14 فبراير 2020

هو انا اقدر ادرس برمجة وانا مش علوم حاسب, حاسبات او هندسة؟

- السؤال ده خلى عدد كبير جدا من الناس انها تبعد عن المجال بسبب انهم شايفين انك لعدم تخصصك فى المجال يبقى مش هينفع تدرسة.

هو انا اقدر ادرس برمجة وانا مش علوم حاسب, حاسبات او هندسة؟



- وده اكبر غلط ممكن يعطل الواحد عن دراسة حاجة معينة انه يتبنى احساس داخلى بالعجز او عدم القدرة بنائا على وجه نظر سطحية وعدم الخوض فى التجربة بنفسه ليتأكد فعﻻ " هل دراسة المجال صعبة بالنسبالى" وتحت كلمة بنسبالى ده مليون خط او ﻻ.
- بعيد عن موضوع الانشاء الفوق نعيد صياغة السؤال,

 ايه القدرات المطلوبة عند شخص معين لدراسة مجال البرمجة ؟

-- اﻻجابة:

- لو انت طالب فى اى كلية مهما كانت هى ايه تقدر تدرس برمجة ذاتيا.

- لو انت مش طالب جامعى ومعاك فقط ثانوية تقدر تدرس برمجة ذاتيا.

- لو انت معاك اعدادية فقط وبتعرف تقرأ وتكتب تقدر تدرس برمجة ذاتيا.

- لكن هتحتاج المعرفة باللغة الانجليزية عشان تقدر تبحث عن مشكلة لو وقفت قدامك او تزود خبرتك من خلال المقاﻻت او تقدم على شغل freelance على المنصات الخاصة بيه, ومن وجه نظرى القدرة ال خليتك تدرس برمجة هتخليك تدرس انجليزى.

- وكا مطور اندرويد درس Computer science بقولك اى حد يقولك حاجة غير ال انا كاتبهم دول, زى مثلا انك محتاج تكون قوى فى الرياضة والفزياء, اعرف انه بيضللك, او حابب يحسسك بالعجز عشان يقتل طموحك.

- اﻻسباب:

1- اوﻻ مش كل تخصصات البرمجة محتاج رياضة, اغلب التطبيقات والمواقع الى بتدخل عليها يوميا تقريبا مفيهاش قانون رياضى واحد او قانون رياضى مثﻻ صعب للفهم, لكن ده متوقف على التطبيق نفسه, متجيش تقولى عاوز اعمل تطبيق بيحلل اجسام ويحسب سرعتها وزمن وصلوها ومفكر انك بشوية جمع وطرح هتخلص الليلة, التطبيق ده اخرك هتعمل ال Login وتقفله على كده.

2- ثانيا معظم التخصصات حاليا موجود ليها شرح كامل مجانى متوفر على Youtube باللغة العربية, ومفيش حاجة تمنعك من دراسة المجال ده غير نفسك, انت كل ال محتاجة خريطة ارشاد عشان تدرس التخصص صح.

3- شركات زى Google ,Microsoft ,Apple ومؤخرا Tesla, الغت شرط الحصول على شهادة جامعية فى دراسة التخصص عشان تقدر تقدم عندهم, الشركات ده بتصرف سنويا مليارت فى البحث العلمى والتطوير, فاكيد قرار زى ده مش هيطلع منهم هبائاً.

شخصياً مقتنع تماما بقرار الشركات, ﻻنى كا واحد درس computer science فى مصر فى بعض الجامعات, ما هو اﻻ مجرد عك فى عك من وجه نظرى الشخصية, مواد بتتلخص فى كام قانون على تعريف عشان يتعمل منهم امتحان واﻻسم انك خلصت المادة.

والنتيجة انك هتﻻقى اﻻف من خريجين حاسبات وهندسة قسم حاسب ميقدروش يعملو مشروع واحد باديهم, بل فيه بعد دراسة 5 سنين مبيقدرش يكتب سطر كود واحد, وانا شوفت ده بنفسى.

الملخص, ان مجال البرمجة هو المجال رقم واحد حاليا وفى المستقبل, والمجال الوحيد ال مش شرط يكون معاك شهادة جامعية عشان تشتغل فيه وف نفس الوقت من اعلى الوظائف فى المرتب ومع ذلك الناس متجهلاه تماماً !

من طرف المبدع / Hossam Gamal

ليست هناك تعليقات

تعريب كن مدون جميع الحقوق محفوظة لــ مدونة عرباوى | شروحات مبسطة فى المجال التقني 2013-2020 ©