القائمة الرئيسية

الصفحات

12 نصيحة عشان تعرف تكتب مقال احترافي

كيف تكتب مقال ناجح يجذب القارئ ويقرأه حتى النهاية، خطوات كتابة مقال، كيفية كتابة مقال، خطوات عملية لكتابة مقال، كيف تكتب مقالاً يُقرأ إلى نهايته، كيف تكتب مقالة في مدونة، لقيت ناس كتير بتسأل ف جروبات الكتابة ازاي تكتب المقال، ولأن الموضوع عاوز شرح شوية فغالبًا المنشورات دي بتضيع ولو جابت تفاعل بيبقى ناس بتتابع ونادرًا لو حد رد، فأنا قلت من خبرتي المتواضعة البسيطة اقولكم المقال بيتكتب ازاي.

 

12 نصيحة عشان تعرف تكتب مقال احترافي

قد يفيدك:

 

 خطوات كتابة المقال

 1- أول حاجة وقبل كل شيء تحدد المجال اللي عندك شغف تكتب فيه، لأن الكتابة إحساس، وانت لازم تكون مختلف ومستمتع باللي بتكتبه، يعني ما ينفعش تقول بكتب ف كل حاجة، لو معندكش شغف تكتب ف مجال التقني مثلاً يبقى المقال ح يطلع نمطي وأكاديمي وكله معلومات بس، ويقفل القاريء من اول سطرين. لازم تكون حابب المجال اللي بتكتب فيه، وتقدر تجيب فيه معلومات وتكتب بطريقة تجذب القاريء كأنك بتتكلم معاه مش مجرد سرد معلومة.

 

 2- لازم يكون عندك موهبة الكتابة أصلاً وبتحبها، تكون لغتك العربية معقولة، مش ح اقول ثرية بس تقدر تلعب بالمرادفات والكلمات، وطبعًا عشان تكون كاتب محترف ما ينفعش تكتب (فصحي) مثلاً، لأنها ألف لينة بتتكتب (فصحى)، يعني قواعد النحو دي حاجة أساسية، الموضوع مش مجرد سرد او كلمتين وخلاص.

 

 3-لو لسه معندكش حب للكتابة قوي حاول تحبب نفسك فيها وتتعود عليها عشان ما يبقاش الدنيا صعبة عليك وكمان بتشتغل شغل مش بتحبه، كدا كتير فعلاً، جرب تكتب كل يوم صفحة عن اللي انت حاسه من مشاعر، اتعود تكتب كل يوم ولو حاجة بسيطة لحد ما تتعود. 

 

4-خلاص ح تبدأ تكتب في المقال، ح تجيب عنوان أو كلمة مفتاحية، إما من نفسك او من صاحب الموقع، عندك مثلاً( تأخر الكلام عند الأطفال) وما تنساش الهمزات ح تكتبها على جوجل و هي دي كلمتك المفتاحية، ح تطلع لك روابط، افتح منها اول خمسة مثلاً، وابدأ حط العناصر.

 

 5-العناصر دي زي عناصر موضوع التعبير اللي كنا بنكتبه واحنا صغيرين، حط نفسك مكان القاريء، لو انت مكانه وبتدور على تأخر الكلام عند الاطفال ح تبقى بتدور على ايه، مثلاً متى يتكلم الطفل الطبيعي؟ أسباب تأخر الكلام، العوامل التي تساعد على كلام الطفل، كيف تعالج مشكلة تأخر الكلام؟ او ممكن تجيب الكلمات المتعلقة والعناوين الفرعية من جوجل او من أي وسيلة تانية، انا بقول من خبرتي المتواضعة فعلاً

 

 6-المهم صفحة المقال قدامك وكتبت العنوان وحطيت العناصر، ح تبدأ تجمع المعلومات من كل موقع انت فتحته، ولو ما لقيتش ح تفتح موقع تاني تشوف فيه اللي انت عاوزه، ولو ح تستعين بمصادر أجنبية يبقى احسن بس دا حسب قوة لغتك.

 

 7-انت بتعمل ايه؟ دا كدا بقى مقال حصري معلوماته مستقاة من كذا مصدر، بتكتب بأسلوبك، وممكن تزود كلام من عندك سطر او اتنين لو كنت قابلت المشكلة دي فعلاً مثلاً.

 

 8-لازم مقدمة وخاتمة ويكون فيهم الكلمة المفتاحية، ومهارة الكاتب اللي بيحب مهنته انه بيعرف يحط الكلمة المفتاحية والكلمات المتعلقة ف وسط الكلام من غير ما يبان قوي انها مفتعلة، عشان يفضل المقال جميل غير مشوه.

 

 9-المقدمة بتكون من دماغك حوالي 3 او 4 سطور عن الموضوع، والخاتمة برضه زيها، دول أساسيات اي مقال ف الدنيا. 

 

10- اللي انا بقوله مفيهوش نسخ، انت بتجمع معلومات وتكتبها بأسلوبك، والكاتب اللي بيلجأ للنسخ فهو بيضر نفسه اول واحد لأن فلوس الشغل اللي بياخدها بيبقى جزء منها مش من حقه .

 

 11-كدا انت خلاص خلصت، بتقعد حوالي دقيقتين كدا تراجع المقال عشان لو فيه حروف لاصقة ف بعضها او واقعة بسبب الكتابة السريعة، كمان بتراجع الهمزان والاخطاء الاملائية

 

 12- لو اتبعت كل الكلام دا من اسلوب مشوق وكتابة مميزة، مفيش نسخ الجمل مترابطة..مفيش أخطاء إملائية، المعلومات كويسه ..دا المقال اللي تاخد فيه على الاقل 40 جنيه للالف كلمة وما ترضاش بأقل من كدا لو بتوقع بقى شرط من الشروط دي يبقى اسعى انك تطور نفسك وممكن تقبل بسعر بسيط ف الاول لحد ما تتعود

 

قد يهمك:

 

بواسطة المبدعة / أميرة توفيق

تعليقات