايه هو ChromeOS اصلا؟
2= هل كروم حاليا لسة مجرد متصفح؟
3= هل اقدر اصطب النظام على جهازي ؟ ايه الفرق بين ChromeOS و ChromiumOS ؟
4= ليه و ازاي حيبقى ChromeOS ملك الانظمة؟!
1- ايه هو Chrome OS ؟!
نظام تشغيل ChromeOS هو نظام تشغيل مفتوح المصدر من تطوير جوجل مبني على نواة لينكس اطلق سنة 2011 .
الهدف من وراء كروم هو ان جوجل لاحظت ان اغلب المستخدمين كل الي بيعملوه غالبا بيكون على المتصفح زائد شوية كتابة على الWord الي ممكن برضوا تتعمل من المتصفح عن طريق Google Docs
فجوجل قالت ليه ميكنش فيه نظام عبارة عن متصفح و بس !
بحيث انه يكون خفيف جدا على الاجهزة ومش محتاج مواصفات عالية ويقوم بكل المهمات الي بيعملها اغلب المستخدمين عن طريق المتصفح!
و دي كانت انطلاقة ChromeOS
2- هل ChromeOS حاليا لسة مجرد متصفح؟!
نظام تشغيل كروم على عكس ما ناس كتير فاكرة هو مش مجرد متصفح.
صحيح انه ده كانت فكرته في البداية زي ما قلت لكن جوجل بعدت بشكل كبير جدا عن الرؤية دي في السنين الاخيرة.
حيث ان حاليا كروم بيمتلك مميزات تخليه اوبشن افضل حتى في نظري من توزيعات كتير للينكس و ده لسببين
1- كروم حاليا بيدعم تطبيقات الاندرويد
2- كروم مؤخرا ضاف دعم لتطبيقات لينكس ! (لسة في البيتا لكن اعلنوا انها حتخرج من البيتا السنة دي )
و بكده بنظري كروم بيتفوق على توزيعات لينكس بدعم تطبيقاتهم زائد الاندرويد!
و حوار دعم تطبيقات لينكس و الاندرويد ده من نظري خلى كروم في منقطة تانية لوحده
لان بمجرد خروج دعم تطبيقات لينكس من البيتا حتقدر بكل ارياحية تشغل العاب بجرافيك عالي AAA على كروم بوك ! "طبعا لو مواصفاته عالية"
ولو انت عاوز توصل لاي سوشيال ميديا حتى الي مش متاح على اجهزة الكمبيوتر التقليدية زي Clubhouse تقدر تستخدم متجر تطبيقات جوجل بلاي !
ده بالاضافة لان جوجل بتتعمد انها تخلي الاندرويد مرتبط بشكل سلس مع نظام كروم بمميزات مشابهة للي شفناها بين الios و الMacOS زي انك تبعت ملفات بشكل دايركت او ان الاندرويد يفتح الChromebook
3- كلام جميل , هل اقدر انزل نظام ChromeOS عندي و ايه الفرق بينه وبين ChromiumOS ؟
زي ما قلتلك قبل كده نظام تشغيل ChromeOS مفتوح المصدر
فأي حد فعليا يقدر يعمل بيلد منه زي الاندرويد و متصفح كروم نفسه بظبط
لكن زي متصفح كروم برضوا في نوعين من نظام التشغيل ده
1- في النظام الي جي من جوجل بشكل مباشر و ده بيكون على اجهزة رسمية تسمى بالChromebooks بتعملها الشركات المختلفة
و ده بيبقى هو الي اسمه Chrome OS و ده الي فيه دعم تطبيقات الاندرويد
2- في النظام الي الناس بتعمله و ده بيسمى بChromiumOS
ده الي انت تقدر تنزله على جهازك و ده بيكون مبني من اشخاص او مواقع بهدف انه يكون سلس في التنزيل لكل الاجهزة زيه زي الويندوز.
ده مبيبقاش فيه دعم تطبيقات الاندرويد
لكن مفيش حاجة تصعب على مجتمع المطورين , في مشاريع زي Croissant project بيخليك تقدر تنزل نسخة من ChromeOS على جهازك بدعم تطبيقات الاندرويد !
و حاجة زي FydeOS الي هو فعليا ChromiumOS طبيعي لكن الشركة قدرت تضيف فيه دعم تطبيقات الاندرويد بطريقة خاصة بيها ! و متاح للكل انهم ينزلوه بضغطة زر !
و في حاجة كمان و هي اهم حاجة و هو ان قريب جدا متوقع ان جوجل تسمح بتنزيل ChromeOS بدعم مباشر منها على كل الاجهزة من خلال الشركة الجديدة الي اشترتها Cloudready
و دي كانت شركة بتعمل توزيعات ChromiumOS و جوجل اشترتها مؤخرا و بكده انت فعليا كمستخدم تقدر تنزل نسخة كروم من جوجل بشكل مباشر و متوقع دعم الاندرويد يجي قريب وتتحول التوزيعة لاول توزيعة ChromeOS للعامة!
4- ازاي ChromeOS حيبقى ملك الانظمة؟!
وصلنا للنقطة الي عامل البوست كله عشانها, فبص يا سيدي
خطة هيمنة كروم على مستقبل الانظمة اهم عامل فيها هو شئ ذكي جدا خططت له جوجل خلال السنين الي فاتت و بتحصد نجاحه حاليا !
وهو ان جوجل بجهود جبارة قدرت تخلي المدارس في امريكا و عدة دول يخلوا اللابتوب التعليمي الرئيسي في المدارس دي هو Chromebook
و للوهلة الاولى حتقولي ده حيفرق بأيه ؟!
لكن لو ركزت حتلاقي ان بكده جوجل خلت اجيال حرفيا من الاطفال يكبروا و هما اول جهاز لابتوب يتعاملوا معاه في حياتهم اليومية ويعتمدوا عليه يكون شغال بنظام تشغيل ChromeOS
بالتالي اكتر نظام حيكون مرتاحين معاه بعد سنين التعليم دي كلها حتى بعد ما يتخرجوا هو ChromeOS !
مركز معايا !!!!؟ شايف العبقرية ؟!!!!
جوجل خلت اجيال بحالها يبقى النظام الاساسي بتاعهم كروم!
و لو انت شايف ان الحوار ده فاشل احب اقولك ان دي اصلا نفس استراتيجية ابل لكن تراخوا فيها بالسنين الي فاتت و بيحاولوا يرجعوها دلوقتي
و عشان كده بتلاقيهم دايما مركزين بالتعليم لانهم عارفين انهم لو خلوا المستخدم يرتاح مع حاجة معينة صعب جدا يغيرها!
و احب اقولك كمان ان جوجل بفضل الاستراتيجية دي زائد كل الخواص الجديدة الي ذكرناها سابقا
قدرت تتفوق في مبيعاتها لاول مرة على الMacbooks خلال سنة 2020 !
السنة الي فاتت دي مبيعات الكروم بوك كانت مهولة لدرجة انه كان بيبقى out of stock !
النظام بيكتسب مستخدمين جداد بشكل كبير جدا و مسبب تهديد فعلي وملموس للانظمة العتيقة زي الماك و الويندوز
و كل ده و لسة حتى جوجل ماطلقتش ChromeOS بشكل فعلي زي الويندوز كتوزيعة تقدر تنزلها و زي ما قلت هما ده الي شغالين عليه حاليا!
و لما تحصل الخطوة دي متوقع ان تزيد نسبة مستخدمين كروم بشكل كبير جدا
و انا متشوق جدا لاشوف النتيجة خلال السنين الجاية
طولت عليكم
و لكن احب اشكر كل الي وصل لنهاية البوست و اتمنى اسمع ارائكم في الموضوع
Post Credits : Mohamed Salah


تعليقات