لماذا غيرت شركة فيسبوك Facebook الاسم الي ميتا Meta

 

ماذا حدث مع فيسبوك ولماذا قامت بتغييراسم الشركة من فيسبوك إلى "ميتا Meta"، يوم الخميس 28\10\2021 أعلن مارك زوكربرغ الرئيس التنفيذي لشركة فيسبوك تغيير اسم الشركة ليصبح "ميتا Meta" ولكن قبل ان نتحدث عن التغيير الذي حدث وأسبابه، نحن بحاجة نتحدث عن شركة فيسبوك وكيف وصلت الي هذه المرحلة.



 



تم إطلاق فيسبوك عام 2004 كـ شركة بتملك وسيلة تواصل اجتماعي بتحمل ذات الاسم "فيسبوك".
لكن، من 2004 لغاية اليوم، تحولت شركة فيسبوك من مجرد شركة بتمتلك وسيلة تواصل اجتماعي إلى شركة بتملك لا يقل عن 93 شركة ومنتج!


من بين المنتجات يلي بتملكهم فيسبوك، منصة انستاغرام - يلي استحوذت عليها فيسبوك أو اشترتها عام 2012 بصفقة بلغت قيمتها 1 مليار دولار
بعام 2014 استحوذت فيسبوك على تطبيق التواصل واتس-اب بصفقة بلغت قيمتها 19 مليار دولار
بنفس العام 2014، استحوذت فيسبوك على شركة Oculue VR بصفقة بلغت قيمتها 2 مليار دولار
وهي شركة متخصصة بصناعة نظارات الواقع الافتراضي
ومن ضمن عمليات الاستحواذ الأخيرة يلي قامت فيهم فيسبوك هو استحواذها على شركة Giphy وهية عبارة عن قاعدة بيانات ومحرك بحث بيضم المقاطع أو الصور المتحركة أو Gif *نفسهم الصور المتحركة يلي بنستخدمهم بالتعليقات أو منبعتهم على واتس-اب أو انستاغرام وغيرها 🙂


المهم، تقريباً خلال الـ 16 سنة، فيسبوك تحولت من شركة بتملك موقع تواصل اجتماعي عام 2004 ﻷنها تصير عام 2021 شركة بتملك كم كبير جداً من الشركات والبرامج والمنصات والمنتجات - وكان بالإمكان اعتبار شركة فيسبوك مظلة ينضوي تحتها عدد من الشركات والمنتجات من بينهم تطبيق فيسبوك وانستاغرام و واتس-اب ومسنجر

🔹شو يلي حصل حالياً؟

فيسبوك قررت إنشاء كيان بإسم "ميتا Meta" بحيث هاد الكيان أو الشركة يكون هو المظلة يلي بتضم شركات ومنتجات شركة فيسبوك السابقة - فـ حالياً، صرنا نقول انه تطبيق فيسبوك مملوك لشركة "ميتا"، كذلك الحال مع واتس-اب وانستاغرام ومستنجر صارت جميعها مملوكة لشركة "ميتا" بدل م كنا نقول انها مملوكة لشركة فيسبوك.

🔹السؤال الأهم، شو يلي جعل شركة فيسبوك تقوم بهي الخطوة؟

الجواب على الموضوع ما راح يكون بسيط ولا مباشر - لهاد السبب راح قسمه إلى عدة أجزاء
بالبداية، لازم نعرف انه فيسبوك ومن فترة بدأت تستثمر مبالغ ضخمة جداً في تقنية "ميتافيرس Metaverse" - ومن هون اجت التسمية الجديدة للشركة (Meta)

🔹شو هو الـ ميتافيرس Metaverse؟

-بعيداً عن المعنى الحرفي للكلمة- ميتافيرس راح تكون هي الانترنت الجديد أو يمكن القول حياتنا الرقمية بعد عدة سنوات - ويلي هي عبارة عن "واقع افتراضي" راح يتم الوصول إله من خلال نظارات ثلاثية الأبعاد

شو معنى هاد الكلام؟


ببساطة، حالياً، معظمنا منعتمد على الكمبيوتر أو التلفون للشغل أو الدراسة أو تصفح الانترنت أو التواصل مع الأهل والصديقات والأصدقاء ..الخ وكما عنا تلفزيون وممكن راديو وساعة ووو…
"ميتافيرس" بيعني انه جميع هي الاشياء راح يتم دمجها جميعاً في عالم افتراضي يمكن الوصول إله من خلال نظارة! حرفياً من خلال نظارة! 🙃


كيف؟ ببساطة بدل م نلبس اواعينا ونروح على الشغل أو نروح على المدرسة أو الجامعة أو على مقابلة عمل.. راح نفيق الصبح، نغسّل ثم نلبس النظارة فـ هوب!! نلاقي حالنا قدام باب المكتب أو المدرسة أو الجامعة.. ومنلاقي صديقاتنا واصدقائنا أو زميلاتنا وزملائنا أمامنا من خلال شاشة النظارة (ﻷن هم بطبيعة الحال راح يوصلوا لنفس المكان كمان باستخدام النظارة) - وراح نبدأ الشغل أو نحضر الصف جميعنا من خلال النظارة!


بدنا نحكي مكاملة؟ من خلال النظارة \ كيف منطلب الرقم؟ بسيطة! منقول للنضارة اتصلي بـ فلانة أو فلان فـ بيتم الاتصال فيهم
بدنا نعرف قديش الوقت؟ من خلال النظارة \ بيكون الوقت ظاهر على شاشة النظارة أو منسأل النظارة عن الوقت
بدنا نحضر فيلم أو أخبار أو مسلسل أو فيديو أو يوتيوب؟ من خلال النظارة


بدنا نحضر مباراة كرة قدم أو كرة سلة؟ من خلال النظارة \ بدنا نشتري بطاقة حضور المباراة؟ من خلال النظارة \ بدنا ندفع ثمن البطاقة؟ من خلال النظارة \ بدنا نروح على الملعب ونقعد بمكان معيّن على المدرّج؟ الملعب والجمهور موجودين بالنظارة
بدنا نعمل زيارة عائلية أو زيارة عمل أو زيارة تعارف؟.. من خلال النظارة


كيف راح تكون اشكال الاشخاص يلي راح نشوفهم أمامنا من خلال النظارة؟ أو كيف الناس راح تشوف شكلنا من خلال النظارة؟ ببساطة راح يتم رسم شخصية بتشبهنا لحد كبير وراح نختار ملابس من خلال النظارة وراح نشتري ملابس لشخصيتنا من خلال النظارة وراح نستعار ملابس ونعير بعض ملابس من خلال النظارة
حرفياً راح تتحول حياتنا لتصير من خلال "نظارة"!! 🙃



مثال عن هذا المشروع في وقت سابق



شايفين الأمر خيال علمي ومبالغة!؟ تمام، لكن خدوا خطوة لورا، وفكروا بحياتنا كيف كانت عام 2005 وكيف كنا مننظر للواقع يلي عايشينه اليوم! وكمان شوفوا حياتنا كيف كانت خلال 2020! .. كيف فجأة، تحول كل نشاطنا وشغلنا ودراستنا وزيارة المتاحف والمعارض والامتحانات والتسوق وووو.. من الواقع ليصير عبر الكمبيوتر والتلفون! .. فـ الفرق حالياً انه بدل م يكون عبر الكمبيوتر والتلفون راح يصير من خلال نظارة!! 🙃


🔹هل الحياة الرقمية أو الواقع الافتراضي أو الواقع المعزز أو ميتافيرس هو خاص بشركة ميتا (فيسبوك سابقاً)؟

لا ابداً، عدد كبير من الشركات عم تشتغل على الموضوع منها شركة مايكروسوفت يلي خصصت آلاف المهندسات والمهندسين والموظفات والموظفين للموضوع - إضافة لشركة سامسونغ وشركة سوني يلي عندهم آلاف براءات الاختراع بمجال الواقع المعزز والواقع الافتراضي - وغيرها من الشركات الأخرى


🔹هل نحنا أو الكوكب جاهز حالياً لبدء استخدام تقنية الواقع الافتراضي أو الواقع المعزز؟

بشكل عام، ﻷ - التقنية مازالت قيد التطوير، بالرغم انه بدأ تجريبها بأكثر من مجال، مثل الألعاب أو الجولات الافتراضية أو حتى الاجتماعات الافتراضية وجميعها باستخدام النظارة. من ناحية ثانية، وبالرغم من تقدم الانترنت، إلا أن سرعة وجودة الاتصالات حالياً راح تكون عائق للاعتماد بشكل كامل على الميتافيرس - لكن، ومع انتشار اتصالات الـ 5G يلي الاتصال فيها سريع جداً وكذلك انتشار الانترنت عبر الفايبر فـ سرعة وجودة الاتصال بالانترنت.. راح تسمح لإمكانية الاعتماد على الميتافيرس


🔹متى ممكن نبدأ نشهد انتشار الميتافيرس أو الاعتماد على الواقع الافتراضي؟

باعتقادي -وبظل سرعة التطور التقني وبظل المبالغ الهائلة يلي عم يتم رصدها من الشركات للتقنية الجديدة وبظل الجنون الساذج من الأشخاص والشركات للاعتماد على التكنولوجيا- اعتقد الأمر راح يكون خلال السنوات القليلة القادمة - خاصة أنه اليوم ومع بدء التعافي من جائحة كورونا وعودة الحياة لطبيعتها إلا أنه عدد كبير من الشركات والمدارس والجامعات والمنظمات.. مستمرة بدعم العمل والدراسة عن بعد


-----
📌 أما عن رأيي بتقنية ميتافيرس والاعتماد على الواقع الافتراضي والواقع المعزز!.. فـ برأيي راح نترحم على أيامنا الحالية! راح ننظر للكمبيوتر والتلفون والتلفزيون والساعة على انهم "أيام الزمن الجميل"! راح ننظر على شكل مواقع الانترنت وتطبيقات اليوم مثل م اليوم مننظر لمسجلة الكاسيت والتلفون القرص ☎️ و ورق الآلة كاتبة ورسائل اليد المرسلة بالبريد والفلوبي 💾 والكاسيت وكاميرا الفيلم 🎥 وأتاري علي بابا وماريو 🕹 ويندوز 98
من ناحية ثانية، الأمر ممكن يكون اختياري خلال الفترة القادمة، لكنه ماراح يكون هيك بعد عدة سنوات!! 🙃


-----
📌 ما سبق، هو سرد بسيط حول تحول شركة فيسبوك إلى شركة ميتا - وحول تقنية ميتافيرس بشكل عام .. في مادة لاحقة، سأخصص الحديث عن رأيي في خطوة فيسبوك الحالية والمنافع التي تطمح لها الشركة ومارك زوكربيرغ شخصياً من تغيير الاسم 

المقال بواسطة/ م. علاء غزال

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -