دروس في الحياة لكي تصبح شخص افضل من الان

 

 واحد من الفيديوهات الجميلة اللى اتفرجت عليها الفترة اللي فاتت دي، فيديو لواحد أتم عامه الـ 34 وبيقدم ملخص خبرته في الحياة، والدروس اللى استفادها في الـ 34 سنة دول، وده نص كلامه اللى عجبني وفعلا دروس مهمة وممكن تفيد ناس كتيرة:  


 ازي تبقي شخص ناجح؟

- أكتر كلمة مرعبة وأثرت فيا إن العالم مليان ناس موهوبة لكن فيهم كتير معملوش حاجة بموهبتهم، فخفت أكون واحد من دول، فبدأت اتحرك عشان أستغل موهبتي.


- مفيش حد في الدنيا بيتولد ناجح، كل واحد مر قدامك باين إنه ناجح هو في الحقيقة مر بصعوبات كتيرة جدا أنت متعرفش عنها حاجة، لأنه في الغالب مش بيشارك معاك مشاكله هو بيشارك معاك نجاحاته بس.


- اتعلمت إني مركزش على الأعذار، وأبص أكتر على المتاح اللى أقدر أعمله مهما كانت الظروف صعبة.


- اتعلمت إني أبدء الحاجة اللي نفسي أعملها، ممكن أقعد سنين نفسي أبدء في حاجة وخوفي من إني أبدء معطلني، وأول ما ببدء بقول يا ريتني كنت بدأت من زمان


- اتعلمت إن الطريق للنجاح مش طريق واضح، لكن اكتشفت إنه مليان مشاكل ومطبات، فلازم هتخبط كتير أوي لحد ما توصل للهدف بتاعك.


- اتعلمت إني متكلمش كتير، زمان كنت بتكلم كتير وبعلق على كل حاجة، لكن اتعلمت إن السكوت في أحياناً كتير أوي بيكون أحسن من الكلام.


- اتعلمت إني مقولش على حاجة سهلة بدون ما أكون جربتها، لأنه أحيانا الحاجات اللى بتقول عليها سهلة مش بتكون سهلة لكن تبدو إنها سهلة.


- اتعلمت لما حد يقولي نصيحة وفي نص الكلام يقول كلام غلط، اتعلمت إني أخد منه الكلام الصح ومش لازم كل شوية أقاطع كلامه وأقوله بس دي غلط وده مش فيا، اسمعه للآخر وخد المفيد من كلامه والباقي ارميه ورا ضهرك.


- اتعلمت إن المثالية وهم، ودي أكتر حاجة ممكن تعطلني إني أوصل لأحلامي.


- اتعلمت إني مقاطعش حد يكون بيحكي لي مشكلته وأقوله اه اه أنا كمان حصل معايا نفس المشكلة، لإنه هو بيحكي لك دلوقتي عشان تساعده في حل مشكلته ومش مهتم يسمع مشكلتك ولا هتستفاد حاجة لما تاخد الكلام منه وتحكي أنت عن مشاكلك.


- اتعلمت لما يكون الشخص على طبيعته ومش مصطنع، الناس هتحبه وهتحترمه أكتر.


يا رب يبقى الموضوع مفيد ليكم 

عبدالرحمن شهاب الدين

تعليقات
ليست هناك تعليقات
إرسال تعليق