فن التسويق: كيف وصلت العلامة التجارية Supreme الي هذه المكانة

سوبريم Supreme، دي واحدة من العلامات التجارية اللي أنا معجب بيها جداً، كان دايماً عندي فضول أعرف إزاي وصلت تحديداً للمكانة دي، إزاي شركة كل اللي بتعمله إنها بتبيع اللوجو.. اللوجو بس.



وصلت للمستوى ده وعندها قاعدة ناس مستنيين منها أي حاجة، أي حاجة حرفياً حتى قوالب الطوب، Collectors بيجمعوا كل المنتجات اللي عليها علامتها التجارية - Supreme .. أنا محتاج أرغي شوية عن Supreme.


 

إمتيازات Apple معروفة، فيه ناس بتشتري منتجات Apple لمجرد العلامة نفسها لإنها مربوطة بالـ Creativity والحالة المادية الكويسة، بس حتى مع كده، Apple فعلياً بتقدم منتجات، ومنتجات كويسة كمان مبنية عليها السمعة دي، لكن Supreme..

 هي Supreme بتعمل إيه؟

 Supreme من حوالي سنتين عملت تعاون مع Oreo وباعوا علب Supreme Oreos لونها أحمر، إتسحبت في دقايق و بقت بتتباع في مزادات على eBay بسعر وصل لـ 91 ألف دولار للعلبة! .. 

ليه اللوجو بتاعها منتشر بالشكل ده وناس بتدفع له أي حاجة؟ إشمعنا؟ ده السؤال، وعشان تعرف قصته بترجع لورا خالص لنشئة Supreme اللي مابدإتش بالهدف ده.

 

 Supreme بدايتها ماكنش فيها أي طموح.


تأسيس Supreme كان عامل زي تأسيس أي محل هدوم في وسط البلد، إنت بتلاقي كتير شباب شغالين مع بعض بيبيعوا حرفياً زبالة بأسعار غالية وبيبدأوا يتوسعوا وينافسوا بعض، ده اللي بيحصل وسط البلد هنا وبيحصل كمان وسط محلات الهدوم اللي حواليك في أي مكان لإن الـ Business ده عامل زي فقاعة إقتصادية قليل اللي بينوي الدخول ليها عشان المخاطر وقلة الخبرة.

 

من هو  مؤسس Supreme؟

 مؤسس Supreme هو James Jebbia، بريطاني (من أصل أمريكي) سافر لأمريكا و هو عنده 19 سنة، وإشتغل في محل هدوم في New York اسمه "Parachute"، نفس قصة شباب وسط البلد، بس المحل ده كان زباينه ناس عالية زي Michael Jackson و Madonna، والشغل كان فيه كويس لـ James Jebbia اللي إتلاحظ من مؤسس Parachute وبقى بيعتني بيه، بس بعد شوية تحويش قدر إنه يفتح محل ملابس خاص بيه مع صاحبته Mary Ann Fusco، والهدف من الخطوة دي كانت إن عنده رؤية مختلفة عن الرؤية اللي ماشي عليها Parachute، كان عاوز يعمل حاجة تليق أكتر مع الشباب المعاصر وقتها وعشان كده فتح المحل الخاص بيه وجاب لهم شغل شعبي من إنجلترا كان جديد على سكان نيويورك، سمى المحل ده "Union NYC".

 

 وبعد سنة إتصاحب على Shawn Stussy - مؤسس "Stüssy" (اللي هي علامة تجارية لسه موجودة لحد دلوقتي) عشان يعملوا أول محل تجاري للماركة دي، ولما المدير Shawn Stussy ساب الشغل، James Jebbia قرر يروح يفتح محل جديد مع نفسه وسماه "Supreme"، هي دي Supreme اللي نعرفها النهارده واللي بدأت في 1994 بالـ Logo الحالي بتاعها واللي كان مُلهم من شغل Barbara Kruger، وفي البداية اللي ساعد Supreme على النهوض بصورة العلامة التجارية "الروشة" هو إنها كانت بتبيع Skateboards للشباب وبتشغل أغاني راب بصوت عالي وماشية مع الـ Pop Culture، بقت Supreme بيت للشباب اللي عاملين زي شباب وسط البلد اللي جايين من بلاد الفلاحين وعاوزين "يخربوها".

 

 بس كانت وقتها لسه مجرد مكان، محل بيبيع هدوم لكن مش شركة هدوم، بس بسبب حب الشباب ليها؛ Supreme قدرت تكبر لحد ما تعاونت مع مصنع اسمه Brents عشان تحط اسمها على التيشرتات والـ Skateboards وتبيعها في محلاتها، وبسبب إن التيشرتات والسويتشرتات اللي كانت بتعملها كانت بجودة عالية وجميلة؛ كانت دايماً بتبقى مسحوبة.

 

 فده خلى James Jebbia عمل الحركة اللي خلت Supreme هي العلامة التجارية العظيمة بتاعت النهارده، James قرر إن منتجاتهم تنزل يوم واحد في الإسبوع، يوم الخميس، واللي حصل إن كان بيحصل زحمة شديدة جداً على محلاتهم في اليوم ده بتعطل الدنيا وبتخلي فيه فضول على منتجات Supreme.

 ده خلى ناس أكتر تتحمس إنها تروح تجرب تشتري منهم، وبقت العلامة منتشرة جداً لدرجة إنها بدإت تظهر في الأفلام ويلبسها الفنانين، وكبرت جداً لحد ما بدأ الكلام الجد يظهر، وبدإت التعاونات مع الشركات الكبيرة.


شركات زي Nike إتعاونت معاها Supreme، والهدف هو زيادة مبيعات الشركة جوه محلات Supreme جنب زيادة شهرة Supreme بوصولهم للناس اللي بتحب الشركة المتعاونين معاها، والتعاونات كملت مع شركات تانية زي Timberland و Oreo و وصلوا لحد Louis Vuitton، لحد ما وصل الوضع إن الناس إشترت دباسات Supreme تمنها عدي الـ 100 دولار، و بسكويت Supreme تمنه أغلى من الـ Tesla Model X، وصندوق تمنه ملايين. شوفت Supreme وصلت لإيه؟ الموضوع ما إتعملش في يوم وليلة.

أساس نجاح علامة سوبريم Supreme

نرجع للأساس، اللي بنى إمبراطورية Supreme الكبيرة دي هي السمعة الكويسة والمحبة، Supreme بدإت من الصفر و جمعت حواليها الطائفة بتاعتها، والدرس اللي تتعلمه هنا إن مفيش علامة تجارية ناجحة بتطلع فجأة مع الـ Hype، الموضوع كله بيكون مبني على الحب والسمعة والتقدير.

 اللي عاوز يبني كيان دلوقتي، هو ماينفعش يضخ فلوس وخلاص، هو لازم يبدأها ببطء ويحدد الطريق الأفضل وهو ماشي، يصحح الإتجاه، ويجمع الطائفة حواليه. 

 

 معلومة زيادة: 

في الأصل بتكون أسعار المنتجات بتاعت Supreme غالية بس عادية، مثلاً الدباسة الـ 20SS بتاعتهم كان سعرها الأصلي 28 دولار، بس اللعبة هي إن حتى لو معاك الـ 28 دولار ماتقدرش تشتريها، وهي فعلاً حالياً مش موجودة غير على eBay بأضعاف التمن ده. مع أي منتج من أي شركة، لو معاك فلوسه بتقدر تطلبه وتاخده، صح؟ أيوه، بس مع Supreme إنت حتى لو معاك تمن المنتج إنت مش هتقدر تاخده بالسهولة دي، إنت بتروح الفرع المتوفر فيه، بتقدم على طلب المنتج، وتستنى السحب، ولما يختاروا اسمك؛ بتقف في طابور طويل عشان تروح تستلمه وتدفع تمنه، الموضوع بياخد ساعات ومش مضمون في الآخر، مش سهل أبداً.

المقال من طرف/ جولد مان
Sources: CNBC, Hook, Highsnobiety

تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -