كيفكم يا شباب عاملين ايه؟
بلاحظ الناس بتسأل عن كيفية كتابة المقالات المتوافقة مع السيو، فقولت أما أشرح لكم بطريقتي وأنا مش أستاذ ولا حاجه أنا مسكين جداً بل بتعلم منكم، والشرح فيه النظري والعملي اللي ربنا قدرني عليه.
1. مقالة
2. كلمة مفتاحية
3. مانشيت أو هيد لاين
4. مقدمة
5. عنوان رئيسي
6. عناوين فرعية
7. خاتمة
-------------------------
الشرح..
1.المقالة:
مجموعة من الكلمات والحروف تؤدي في النهاية إلى معنى، واللي بيفرق مقالة فلان من فلان، هو اختياره لأدق الحروف في المقالة بتاعته لوصف الشئ، بالبلدي يعني يكون حكاي أو بيعرف يسرد قصة جذابة سهلة.2.الكلمة المفتاحية:
الكلمة اللي الجمهور هيبحث عنها، ولازم مقالتك تبقى انت مُديرها ومتحكم فيها وتعرف توزعها صح في المقالة بتاعتك وهنشرح ازاي طريقة التوزيع.3.المانشيت أو الهيد لاين:
هو الخطاف اللي المفروض هتخطف بيه جمهورك، وتخليه يقف ويستنى ويقول اه، أنا ممكن أوقف حياتي وأعطل نفسي دقيقتين في سبيل اخش أقرأ واشوف الراجل ده عاوز يقول ايه، وبيكون المانشيت من 7 إلى 9 كلمات ولازم تكون فيهم الكلمة المفتاحية بشياكة.4.مقدمة:
المقدمة دي اللي هي "عنوان الجواب" زي مبيقولوا، دي اللي هتحدد وتبين للقارئ إما إنه يكمل معاك، وتبقى كده انت كاتب كويس وعشرة على عشرة، أو يقول لنفسه لأ ده ميستحقش إني أكمل معاه، وبالنسبالي في مقالات بقرأها وفجأه حاجه تحصل وأسيب التلفون وتروح مني، ببقي زعلان اني مكملتهاش بل في بعض الأوقات بدور عليها، وده لإن الكاتب خلق عندي حاجة ورغبة إني أكمل المقالة لنهايتها، والمقدمة دي لازم تكون فيها الكلمة المفتاحية في أول براجراف يعني متعملش مقدمة وتدوس انتر وبعدين تكمل المقدمة وتكتب الكلمة المفتاحية لأ لازم الكلمة المفتاحية تكون في أول براجراف.5.عنوان رئيسي:
بعد متخلص مقدمتك الجميلة، بتحط عنوان رئيسي بعدها وتحط الكلمة المفتاحية بشياكة بردو، وبتكون 5 كلمات أو 6 أو اياً كان يعني.6. عناوين فرعية:
هل من المعقول إن المقالة بتاعتك تبقى مثلاً 1000كلمة أو 1850 كلمة وتكون كتلة من الكلمات؟ لأ طبعاً عينيك مش هتستريح لما تشوفها بالمنظر ده، فالحل في العناوين الفرعية، ولازم المقالة بتاعتك لو 500 كلمة مثلاً تبقى فيها 7 عناوين فرعيةأقل شيئ ولازم تكون الكلمة المفتاحية في عنوان فرعي منهم.7.الخاتمة
قالي الوداع وانا أقوله ايه هو الوداع يتقال فيه ايه انت هنا بتشكر القارئ بشياكة وبتودعه وبتسيب فيه أثر طيب وبتحط الكلمة المفتاحية في الخاتمة.
-----------------------------------------------------------------
التطبيق العملي..
عاوز تمسك دولار اتعلم ازاي توزع الكلمة المفتاحية
(ده المانشيت اللي المفترض هيشد الناس) والكلمة المفتاحية منورة اهي ومتقلك عليها علشان تشوفها وتبقى واضحة.
الدولار من أقوى العملات الموجودة على ظهر الكوكب، وطلاء الدولار باللون الأخضر لم يأت عبثاً، بل لأن للون الأخضر رموز ودلائل، فهو لون الحياة على كوكب الأرض، وهو البدايات الجديدة، وبالدولار تتفاضل الأمم وتستعرض عضلاتها، فبالدولار تستطيع التحدث حتى إذا لم تك بليغاً او مفوهاً، فبالدولار تستطيع ان تفعل أي شيء والآن سنرشدك لتتعلم كيف توزع الكلمة المفتاحية وتحصل على هذه الورقة المطلية بلون الحياة.
(دي كده المقدمة وذكرنا فيها الكلمة المفتاحية وبردو خليتهالك منورة وتقلتلهالك وحطيت فيها بعض التحابيش)
إزاي توزع الكلمة المفتاحية وتحقق أحلامك وتشتري FIAT 128
(العنوان اللي فوق ده اسمه عنوان رئيسي والكلمة المفتاحية موجودة فيه ومنورة بردو)
لازم عقليتك تبقى غنية
ده عنوان فرعي 1 ولازم تحط تحتيه كلام أكيد Bla bla bla
اتعلم ومتيأسش
عنوان فرعي 2 ولازم تحط كلام أكيد يعني bla bla bla bla
اصبر وقول يارب
عنوان فرعي 3 وتحتيه كلام ولازم تحط فيه الكلمة المفتاحية في الكلام الي هتكتبه هنا.
الكلمة المفتاحية تعليمها سهل ده
عنوان فرعي 4 وتكتب تحتيه اي كلام وهنا حطيت الكلمة المفتاحية في العنوان الفرعي خلي بالك وركز
وهكذا اكمل لحد اما اوصل لـ 7 عناوين فرعية
والكلمة المفتاحية أحطها مثلا جوه العنوان فراعي مرة والعنوان التاني لأ مكررهاش كتير ونفس الوقت اظبطها على حسب عدد الكلمات بتاعتي.
الدولار له سحر ولازم تاخد بالك منه بعد متبقى غني لازم تستثمر فلوسك كويس وإلا هتضيع لازم تكتب كلام حلال علشان ربنا يرضى عنك وتقدر تساعد وتفيد المسلمين وانت غني عن طريق انك تبني استثمارات ومشاريع وتشغل الشباب يلا شد حيلك واشوفك قريب في مجلة فوربس ومتنسنيش اني علمتك إزاي توزع الكلمة المفتاحية.
دي كده الخاتمة بتاعتنا وحطينا فيها الكلمة المفتاحية ومخليهالك منورة بردو ومتقل عليها وبكده تقدر تكتب مقالة متوافقه على حد علمي المتواضع للسيو ولو في أي تعديل ياريت أصحاب الخبرة يصلحولي وكل الشكر لأصدقائي اللي علموني أنوس والعزازي.
- خد بالك من الهمزات.
- وخد بالك من المسافات بين الجمل
- ومن الفرق بين الـ ي و الـ ى.
- ومن الفصلات مفيش مسافه بينها وبين الكلمة اللي قبلها وفي مسافة بين اللي بعدها بتبقى، كده.
- واما تكتب اي مقالة حاول تسيبها شوية وترجع تقرأها تاني هتلاقي في جمل ممكن تعيد صياغتها بشكل أحسن وأجمل.
- حمل البروف ريدر في الورد بتاعك وربنا يوفقكم
قد يفيدك ايضا:
رابط تفعيل جوجل ادسنس بالبطاقة
أسهل طريقة لمعرفة الاستضافة التي يستخدمها أي موقع
الربح من كتابة المقالات
ما هو معلومات البائع في ملف sellers.json في جوجل ادسنس
موقع لإنشاء صفحات شخصية مجانية
طريقة الحصول على مشاهدات لمواضيعك وفيديوهاتك وروابطك
كيف تعرف تاريخ تشغيل أي موقع؟
سيو تحسين محركات البحث للمواقع
سيو: أساطير سيو الكاذبة عند استخدام تقرير الأداء في ويب ماستر