ال Metaverse وعلاقتها بال Web3.0 ؟

.

الواقع الافتراضي الكامل، تقنية اعلنت عنها شركة فيسبوك قبل تغيير اسمها الي Metaverse واختصارها Meta ، وفي هذا المقال يشاركنا الجينيص بشكل مختصر لماذا غيرت فيسبوك اسم الشركة الام الي ميتا وما علاقة هذا التغيير بالتطور المنتظر في انترنت العالم والعوالم الافتراضية.

 

.

ايه يا سيدي الـMetaverse اللي عم مارك اتكلم عنه ده، وازاي بيقدر رواد الأعمال يخلقوا حالة من الجدل حوالين منتجاتهم بحيث يحققوا الدعاية المجانية، وأخيرًا ايه علاقة ده كله بالـWeb3.0؟ هذا ما سنعرفه وأكثر فمتنساش تعمل اللايك المتين ويلا بينا نبدأ.


مبدأيًا شركة Meta (فيسبوك سابقًا) أنا بكره كل منصاتها بلا استثناء، من أول الفيسبوك للانستجرام وحتى الواتساب، وده بسبب المواقف الكتير اللي شوفناها منهم سواء دعم للکیان المحٺل أو ترويج لمبادئ سيئة مش موضوعنا النهاردة، فـ حابب بس أفكرك إن أي كلام هنا هو كلام تقني صِرف مش بحاول ألمع الشركة فيه إطلاقًا، تمام؟


الـMetaverse يا عم الحاج هي ببساطة عبارة عن بيئة تقدر تتعامل فيها مع كائنات وهمية من صنع الكمبيوتر، تقدر تتفاعل مع البيئة بشكل كامل وتضيف عناصر للبيئة المحيطة بيك، حاجة بالظبط زي اللي بنشوفها بالفعل مع الـAR والـVR، اختصار للـ(Virtual and Augmented Reality)


وبالفعل في ألعاب كتير شغالة بنفس الكيفية، مجرد ما انت بتلبس النضارة وتربطها بجهازك، بتخش جوة العالم بتاع اللعبة وتتفاعل بجسمك وتفكيرك على أساس إنك بطل اللعبة دي، وفي ناس بتزود متعة التجربة وتجيب Gloves (قفازات) وأجهزة مزودة بـSensors (مستشعرات) عشان تقدر تتفاعل بشكل كامل مع اللعبة


الفكرة المختلفة في الـMetaverse هي التواصل، إنك مش لوحدك في العالم ده، مش بتتعامل مع كائنات من صنع الكمبيوتر بس، إنت وصحابك وفلان وعلان موجودين في نفس البيئة اللي صنعها الكمبيوتر، وليكم جزء كبير من حرية تحديد ملامح البيئة دي.


الـMetaverse من ناحية تيكنيكال بيشتغل ازاي؟ بإختصار شديد جدًا مجموعة من المستشعرات اللي بتقيس متغيرات كتير زي مكانك وإتجاه نظرك، ارتفاعك عن سطح الأرض، بُعدك عن الجهاز وحاجات تانية، النتائج اللي بتقراها المستشعرات دي بتروح للكمبيوتر عشان السوفتوير يبدأ يعالجها ويحاكي التفاعل بتاعك في الحقيقة على هيئة تفاعل في البيئة الوهمية دي.

تابع ايضآ:   تقنية الميتاڤيرس الواقع المعزز وخطر التحرش الإفتراضي


هل بقى بعد ما فهمنا الـMetaverse، دي حاجة جديدة؟ إطلاقًا


رواد الأعمال من زمان بيبالغوا في تقديم منتجاتهم عشان يحصل عليها Hype إعلامي كبير والناس كلها تتكلم عنها، وده منطقي جدًا إنه الوقت الأنسب لإطلاق الـMeta من Facebook بعد خسارة أكتر من 6% من سعر السهم، ولكن نرجع لكلامنا، فاكر Apple لما نزلت عجل الـMac بـ699 دولار؟ يعني تجيب كام عجلة تركبهم للـMac بسعر جهازك كله على بعضه 😂، هل فعلًا Apple كانت ناوية تبيع المنتج ده؟ إطلاقًا


الفكرة بإختصار في الـHype اللي هتعمله، والصحافة فعلًا كلها تتكلم عن عجل بـ699 دولار، فـ المشاهد يعرف إن Apple كان عندها مؤتمر أعلنت فيه عن حبة منتجات من ضمنهم العجل دي، وبس كدة اتحقق المطلوب!


برضه Elon Musk، ماينفعش نتكلم عن المبالغة بدون ما نجيب سيرته، حد فاكر الـTesla Robot؟ في مؤتمر الإعلان عن Tesla Robot يطلع Elon Musk يقولك هنعمل Robot كذا كذا في خلال سنة واحدة، اللي هو من رابع المستحيلات خلال سنة واحدة ينفذ كل اللي قاله في الـRobot ده ويبقى متاح للبيع، في حين وجود شركات بقالها سنين بتعافر عشان تطلع Robot واحد للبيع!


وهكذا، Mark لما اتكلم عن الـMetaverse كان بيبالغ بشكل كبير في اللي يقدر يوصله في الوقت الحالي، تقنيًا الموضوع ممكن جدًا ولكن الأجهزة المتاحة للبيع في الوقت الحالي غير قادرة على معالجة الكم الهائل ده من البيانات في ثانية واحدة! فـ احنا ع الأقل قدام كذا سنة على ما تبقى التقنية دي ناضجة ومستخدمة بشكل فعلي، ولكن زي ما اتفقنا فوق من طبيعة رواد الأعمال انهم يبالغوا في توصيف منتجاتهم. 


أخيرًا بقى وده الجزء اللي أنا متحمسله، إيه هي الـWeb3.0 ده؟ خليني أشرحلك

الـWeb لحد دلوقتي هو مشروع غير مكتمل، بمعنى أدق إن اللي وصلناله حتى الأن مش نهاية الـWeb، لسة الـWeb بيتطور يوم ورا التاني وبنشوف تقنيات جديدة كل يوم على الساحة


مع Web1.0، الـInternet كان عبارة عن Static Pages فيها محتوى ثابت محطوط من صاحب الموقع بس، مفيش تفاعل بين الناس وبعضها، ممكن نعتبر الـWeb ساعتها انه مجرد مكتبة كبيرة ولكن موجودة بشكل أونلاين، ساعتها برضه نمط الحياة نفسه كان مختلف، انت عندك حياتك الطبيعية، وبتقعد على الإنترنت فترات بسيطة في خلال اليوم كله


واحدة واحدة بدأ الموضوع ياخد منحنى تاني، مع بداية ظهور برامج الشات، الناس بقت تقدر تتواصل مع بعضها البعض، يظهر عندنا بعدها منصات السوشيال ميديا، اللي بتعتمد على محتوى مكتوب من خلال المستخدم نفسه، الـWeb مبقاش مجرد مكتبة وخلاص، لأ بقيت تقدر تتواصل مع الناس من خلاله


ومع إطلاق الـiPhone في 2007، الـWeb خد دفعة قوية جدًا، وبدل ما الطبيعي إنك تقعد ع الإنترنت فترات متقطعة خلال اليوم، إنت بقيت متصل بالإنترنت على طول، جمعلي بقى الشات والسوشيال ميديا، المحتوى المكتوب من خلال المستخدمين وفكرة وجود موبايل في الإيد بيخش على الإنترنت، العوامل دي كلها شكلتلنا الـWeb2.0، الـWeb اللي احنا نعرفه وشغالين عليه لحد دلوقتي!
الـTransition (الانتقال) ما بين الـWeb1.0 والـWeb2.0 خد ييجي 10 سنين! وحاليًا احنا داخلين على بداية الـWeb3.0، وده بقى ليه علاقة وطيدة بالـMetaverse اللي Mark اتكلم عنه


الـWeb3.0 بيحل مشكلة الخصوصية المنتهكة، مفيش سيرفر واحد عليه كل الداتا بتاعتك، "المفروض" إن الـWeb هيبقى Decentralized، كل جهاز بيشارك في تكوين الـWeb، حاجة شبه الـBlockchain بس الموضوع معقد شويتين فـ ممكن نبقى نتكلم عنه بعدين بإذن الله


الـWeb3.0 برضه من أهدافه هو تحويل الـWeb لعالم تقدر تعيش جواه، أه بالظبط هو الـMetaverse بغباوته، الـWeb3.0 بيهدف إن الناس تبقى Connected مع بعض بشكل أكبر من الشكل الحالي، كسر حواجز الزمكان وخلق حالة من التواصل مختلفة تمامًا عن اللي احنا شايفينها دلوقتي!


ولكن زي ما قولتلك فوق، الموضوع كله ما زال في بدايته جدًا، وعشان الموضوع مايبقاش أطول من كدة، خليني أقولك إن التكنولوجيا بتتطور بشكل سريع جدًا وبتاخد قفزات قوية، اوعى تتخيل إننا وصلنا للنهاية، إحنا لسة بنبتدي 😄
وبس كدة، ده الموضوع ببساطة.

 

.

 



تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -