قبل بيع السيارة احذر هذه الطريقة للنصب عليك

في حركة نصب دلوقتي انتشرت و بتتعمل في الشهر العقاري، نصيحة لوجه الله الناس إللي بتبيع عربياتها ماحدش يبقي فلوس نهائي لأي حد مقابل أنه لما يتعمله التوكيل حايجبلك باقي الفلوس،! القصه باختصار:

حضرتك بتكون معاك عربية و عارضها على أولكس مثلاً، و ليكن تمنهها  200 الف جنيه بيتصل بيك شخص محترم جدا و بيجي لابس شيك و بعربية نضيفه بردو.


 

 و بطريقة كلامه الحلوه بيتفق معاك انه يديك 160 الف كاش بعد ما يتفرج عليها و تعجبه، و ياخد العربية منك و المفتاح الاسبير كمان .. و يبقيلك 40 الاف هيسلمهم لك لما ياخد التوكيل ورخصة العربيه منك بكره الصبح باتفاق معاه في اي مكان بعد ما يعرف منك حاتروح تطلعه منين و انت تبع أي شهر عقاري .


و فجاه تاني يوم بعد ما تعمله التوكيل و تتصل بيه عشان يجي يستلمه و تاخد فلوسك يقولك اي عذر او يقفل تلفونه ايام ، طبعا حضرتك مش حاتقلق هتقول سيبه براحته كده كده معايا التوكيل و معايا الرخصة و ريني بقى حايعمل ايه بالعربية ..؟؟
بس للأسف طلع حايعرف يعمل كتيييييير ،


.. حركة النصب:

يروح هو اليوم إللي بعده يطلع على الشهر العقاري الي حضرتك طلعت منه التوكيل و يطلع بدل فاقد ببطاقته (قانوناً من حقه لأن التوكيل بإسمه) .. وبعدين يروح القسم يعمل محضر بفقد الرخصة، و يطلع على المرور يطلع بدل فاقد للرخصة أو يطلع شهادة بيانات، و يببعها لأي حد او ينقلها لمرور تاني.


و كده للأسف مسك الورقة إللي تثبت انك بعتله، و ورقه سليم ١٠٠ % و العربية قانونا بقت ملكه ، و مش حاتقدر تعمل محضر سرقة عربيتك لان حايبقى تاريخ المحضر بعد تاريخ التوكيل إللي حضرتك عملته ، و ده ممكن يؤذيك انت في القانون.


حاتقوللي طب أروح بسرعة الشهر العقاري ألغي التوكيل و بعد كده أعمل محضر،. حاقولك بردو للأسف مش حاتقدر تلغيه لأن الشهر العقاري مش بيلغي التوكيل غير بوجود الطرفين.


و بكده بدل ما حضرتك ماكنتش عاوز تنزل فيها ألف جنيه و متمسك في سعرها تتفاجئ أنك خسرت فيها 40 ألف جنيه وراح عليك جزء من ثمن العربية.


.. الحل:

انك ماتبقيش فلوس نهائي لأي حد، أو ممكن تبقى ٥٠٠ جنيه بالكتير.
الناس تخلي بالها كويس جداً .. و ربنا ما يكتبها على حد لأنها حصلت مع واحد صاحبي و لما راح الشهر العقاري و سأل الموظف عرف فعلا ان الراجل جه و طلع بدل فاقد .. و ان الحركة دي بقت مشهورة و بتتعمل كتير، و بيبقوا تجار و تلاقي بيبعها تاني يوم و يكسب فيها هو ال40 الف صافي.


ياريت لو لك أي حد تعرفه، صاحبك أو قريبك ناوي يبيع عربيته تحذره من الموضوع ده لان عاوزين الناس كلها تعرفه و تاخد بالها منه كويس و مايكنش فيه ضحايا نتيجة الثقة في ناس ما نعرفها.


احسن حل للموضوع ده البيع و الستلام عند الشهر العقاري غير كدا الموضوع مش تمام . المقال منقول للأفادة فقط

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -